ഓണ്‍ലൈനിലൂടെ പോത്തിനെ ഓര്‍ഡര്‍ ചെയ്ത കര്‍ഷകന് നഷ്ട്ടപ്പെട്ടത് 87,000 രൂപ. മധ്യപ്രദേശിലെ ഗ്വാളിയോറിലാണ് സംഭവം. 87,000 രൂപയാണ് ഓണ്‍ലൈനായി പോത്തിനെ ഓര്‍ഡര്‍ ചെയ്ത ഇയാളില്‍ നിന്നും തട്ടിപ്പ് സംഘം കവര്‍ന്നത്. ഹോതം സിംഗ് ബാഗേല്‍ എന്ന കര്‍ഷകന്‍ ജയ്പൂരിലെ ശര്‍മ്മ ഡയറി ഫാമില്‍ നിന്നാണ് ഓണ്‍ലൈനായി പോത്തിനെ വാങ്ങാന്‍ ഓര്‍ഡര്‍ ചെയ്തത്.

ഹോതം സിംഗ് ബാഗേല്‍ ഫേസ്ബുക്കില്‍ കണ്ട പരസ്യത്തിലൂടെയാണ് 60,000 രൂപ ഓണ്‍ലൈനായി നല്‍കി പോത്തിനെ ഓര്‍ഡര്‍ ചെയ്തത്. ഇദ്ദേഹം ഫാമിന്റെ ഉടമയായ അശോക് കുമാര്‍ ശര്‍മ്മയുമായി ഫോണിലൂടെ ബന്ധപ്പെട്ടാണ് കച്ചവടം ഉറപ്പിച്ചത്. ജയ്പൂരില്‍ നിന്ന് ഗ്വാളിയോറിലേക്ക് പോത്തിനെ കൊണ്ടുവരുന്നതിനുള്ള വാഹന ചിലവായി 4,200 രൂപ കൂടി ശര്‍മ്മ അധികമായി ആവശ്യപ്പെട്ടിരുന്നു. ഈ പണവും സിംഗ് ഓണ്‍ലൈനായി തന്നെ നല്‍കി.

ശര്‍മ്മ പറഞ്ഞ തീയതി കഴിഞ്ഞിട്ടും പോത്ത് ഗ്വാളിയോറില്‍ എത്തിയില്ല. തുടര്‍ന്ന് സിംഗ് വീണ്ടും ശര്‍മയുമായി ബന്ധപ്പെട്ടു. എന്നാല്‍ വാഹനത്തിന്റെ ജിപിഎസ് ട്രാക്കിംഗ് സംവിധാനം നഷ്ടപ്പെട്ടതിനാല്‍ അത് നന്നാക്കുന്നതിനായി 12000 രൂപ കൂടി അധികമായി നല്‍കണമെന്ന് പിന്നീട് ശര്‍മ ആവശ്യപ്പെട്ടു. വേറെ വഴിയില്ലാത്തതിനാല്‍ സിംഗ് ഭാര്യയുടെ ആഭരണങ്ങള്‍ വിറ്റ് ഈ പണം നല്‍കാന്‍ തീരുമാനിച്ചു. എന്നാല്‍ ശര്‍മ്മ വീണ്ടും വാക്കുമാറ്റി ജിപിഎസ് ട്രാക്കിംഗ് സംവിധാനം നേരെയാക്കണമെങ്കില്‍ 25000 രൂപ കൂടി നല്‍കണമെന്ന് സിങ്ങിനെ അറിയിച്ചു. അങ്ങനെ 25000 രൂപ കൂടി സിംഗ് ശര്‍മ്മയ്ക്ക് ഓണ്‍ലൈനായി നല്‍കി.

എന്നാല്‍ ഇത്രയും പണം നല്‍കിയിട്ടും പോത്തുമായി ഗോളിയാറിലേക്ക് വണ്ടി എത്തിയില്ല. ഒടുവില്‍ സിംഗ് വാഹനത്തിന്റെ ഡ്രൈവറെ നേരില്‍ വിളിച്ചു. എന്നാല്‍ വന്ന വഴിക്ക് വാഹനം അപകടത്തില്‍പ്പെട്ട് പോത്തിന്റെ കാലൊടിഞ്ഞുവെന്നും വാഹനത്തിന്റെ അറ്റകുറ്റപ്പണികള്‍ക്കും ചികിത്സാ ചെലവിനുമായി അല്പം കൂടി പണം വേണമെന്നുമായിരുന്നു ഡ്രൈവറിന്റെ മറുപടി. പിന്നീട് ചതിയാണെന്ന് സിംഗിന് മനസ്സിലാകുകയും ഉടന്‍തന്നെ പൊലീസ് സ്‌റ്റേഷനില്‍ പരാതിപ്പെടുകയും ചെയ്തു. കര്‍ഷകന്റെ പരാതിയില്‍ കേസെടുത്ത പൊലീസ് ഇപ്പോള്‍ ശര്‍മയെ കണ്ടെത്താനുള്ള ശ്രമത്തിലാണ്.