സഹോദരിക്ക് തന്റെ ഭര്‍ത്താവുമായി ബന്ധമുണ്ടെന്ന് സംശയത്തില്‍ സഹോദരിയുടെ മുഖത്ത് വെടിവച്ച 30കാരി അറസ്റ്റില്‍. ഡല്‍ഹിയിലാണ് സംഭവം. സോനു എന്ന യുവതിയെയാണ് പൊലീസ് അറസ്റ്റ് ചെയ്തത്. വടക്കുകിഴക്കന്‍ ഡല്‍ഹിയിലെ ശാസ്ത്രി പാര്‍ക്കിലെ ബുലന്ദ് മസ്ജിദ് പ്രദേശത്താണ് സഹോദരികള്‍ താമസിച്ചിരുന്നത്. സുമൈല എന്ന യുവതിയ്ക്കാണ് വെടിയേറ്റത്.

ഇന്നലെ വൈകുന്നേരം 6.30മണിയോടെ മൂത്ത സഹോദരി തോക്ക് ഉപയോഗിച്ച് വെടിവച്ച് കൊല്ലാന്‍ ശ്രമിച്ചുവെന്ന പരാതിയുമായി സുമൈല പൊലീസിനെ സമീപിച്ചതായി ഡെപ്യൂട്ടി പോലീസ് കമ്മീഷണര്‍ ജോയ് ടിര്‍ക്കി പറഞ്ഞു.

പെല്ലറ്റ് സുമൈലയുടെ മുഖത്ത് പതിച്ചതിന് ശേഷം സോനു തോക്കിന്റെ പിന്‍ഭാഗം ഉപയോഗിച്ച് തലയില്‍ പലതവണ അടിച്ചതായും പരാതിയില്‍ പറയുന്നു. പരാതിയെത്തുടര്‍ന്ന് സോനുവിനെ അറസ്റ്റ് ചെയ്തിട്ടുണ്ട്.

തന്റെ ഭര്‍ത്താവുമായി സുമൈലയ്ക്ക് ബന്ധമുണ്ടെന്ന് സോനു സംശയിച്ചിരുന്നതായി പൊലീസ് ഉദ്യോഗസ്ഥര്‍ കൂട്ടിച്ചേര്‍ത്തു. സോനുവിന് മേല്‍ വധശ്രമം, അനധികൃതമായി ആയുധം കൈവശം വയ്ക്കല്‍ എന്നീ കുറ്റങ്ങള്‍ ചുമത്തിയാണ് കേസെടുത്തത്.