ഒഴുക്കിനെതിരെ നീന്തി വിജയിച്ചവനായിരുന്നു നാട്ടുകാര്ക്കു ലാന്സ് നായിക് ഹനുമന്തപ്പ
ഒഴുക്കിനെതിരെ നീന്തി വിജയിച്ചവനായിരുന്നു നാട്ടുകാര്ക്കു ലാന്സ് നായിക് ഹനുമന്തപ്പ. ബെതടൂര് ഗ്രാമത്തില്നിന്ന് ആറു കിലോമീറ്റര് അകലെ സ്കൂളില് നടന്നുപോയാണു പഠിച്ചത്. മൂന്നു വട്ടം ആര്മി റിക്രൂട്മെന്റില് പരാജയപ്പെട്ടിട്ടും പിന്മാറാതെ നാലാം വട്ടം വിജയിക്കുകയായിരുന്നു.
ആശുപത്രിയില് മരണത്തോടു മല്ലടിച്ച ഹനുമന്തപ്പയ്ക്കു വേണ്ടി ഇന്നലെ രാവിലെവരെ പ്രാര്ഥനയുമായി കഴിഞ്ഞ ഗ്രാമം ഉച്ചയോടെ കണ്ണീരിലാണ്ടു. മുഖ്യമന്ത്രി സിദ്ധരാമയ്യ ഉള്പ്പെടെ കര്ണാടക മുഴുവന് ധീരജവാനു പ്രണാമം അര്പ്പിച്ചു. സിയാച്ചിന് ദുരന്തത്തില് മറ്റ് ഒന്പതു പേര്ക്കൊപ്പം ഹനുമന്തപ്പയെയും നഷ്ടപ്പെട്ടെന്നാണു വീട്ടുകാരും നാട്ടുകാരും ആദ്യം കരുതിയിരുന്നത്. ആറു ദിവസം കൊടും തണുപ്പിലും ഹനുമന്തപ്പ മാത്രം മരണത്തെ അതിജീവിച്ചതറിഞ്ഞപ്പോള് പ്രതീക്ഷകള് തിരതല്ലി.
തങ്ങള്ക്കെല്ലാവര്ക്കും ഇതു പുനര്ജന്മമാണെന്നു ഭാര്യ മഹാദേവി ആശ്വാസത്തോടെ പറഞ്ഞു. മഹാദേവി അടക്കം കുടുംബത്തിലെ ആറു പേര് പിന്നാലെ ഡല്ഹിയിലെത്തുകയും ചെയ്തു. രണ്ടു ദിവസമായി ഗ്രാമം മുഴുവന് പ്രാര്ഥനയിലായിരുന്നു. ഇരട്ട നഗരമായ ഹുബ്ബള്ളി ധാര്വാഡിലെ സ്കൂള് വിദ്യാര്ഥികളും സാമൂഹിക രാഷ്ട്രീയ പ്രവര്ത്തകരും എന്നു വേണ്ട, നാടു മുഴുവന് ഒരു ജീവനുവേണ്ടി മനമുരുകി കേണു.
തന്റെ നാട്ടില് നിന്നുള്ള ധീരജവാന്റെ വേര്പാടിന്റെ വേദന വിവരിക്കാവുന്നതിനും അപ്പുറമാണെന്നു മുന് മുഖ്യമന്ത്രിയും പ്രതിപക്ഷ നേതാവുമായ ജഗദീഷ് ഷെട്ടര് പറഞ്ഞു. ഇത്രത്തോളം അതിജീവിച്ച സ്ഥിതിക്ക് ഹനുമന്തപ്പ ജീവിതത്തിലേക്കു തിരിച്ചെത്തുമെന്നാണു കരുതിയതെന്ന് ഉറ്റസുഹൃത്ത് മഞ്ജുനാഥ് പറഞ്ഞു. രാജ്യത്തിനുവേണ്ടിയുള്ള വീരമൃത്യുവില് അഭിമാനമുണ്ടെന്ന് മറ്റൊരു സുഹൃത്ത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha