സമവായത്തിലൂടെ പ്രശ്‌നം പരിഹരിക്കണം, യുദ്ധം ഒന്നിനും പരിഹാരമല്ലെന്ന് റഷ്യന്‍ പ്രസിഡന്റ് വ്‌ലാഡിമിര്‍ പുടിനോട് പ്രധാനമന്ത്രി നരേന്ദ്ര മോദി.തീവ്രവാദം എല്ലാ രാജ്യങ്ങള്‍ക്കും ഭീഷണിയാണെന്ന് പ്രധാനമന്ത്രി പറഞ്ഞു. യുദ്ധമായാലും സംഘര്‍ഷങ്ങളായാലും ഭീകരാക്രമണമായാലും ജീവന്‍ നഷ്ടപ്പെടുമ്പോള്‍ വേദനയുണ്ട്. രണ്ട് ദിവസത്തെ സന്ദര്‍ശനത്തിനായി റഷ്യയിലെത്തിയതാണ് മോദി.

'യുദ്ധക്കളത്തില്‍ പരിഹാരങ്ങള്‍ കണ്ടെത്താനാവില്ലെന്ന് പ്രധാനമന്ത്രി മോദി പറഞ്ഞു. സമാധാനത്തിന് സംഭാഷണം വളരെ പ്രധാനമാണ്. ഇന്ത്യ എപ്പോഴും സമാധാനമാണ് ആഗ്രഹിക്കുന്നത്. കാരണം യുദ്ധം ഒന്നിനും ഒരു പരിഹാരമല്ല. ഞാന്‍ സമാധാനം പ്രതീക്ഷിക്കുന്നു. സമാധാനത്തിനായി സഹകരിക്കാന്‍ ഞാന്‍ തയ്യാറാണ്' മോദി പറഞ്ഞു. ലോകത്തിന്റെ മുഴുവന്‍ ശ്രദ്ധയും തന്റെ റഷ്യന്‍ സന്ദര്‍ശനത്തില്‍ കേന്ദ്രീകരിച്ചിരിക്കുകയാണെന്നും 4 മുതല്‍ 5 മണിക്കൂര്‍ വരെ ഞങ്ങള്‍ ഒരുമിച്ച് ഞങ്ങളുടെ പ്രശ്‌നങ്ങള്‍ വിശകലനം ചെയ്‌തെന്നും പ്രധാനമന്ത്രി കൂട്ടിച്ചേര്‍ത്തു.

ഇന്ത്യയെ അടുത്ത സുഹൃത്തായി കാണുന്നതിന് റഷ്യയോട് നരേന്ദ്ര മോദി നന്ദി പറഞ്ഞു. ഇതാദ്യമായാണ് തന്റെ റഷ്യന്‍ യാത്ര ലോകം മുഴുവന്‍ ഉറ്റു നോക്കുന്നത്. ഇന്നലെ യുക്രെയ്ന്‍ വിഷയത്തില്‍ തുറന്ന ചര്‍ച്ച നടന്നു. ഇരു നേതാക്കളും പരസ്പര ബഹുമാനത്തോടെ ഇക്കാര്യത്തിലെ നിലപാട് കേട്ടുവെന്നും മോദി.

''യുക്രെയ്നിലെ യുദ്ധത്തെക്കുറിച്ച് തുറന്ന മനസ്സോടെ ചര്‍ച്ച ചെയ്യാന്‍ കഴിഞ്ഞതില്‍ എനിക്ക് സന്തോഷമുണ്ട്. യുദ്ധത്തെക്കുറിച്ചുള്ള ഇരുവരുടേയും നിലപാടുകള്‍ വളരെ ബഹുമാനത്തോടെയാണ് കേട്ടത്. അത് യുദ്ധമായാലും സംഘര്‍ഷങ്ങളായാലും ഭീകരാക്രമണമായാലും മനുഷ്യത്വത്തില്‍ വിശ്വസിക്കുന്ന എല്ലാവര്‍ക്കും ജീവന്‍ നഷ്ടപ്പെടുമ്പോള്‍ വേദനിക്കുന്നു. നിരപരാധികളായ കുട്ടികള്‍ കൊല്ലപ്പെടുന്നത് കാണുമ്പോള്‍, അത് ഹൃദയഭേദകമാണ്, ആ വേദന വളരെ വലുതും അത്യന്തം ദുഃഖകരവുമാണ്' പുടിനോട് മോദി പറഞ്ഞു.