ദാവൂദ് ഇബ്രാഹിം പാക്കിസ്ഥാനില്‍ ഇല്ലെന്ന് പാക്ക് ഹൈക്കമ്മിഷണര്‍ അബ്ദുല്‍ ബാസിദ് പറഞ്ഞു. ദാവൂദ് എവിടെയാണെന്ന് ഇന്ത്യാ സര്‍ക്കാരിനു പോലും അറിയില്ലെന്നും ബാസിദ് പറഞ്ഞു. ബംഗ്ലൂരില്‍ സംഘടിപ്പിച്ച ഒരു പരിപാടിക്കിടെയാണ് ബാസിദിന്റെ ഇത്തരത്തിലൊരു പ്രതികരണം. ദാവൂദിനെ കുറിച്ച് എന്തെങ്കിലും വിവരം ലഭിക്കുകയാണെങ്കില്‍ അറിയിക്കണമെന്നും അദ്ദേഹം പറഞ്ഞു.
ദാവൂദ് പാക്കിസ്ഥാനില്‍ തന്നെയുണ്ടെന്നാണ് കേന്ദ്ര സര്‍ക്കാറിന്റെ അവകാശപ്പെടുന്നത്. ഇക്കാര്യം കേന്ദ്ര ആഭ്യന്തര മന്ത്രി തന്നെ വ്യക്തമാക്കുകയും ചെയ്തിരുന്നു. ഇതിനെ സാധൂകരിക്കുന്ന രീതിയില്‍ ഫോണ്‍ സംഭാഷണം പുറത്തു വന്നിരുന്നു. കൂടാതെ ദാവൂദിന്റെ കറാച്ചിയിലെ വിലാസവും ഫോണ്‍നമ്പറും പാസ്‌പോര്‍ട്ടും അടക്കമുള്ള കാര്യങ്ങള്‍ പുറത്തായിരുന്നു.
ഇന്ത്യ വലിയ രാജ്യമാണെന്നും അതിനാല്‍ അക്രമങ്ങള്‍ അവസാനിപ്പിക്കാന്‍ കൂടുതല്‍ ഉത്തരവാദിത്വമെടുക്കണമെന്നും ബാസിദ് പറഞ്ഞു. അങ്ങിനെയെങ്കില്‍ പാക്കിസ്ഥാനും പ്രശ്‌നങ്ങള്‍ പരിഹരിക്കാന്‍ ശക്തമായി ഇടപെടുമെന്ന് ബാസിദ് പറഞ്ഞു. ഇരുരാജ്യങ്ങളും പരസ്പര ബഹുമാനത്തോടുകൂടി പെരുമാറണമെന്നു പറഞ്ഞ അദ്ദേഹം കശ്മീര്‍ ഇപ്പോഴും തര്‍ക്കം നിലനില്‍ക്കുന്ന പ്രദേശമാണെന്നും വ്യക്തമാക്കി. അടുത്തിടെ അധോലോക നേതാവ് ഛോട്ടാ രാജന്‍ അറസ്റ്റിലായതിന് പിന്നില്‍ ദാവൂദാണെന്നാണ് മാധ്യമങ്ങള്‍ റിപ്പോര്‍ട്ട് ചെയ്തതു. വൂദ് ഇബ്രാഹിം ഉള്‍പ്പെടെ ആരെയും ഭയമില്ലെന്ന് രാജന്‍ പറഞ്ഞു.
കഴിഞ്ഞ ദിവസം ഓസ്‌ട്രേലിയന്‍ പൊലീസ് നല്‍കിയ രഹസ്യവിവരത്തിന്റെ അടിസ്ഥാനത്തില്‍ ഇന്തൊനീഷ്യന്‍ പൊലീസ് വിരിച്ച വലയില്‍ സിഡ്‌സിയില്‍നിന്നു വിമാനമാര്‍ഗം ബാലിയിലെത്തിയ അധോലോക നായകന്‍ കുടുങ്ങുകയായിരുന്നു. അറസ്റ്റിലാകുമ്പോള്‍ ഒറ്റയ്ക്കായിരുന്നു ഛോട്ടാ രാജന്‍. പൊലീസ് വളഞ്ഞപ്പോള്‍ അല്‍പം പരുങ്ങലിലായ അയാള്‍ തുടര്‍ച്ചയായി പുക വലിക്കുകയായിരുന്നു. തന്നെ സ്വതന്ത്രനാക്കണമെന്ന് അഭ്യര്‍ഥിച്ചുകൊണ്ടിരുന്നുവെന്നും പൊലീസ് പറഞ്ഞു.
ഛോട്ടാ രാജനെ ഇന്ത്യയിലെത്തിക്കാനുള്ള നിയമനടപടികള്‍ക്കായി സിബിഐ യുടെ പുതിയ അന്വേഷണസംഘം ഉടന്‍ ഇന്തൊനീഷ്യയിലേക്ക് തിരിക്കും. രാജനെതിരെയുള്ള കേസുകളുടെ വിവരങ്ങള്‍ തയ്യാറാക്കി വയ്ക്കാന്‍ സിബിഐ മുംബൈ പൊലീസിനോട് ആവശ്യപ്പെട്ടിട്ടുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha