പ്രധാനമന്ത്രി നരേന്ദ്രമോഡിയുടെ ഭാര്യ യശോദാബെന്‍ അദ്ദേഹത്തിന്റെ പാസ്‌പോര്‍ട്ടുമായി ബന്ധപ്പെട്ട വിവരങ്ങള്‍ കിട്ടുന്നതിനായി വിവരാവകാശരേഖ സമര്‍പ്പിച്ചു. ബുധനാഴ്ച അഹമ്മദാബാദിലെ റീജിയണല്‍ പാസ്‌പോര്‍ട്ട് ഓഫീസിലായിരുന്നു അപേക്ഷ സമര്‍പ്പിച്ചത്.
വിവാഹ സര്‍ട്ടിഫിക്കറ്റ് വെയ്ക്കാന്‍ കഴിയാതിരുന്നതിനെ തുടര്‍ന്ന് കഴിഞ്ഞ നവംബറില്‍ യശോദാബെന്നിന്റെ പാസ്‌പോര്‍ട്ടിനായുള്ള അപേക്ഷ തള്ളിയതിനെ തുടര്‍ന്നാണ് അവര്‍ ഭര്‍ത്താവിന്റെ പാസ്‌പോര്‍ട്ട് വിവരങ്ങള്‍ക്കായി അപേക്ഷ സമര്‍പ്പിച്ചത്. വിദേശത്തുള്ള കുടുംബ സുഹൃത്തുക്കളെ കാണുന്നതിന് വേണ്ടിയിരുന്നു യശോദാബെന്‍ കഴിഞ്ഞ വര്‍ഷം പാസ്‌പോര്‍ട്ടിനായി അപേക്ഷ സമര്‍പ്പിച്ചത്. ആദ്യ പാസ്‌പോര്‍ട്ടിന്റെയും പുതുക്കിയ പാസ്‌പോര്‍ട്ടിന്റെയും ഗുജറാത്ത് മുഖ്യമന്ത്രിയായ ശേഷമുള്ള പാസ്‌പോര്‍ട്ടിന്റെയും കോപ്പികളാണ് ആവശ്യപ്പെട്ടത്.
സഹോദരന്‍ അശോക് മോഡിക്കും മറ്റൊരു ബന്ധുവിനുമൊപ്പമാണ് ഓഫീസില്‍ എത്തിയത്. അപേക്ഷ സമര്‍പ്പിച്ച് 15 മിനിറ്റ് കഴിഞ്ഞപ്പോള്‍ മടങ്ങുകയും ചെയ്തു. നേരത്തേ മോഡി പ്രധാനമന്ത്രിയായതിന് പിന്നാലെ അദ്ദേഹത്തിന്റെ സുരക്ഷയുടെ വിവരങ്ങള്‍ ആവശ്യപ്പെട്ട് യശോദബെന്‍ വിവരാവകാശരേഖ സമര്‍പ്പിച്ചത് വാര്‍ത്തയായിരുന്നു. പ്രധാനമന്ത്രിയുടെ ഭാര്യയെന്ന് അപേക്ഷയില്‍ കാണിക്കുകയും ചെയ്തിരുന്നു. എന്നാല്‍ സുരക്ഷാ കാരണങ്ങളാല്‍ തന്നെ അക്കാര്യം നല്‍കാനാകില്ലെന്നായിരുന്നു ഇതിന് നവംബറില്‍ മെഹ്‌സാന പോലീസ് സൂപ്രണ്ട് നല്‍കിയ മറുപടി.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha