യു.പി സ്വദേശി റോഡ് മുറിച്ചുകടക്കവെ കാറിടിച്ചു മരിച്ചു. തെക്കന്‍ സൗദി അതിര്‍ത്തി മേഖലയില്‍ നജ്‌റാനിലെ അറീസയിലാണ് റോഡ് മുറിച്ചുകടക്കവെ വാഹനമിടിച്ച് മുഹമ്മദ് ഫറാഷ് ഗുല്‍ഫാം (30) മരിച്ചത്.

നജ്‌റാന്‍ സൂഖ് ഷഖ്‌വാനില്‍ ഹൗസ് ഡ്രൈവറായി ജോലിചെയ്യുകയായിരുന്നു. ഒരു യമന്‍ പൗരനോടൊപ്പം മുഹമ്മദ് ഫറാഷ് റോഡ് മുറിച്ചുകടക്കുന്നതിനിടെ അതിവേഗതയിലെത്തിയ വാഹനം ഇടിക്കുകയായിരുന്നു.രണ്ടു പേരും തല്‍ക്ഷണം മരിച്ചു. കിങ് ഖാലിദ് ആശുപത്രി മോര്‍ച്ചറിയില്‍ സൂക്ഷിച്ചിരുന്ന മൃതദേഹം നജ്‌റാനില്‍ ഖബറടക്കം നടത്തി.
നജ്‌റാന്‍ കെ.എം.സി.സി പ്രവര്‍ത്തകരായ സലീം ഉപ്പള, സത്താര്‍ തച്ചനാട്ടുകര തുടങ്ങിയവരുടെ നേതൃത്വത്തിലാണ് ഇതിനാവശ്യമായ നിയമനടപടികള്‍ പൂര്‍ത്തീകരിച്ചത്. ഫറാഷിന്റെ സഹോദരന്‍ ഫയാസും സുഹൃത്തുക്കളും ഖബറടക്ക ചടങ്ങില്‍ പങ്കെടുക്കുകയും ചെയ്തു.