പ്രധാനമന്ത്രി നരേന്ദ്രമോദിയുടെ യു.എസ് സന്ദര്‍ശനത്തിന് നാളെ തുടക്കമാവും. ഇന്ന് ഇന്ത്യയില്‍ നിന്ന് പുറപ്പെടും. ഇരുരാജ്യങ്ങളും തമ്മിലുള്ള ഉഭയക്ഷി ബന്ധം വിപുലീകരിക്കുകയാണ് സന്ദര്‍ശന ലക്ഷ്യം. നാസയുടെ 2025ലെ ആര്‍ട്ടെമിസ് ചന്ദ്രപര്യവേഷണത്തില്‍ ഇന്ത്യയെ പങ്കാളിയാക്കാനായി അമേരിക്കയ്ക്ക് താല്പര്യമുണ്ട്.

25 രാഷ്ട്രങ്ങള്‍ ഇതിനകം പദ്ധതിയുമായി സഹകരിക്കുന്നുണ്ട്.പ്രതിരോധമേഖലയിലെ സാങ്കേതിക വിദ്യ കൈമാറ്റത്തിലാണ് ഇന്ത്യയ്ക്ക് താല്പര്യം. ആയുധ വില്പനയിലാണ് അമേരിക്ക താല്പര്യം കാട്ടുന്നത്. ഈ വിഷയങ്ങളിലടക്കം പ്രസിഡന്റ് ജോ ബൈഡനുമായി മോദി നടത്തുന്ന ഉഭയകക്ഷ ചര്‍ച്ച നിര്‍ണായകമാവും.

നൂതന പ്രതിരോധ സാങ്കേതികവിദ്യ പങ്കിടല്‍, ജി.ഇ-414 ടര്‍ബോഫാന്‍ ജെറ്റ് എഞ്ചിന്‍ സാങ്കേതിക വിദ്യ കൈമാറ്റം, എം.ക്യു-9ബി സായുധ ഡ്രോണുകള്‍ വാങ്ങല്‍ തുടങ്ങിയ ഇടപാടുകളില്‍ പ്രഖ്യാപനമുണ്ടായേക്കും.


വാണിജ്യ, വ്യവസായ സഹകരണം, നിക്ഷേപം, ടെലികോം മേഖലകളിലും കരാറുകള്‍ ഒപ്പിടും.

അതേസമയം അന്താരാഷ്ട്ര യോഗദിനമായ നാളെ യു.എന്‍ യുഎന്‍ ആസ്ഥാനത്തെ വടക്കു ഭാഗത്തെ പുല്‍ത്തകിടിയില്‍ മഹാത്മാഗാന്ധിയുടെ പ്രതിമയില്‍ ആദരമര്‍പ്പിച്ചശേഷം പ്രമുഖര്‍ പങ്കെടുക്കുന്ന യോഗാഭ്യാസത്തിന് മോദി നേതൃത്വം നല്‍കും. ജൂണ്‍ 21 യോഗാദിനമായി യു.എന്‍ അംഗീകരിച്ചശേഷം മോദി നേരിട്ടെത്തി പങ്കെടുക്കുന്നുവെന്ന പ്രത്യേകതയുണ്ട്.