ബീഹാറിലെ മഹാസഖ്യത്തിന്റെ വിജയം തന്റെ അച്ഛന് ജനം നല്‍കിയ ശ്രദ്ധാഞ്ജലിയാണെന്നും വര്‍ഗ്ഗീയ രാഷ്ട്രീയത്തിനെതിരെയുള്ള വ്യക്തമായ വിധിയെഴുത്താണെന്നും ദാദ്രി സംഭവത്തില്‍ കൊല്ലപ്പെട്ട മുഹമ്മദ് അഖ്‌ലക്കിന്റെ മകന്‍.

ജാതിയുടെയും മതത്തിന്റെയും പേരില്‍ അക്രമം അഴിച്ചു വിടുന്ന ഈ ഭരണത്തില്‍ ജനങ്ങള്‍ പൊറുതിമുട്ടിയിരിക്കുകയാണ്. ഇത്തരം മതരാഷ്ട്രീടത്തിന് ഇനി ഇന്ത്യയില്‍ സ്ഥാനമുണ്ടാവില്ല. അധികാരത്തിനു വേണ്ടിയും സ്വന്തം ആവശ്യങ്ങള്‍ക്കു വേണ്ടിയും ഈ വിധം പാവപ്പെട്ട ജനങ്ങളെ ബലിയാടാക്കുന്ന പ്രവണത രാഷ്ട്രീയക്കാര്‍ ഉപേക്ഷിക്കേണ്ടിയിരിക്കുന്നുവെന്നും അഖ്‌ലക്കിന്റെ മൂത്ത മകന്‍ സര്‍താജ് പറഞ്ഞു.

രാഷ്ട്രീയക്കാര്‍ ഞങ്ങളുടെ ഗ്രാമത്തില്‍ വന്നില്ലായിരുന്നുവെങ്കില്‍ സ്ഥിതി ഈ വിധം രൂക്ഷമാകുമായിരുന്നില്ലെന്നും ഞങ്ങള്‍ക്കുണ്ടാകുന്ന പ്രശ്‌നങ്ങളെ എങ്ങിനെ നേരിടണമെന്ന് ഞങ്ങള്‍ക്കറിയാമെന്നും അതിന് ആരുടേയും സഹായം ആവശ്യമില്ലെന്നും ബീഹാര്‍ തിരഞ്ഞെടുപ്പ് ഈ മതരാഷ്ട്രീയത്തിന് ജനങ്ങള്‍ നല്‍കിയ ചെകിട്ടത്തടിയാണെന്നും ഗ്രാമ മുഖ്യന്‍ പറഞ്ഞു.

ഉത്തര്‍പ്രദേശിലെ ഗൗതംബുദ്ധ നഗര്‍ ജില്ലയിലെ ദാദ്രിയില്‍ പശുവിനെ മോഷ്ടിച്ച് കൊലപ്പെടുത്തിയെന്നാരോപിച്ച് മദ്ധ്യവയസ്‌കനായ മുഹമ്മദ് അഖ്‌ലക്കിനെ ക്രൂരമായി കൊലപ്പെടുത്തിയതാണ് ദാദ്രി സംഭവം.കൊല നടത്തിയ പത്ത് പ്രതികളില്‍ ആറ് പേരെ അറസ്റ്റ് ചെയ്തിരുന്നു.

കൊലപാതകത്തിനെതിരെ ദേശ വ്യാപക പ്രതിഷേധമുയര്‍ന്നിരുന്നു. വര്‍ഗീയതയ്‌ക്കെതിരെയും പ്രധാനമന്ത്രി പുലര്‍ത്തുന്ന മൗനത്തിലും പ്രതിഷേധിച്ചും നയന്‍താര സെഹ്ഗാള്‍, അശോക് വാജ്‌പേയി, ഉര്‍ദു എഴുത്തുകാരന്‍ റഹ്മാന്‍ അബ്ബാസ്, ശശി ദേശ്പാണ്ഡേ, കെ.എന്‍.ദാരുവാല തുടങ്ങിയ എഴുത്തുകാര്‍ തങ്ങള്‍ക്ക് ലഭിച്ച പുരസ്‌കാരങ്ങള്‍ തിരിച്ചേല്‍പ്പിക്കുകയും അക്കാദമികളിലെ അംഗത്വം രാജിവെക്കുകയും ചെയ്തിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha