വര്‍ഷങ്ങള്‍ക്ക് മുന്‍പ് കാണാതായ ഭര്‍ത്താവിനെ മറ്റൊരു യുവതിക്കൊപ്പം ഇന്‍സ്റ്റഗ്രാം വീഡിയോയില്‍ കണ്ട് ഭാര്യ ഞെട്ടി. ഉത്തര്‍പ്രദേശിലാണ് സംഭവം നടന്നത്. ഭാര്യയുടെ പരാതിയില്‍ ഹര്‍ദോയ് സ്വദേശി ജിതേന്ദ്ര കുമാറിനെ പൊലീസ് കസ്റ്റഡിയിലെടുത്തു. 2018ലാണ് ജിതേന്ദ്രയെ കാണാതായത്. 2017ലായിരുന്നു ഷീലുവിന്റെയും ജിതേന്ദ്രന്റെയും വിവാഹം നടന്നത്.

ഇരുവരും തമ്മില്‍ സ്ത്രീധനത്തെച്ചൊല്ലി തര്‍ക്കം പതിവായിരുന്നു. തുടര്‍ന്ന് ഷീലുവിന്റെ കുടുംബം പൊലീസില്‍ പരാതി നല്‍കി. ഇതിന് പിന്നാലെയാണ് ജിതേന്ദ്രയെ കാണാതാവുന്നത്. ഇയാളുടെ പിതാവിന്റെ പരാതിയിലാണ് പൊലീസ് കേസെടുത്തത്. ഷീലുവിന്റെ കുടുംബമാണ് ജിതേന്ദ്രയെ കൊലപ്പെടുത്തിയതെന്ന് പിതാവും ബന്ധുക്കളും ആരോപിച്ചിരുന്നു.

ഇന്‍സ്റ്റഗ്രാമില്‍ റീല്‍ കാണുന്നതിനിടെയാണ് ഭര്‍ത്താവിന്റെയും മറ്റൊരു യുവതിയുടെയും വീഡിയോ ഷീലു കണ്ടത്. ഉടന്‍ പൊലീസില്‍ വിവരം അറിയിക്കുകയായിരുന്നു. ലുധിയാനയിലേക്ക് പോയ ജിതേന്ദ്ര അവിടെ മറ്റൊരു യുവതിയെ വിവാഹം കഴിക്കുകയായിരുന്നുവെന്ന് പൊലീസ് പറഞ്ഞു. സ്ത്രീധന നിരോധന നിയമപ്രകാരവും തട്ടിപ്പിനും ഇയാള്‍ക്കെതിരെ പൊലീസ് കേസെടുത്തിട്ടുണ്ട്.