ഭരണഘടനയുടെ 370-ാം വകുപ്പ് റദ്ദാക്കിയ വിധി രാജ്യത്തിന് അപമാനകരമാണ്... മോദിക്ക് പ്രയാസമുണ്ടാക്കാത്ത വിധികളാണ് സുപ്രീംകോടതിയുടെതെന്ന് വിമര്ശിച്ച് എം എ ബേബി
മോദിക്ക് പ്രയാസമുണ്ടാക്കാത്ത വിധികളാണ് സുപ്രീംകോടതിയുടെതെന്ന് വിമര്ശിച്ച് സിപിഎം പോളിറ്റ് ബ്യൂറോ അംഗം എം എ ബേബി. അദാനിയുമായി ബന്ധപ്പെട്ട കേസ് വന്നപ്പോള് വാദി പ്രതിയാകുന്ന അവസ്ഥയാണ് വന്നതെന്നും ഇതിന്റെ പേരില് തനിക്കെതിരെ കേസെടുത്താലും പ്രശ്നമില്ലെന്നും അദ്ദേഹം പറഞ്ഞു. കണ്ണൂരിലെ കെഎസ്ടിഎ സമ്മേളനത്തില് സംസാരിക്കുകയായിരുന്നു ബേബി.
'ഭരണഘടനയുടെ 370-ാം വകുപ്പ് റദ്ദാക്കിയ വിധി രാജ്യത്തിന് അപമാനകരമാണ്. ഇടയ്ക്ക് ചില കേസുകളില് സുപ്രീംകോടതി നിഷ്പക്ഷമായ വിധി പ്രഖ്യാപിക്കും. അതും മോദിക്ക് പ്രശ്നം ഉണ്ടാക്കാത്ത വിഷയത്തിലാണ്.'- എം എ ബേബി പറഞ്ഞു. കേരളത്തിന് കേന്ദ്ര ബഡ്ജറ്റില് ഒന്നുമില്ലെന്നും എല്ലാവരെയും നിരാശപ്പെടുത്തുന്നതാണ് ബഡ്ജറ്റെന്നും എം എ ബേബി കഴിഞ്ഞ ദിവസം പറഞ്ഞിരുന്നു.
എന്നാല് ബഡ്ജറ്റില് അദാനിക്കും അംബാനിക്കും പോലുള്ളവര്ക്ക് നിരാശയുണ്ടാവില്ലെന്നും അദ്ദേഹം കൂട്ടിച്ചേര്ത്തു. 'അംബാനിക്കും അദാനിക്കും വേണ്ടി കരാര് പണി എടുത്ത് നല്കാനായി കേന്ദ്ര ഗവണ്മെന്റ് നില്ക്കുകയാണ്. ജനങ്ങളെ പറ്റിക്കാന് നരേന്ദ്ര മോദി ചെയ്തു വന്ന കാര്യങ്ങള് ഈ ബഡ്ജറ്റിലും കാണാം. സാമ്പത്തിക അവലോകന റിപ്പോര്ട്ട് അവതരിപ്പിച്ചിട്ടില്ല. സ്ഥിതി വിവരക്കണക്കുകള് നിര്ത്തി വച്ചിരിക്കുകയാണ്.'- അദ്ദേഹം വ്യക്തമാക്കി.
https://www.facebook.com/Malayalivartha
