ജൂണ്‍ 25ന് സൗത്ത് കൊല്‍ക്കത്ത ലോ കോളജില്‍ നടന്ന ബലാത്സംഗ കേസില്‍ പൊലീസ് കുറ്റപത്രം സമര്‍പ്പിച്ചു. മുഖ്യപ്രതി മനോജിത് മിശ്ര വിദ്യാര്‍ഥിനിയുടെ ഒന്നിലധികം വിഡിയോകള്‍ ചിത്രീകരിച്ചെന്നും അതുപയോഗിച്ച് ഭീഷണിപ്പെടുത്തുകയായിരുന്നെന്നും 650 പേജുള്ള കുറ്റപത്രത്തില്‍ പറയുന്നു. പെണ്‍കുട്ടിയുടെ വൈദ്യപരിശോധനയില്‍ ബലാത്സംഗം സ്ഥിരീകരിച്ചിട്ടുണ്ടെന്നും പ്രതിയുടെ ഡിഎന്‍എ, ഫൊറന്‍സിക് സാംപിളുകളുമായി പൊരുത്തപ്പെടുന്നുണ്ടെന്നും പൊലീസ് കണ്ടെത്തിയിട്ടുണ്ട്.

ഒന്നാം വര്‍ഷ വിദ്യാര്‍ഥിനിയായ പെണ്‍കുട്ടിയെ കോളജിലെ പൂര്‍വ്വ വിദ്യാര്‍ഥികളായ മനോജിത് മിശ്ര, സൈബ് അഹമ്മദ്, പ്രമിത് മുഖര്‍ജി എന്നിവര്‍ ചേര്‍ന്ന് കൂട്ടബലാത്സംഗം ചെയ്‌തെന്നാണ് കേസ്. കേസില്‍ നാല് പ്രതികള്‍ക്കെതിരെയാണ് കുറ്റപത്രം സമര്‍പ്പിച്ചിരിക്കുന്നത്. പൂര്‍വ വിദ്യാര്‍ഥികളായ മൂന്നു പേര്‍ക്ക് പുറമെ സുരക്ഷാ ജീവനക്കാരനും കേസില്‍ പ്രതിയാണ്. പ്രതികള്‍ ചേര്‍ന്നു പെണ്‍കുട്ടിയെ പീ!!ഡിപ്പിക്കുന്നതിന്റെ സിസിടിവി ദൃശ്യം അന്വേഷണത്തിനിടെ പൊലീസ് കണ്ടെടുത്തിരുന്നു. പ്രതികള്‍ പെണ്‍കുട്ടിയെ ബന്ദിയാക്കി വലിച്ചിഴയ്ക്കുന്നതും സിസിടിവി ദൃശ്യങ്ങളില്‍ വ്യക്തമാണ്.

പ്രതികളുടെ മൊബൈല്‍ ഫോണുകളില്‍നിന്ന് ഇരയെ ലൈംഗിക പീഡനത്തിന് ഇരയാക്കുന്ന വിഡിയോകള്‍ കണ്ടെടുത്തിരുന്നു. ചുമരില്‍ സ്ഥാപിച്ചിരുന്ന എക്‌സ്‌ഹോസ്റ്റ് ഫാനിന്റെ ദ്വാരത്തിലൂടെയാണ് പ്രതികള്‍ ഈ വിഡിയോകള്‍ ചിത്രീകരിച്ചതെന്നും കുറ്റപത്രത്തില്‍ പറയുന്നു. വിഡിയോയിലുള്ള ശബ്ദവും പ്രതികളുടെ ശബ്ദവും ഒന്നാണെന്ന് തിരിച്ചറിഞ്ഞിട്ടുണ്ടെന്നും കുറ്റകൃത്യം നടന്ന സ്ഥലത്ത് നിന്ന് പ്രതിയുടെ മൊബൈല്‍ ലൊക്കേഷന്‍ കണ്ടെത്തിയിട്ടുണ്ടെന്നും കുറ്റപത്രത്തില്‍ പറയുന്നു.

പെണ്‍കുട്ടിയെ പീഡിപ്പിക്കുന്നത് അറിഞ്ഞിട്ടും സുരക്ഷാ ജീവനക്കാരന്‍ ഗാര്‍ഡ് റൂം പൂട്ടിയെന്നും മറ്റാരെയും അറിയിച്ചില്ലെന്നും കുറ്റപത്രത്തില്‍ പറയുന്നു. ഇതോടെയാണ് കേസില്‍ ഇയാളും പ്രതി ചേര്‍ക്കപ്പെട്ടത്. മുഖ്യപ്രതിയും തൃണമൂല്‍ കോണ്‍ഗ്രസ് മുന്‍ വിദ്യാര്‍ഥി നേതാവുമായ മനോജിത് മിശ്രയെ അറസ്റ്റ് ചെയ്യപ്പെട്ടതിന് പിന്നാലെ പാര്‍ട്ടിയില്‍ നിന്ന് പുറത്താക്കിയിരുന്നു. മുഖ്യപ്രതി മനോജിത് കോളജിലെ താത്കാലിക ജീവനക്കാരന്‍ കൂടിയായിരുന്നു.