ലോക്‌സഭയില്‍ വച്ച് കോണ്‍ഗ്രസ് നേതാവും വയനാട് എം പിയുമായ രാഹുല്‍ ഗാന്ധി ഫ്‌ലയിംഗ് കിസ് നല്‍കിയെന്ന് ആരോപിച്ച് ബി ജെ പിയുടെ വനിതാ എം പിമാര്‍ സ്പീക്കര്‍ക്ക് പരാതി നല്‍കിയിരുന്നു. ഇപ്പോഴിതാ സംഭവത്തില്‍ പ്രതികരിച്ചിരിക്കുകയാണ് ബി ജെ പി എം പി ഹേമ മാലിനി. താന്‍ രാഹുല്‍ ഗാന്ധി ഫ്‌ലയിംഗ് കിസ് നല്‍കിയത് കണ്ടിട്ടില്ലെന്നാണ് ഹേമ മാലിനി ഒരു മാദ്ധ്യമത്തോട് പ്രതികരിച്ചത്.

താന്‍ അത് കണ്ടിട്ടില്ലെന്നും ചില വാക്കുകള്‍ ശരിയായിരുന്നില്ലെന്നുമാണ് ഹേമ വീഡിയോയില്‍ പറയുന്നത്. ഇതിന് പിന്നാലെ ഈ വീഡിയോ യൂത്ത് കോണ്‍ഗ്രസ് പ്രസിഡന്റ് ബി വി ശ്രീനിവാസ് പങ്കുവച്ചിട്ടുണ്ട്. ഫ്‌ലയിംഗ് കിസ് ഹേമ മാലിനി കണ്ടിട്ടില്ല.

എന്നാല്‍ ഈ കെട്ടിച്ചമച്ച പരാതിയില്‍ അവര്‍ ഒപ്പ് വച്ചിട്ടുണ്ടെന്നും അദ്ദേഹം ട്വിറ്ററില്‍ കുറിച്ചു.മണിപ്പൂരിന്റെ കാര്യത്തില്‍ കേന്ദ്ര സര്‍ക്കാരിനെ രാഹുല്‍ ഗാന്ധി വിമര്‍ശിച്ചിരുന്നു. ഇതിന് മറുപടി പോലും നല്‍കാതെ മറ്റ് കാര്യങ്ങളിലേയ്ക്ക് ശ്രദ്ധ തിരിക്കാനാണ് ഈ വിവാദവുമായി രംഗത്തെത്തിയതെന്ന് കോണ്‍ഗ്രസ് എം പി കാര്‍ത്തി ചിദംബരം സംഭവത്തില്‍ പ്രതികരിച്ചു.