പ്രിതിക യാഷിനി രാജ്യത്തെ ഭിന്നലിംഗ വിഭാഗത്തില്‍നിന്നുള്ള ആദ്യ പൊലീസ് സബ് ഇന്‍സ്‌പെക്ടറാകും. 25 വയസുകാരിയായ പ്രിതിക യാഷിനി നിയമ യുദ്ധത്തിലൂടെ മദ്രാസ് ഹൈക്കോടതിയില്‍ നിന്ന് അനുകൂല വിധി സമ്പാദിക്കുകയായിരുന്നു. പ്രിതിക യാഷിനിക്ക് പൊലീസ് സബ് ഇന്‍സ്‌പെക്ടറായി നിയമനം നല്‍കാന്‍ തമിഴ്‌നാട് യൂണിഫോംഡ് സര്‍വീസസ് റിക്രൂട്ട്‌മെന്റ് ബോര്‍ഡിന് മദ്രാസ് ഹൈക്കോടതി നിര്‍ദേശം നല്‍കി. ഭിന്നലിംഗ വിഭാഗത്തില്‍പ്പെട്ടവര്‍ക്ക് സംസ്ഥാന പൊലീസ് സേനയില്‍ കൂടുതല്‍ നിയമനം ഉറപ്പാക്കുന്നതിന് നിയമം ഭേദഗതി ചെയ്യാനും കോടതി നിര്‍ദേശിച്ചു.
ആണായി ജനിക്കുകയും വളരുകയും ചെയ്ത പ്രിതിക ലിംഗമാറ്റ ശസ്ത്രക്രിയയിലൂടെയാണ് സ്ത്രീയായി മാറിയത്. കംപ്യൂട്ടര്‍ ആപ്ലിക്കേഷന്‍സ് ബിരുദധാരിയായ പ്രിതിക, ശസ്ത്രക്രിയയ്ക്കു മുന്‍പ് പ്രദീപ് കുമാറായിരുന്നു. ലിംഗമാറ്റ ശസ്ത്രക്രിയ നടത്തിയിട്ടുള്ളവര്‍ക്ക് സേനയില്‍ ചേരുന്നതിന് നിയമപരമായ തടസമുള്ളതിനാല്‍ പ്രിതികയുടെ അപേക്ഷ തള്ളിയിരുന്നു. ഈ വിഭാഗത്തിലുള്ളവര്‍ക്ക് സംവരണവും എഴുത്തു പരീക്ഷ, ശാരീരിക പരിശോധന, ഇന്റര്‍വ്യൂ എന്നിവയിലൊന്നും ഇളവും അനുവദിച്ചിരുന്നില്ല. ഇതേ തുടര്‍ന്ന് പ്രിതിക കോടതിയെ സമീപിക്കുകയായിരുന്നു. പരീക്ഷയില്‍ 28.5 എന്ന കട്ട് ഓഫ് മാര്‍ക്ക് പ്രിതികയ്ക്ക് 25 എന്ന് ഇളവ് ചെയ്തു. ശാരീരിക പരീക്ഷയിലും പ്രിതിക വിജയിച്ചു. 100 മീറ്റര്‍ ഓട്ടം പൂര്‍ത്തിയാക്കിയത് അനുവദിച്ചിരുന്നതിലും ഒരു സെക്കന്‍ഡ് മാത്രം വൈകിയായതിനാല്‍ അതിലും വിജയിയായി പ്രഖ്യാപിക്കപ്പെട്ടു.
കോടതി വിധിയില്‍ അതീവ സന്തുഷ്ടി പ്രകടിപ്പിച്ച പ്രിതിക, ഈ വിധി ഭിന്നലിംഗ വിഭാഗത്തില്‍പ്പെട്ടവര്‍ക്ക് പുതിയൊരു തുടക്കത്തിന് അവസരം നല്‍കുമെന്ന് പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha