പാര്‍ട്ടി അദ്ധ്യക്ഷനും പിതാവുമായ കെ ചന്ദ്രശേഖര റാവു (കെസിആര്‍) പാര്‍ട്ടി വിരുദ്ധ പ്രവര്‍ത്തനങ്ങളുടെ പേരില്‍ മകള്‍ കെ കവിതയെ ഇന്നലെ സസ്‌പെന്‍ഡ് ചെയ്തിരുന്നു. ഇതിന് പിന്നാലെയാണ് പാര്‍ട്ടിയില്‍ നിന്ന് രാജിവയ്ക്കുന്നതായി കവിത അറിയിച്ചു. എംഎല്‍സി സ്ഥാനവും കവിത രാജിവച്ചു. ബന്ധുവായ ടി ഹരീഷ് റാവു ഉള്‍പ്പെടെയുള്ള മുതിര്‍ന്ന നേതാക്കള്‍ക്കെതിരെ നടത്തിയ ചില പരാമര്‍ശങ്ങള്‍ക്ക് പിന്നാലെയായിരുന്നു കവിതയെ പാര്‍ട്ടിയില്‍ നിന്ന് സസ്‌പെന്‍ഡ് ചെയ്തത്.

പാര്‍ട്ടി വിരുദ്ധ പരാമര്‍ശങ്ങളുടെ പേരിലാണ് കവിതയ്‌ക്കെതിരെ നടപടി സ്വീകരിച്ചതെന്ന് ബി.ആര്‍.എസ് നേതാക്കളായ ടി രവീന്ദര്‍ റാവുവും സോമ ഭരത് കുമാറും അറിയിച്ചു. ബിആര്‍.എസിനെ തകര്‍ക്കുന്ന തരത്തിലുള്ള കവിതയുടെ പെരുമാറ്റവും പാര്‍ട്ടി വിരുദ്ധ പ്രവര്‍ത്തനങ്ങളും നേതൃത്വം ഗൗരവമായി കാണുന്നു. സസ്‌പെന്‍ഷന്‍ വാര്‍ത്തയ്ക്ക് പിന്നാലെ കവിതയുടെ അനുയായികള്‍ പ്രതിഷേധ പ്രകടനവും നടത്തിയിരുന്നു.

കെസിആറിന്റെ ആരോഗ്യവും പാര്‍ട്ടി പ്രവര്‍ത്തകരെയും ശ്രദ്ധിക്കണമെന്ന് ഞാന്‍ രാം അണ്ണയോട് അഭ്യര്‍ത്ഥിക്കുന്നുവെന്നും അവര്‍ സഹോദരനും മുന്‍ മന്ത്രിയുമായ കെ ടി രാമറാവുവിനെ അഭിസംബോധന ചെയ്തുകൊണ്ട് പറഞ്ഞു. കെസിആറാണ് തന്റെ പ്രചോദനമെന്നും ഇന്ന് നടന്ന വാര്‍ത്താസമ്മേളനത്തില്‍ കവിത പറഞ്ഞു. തെലങ്കാനയിലെ ദളിതര്‍ക്കും പിന്നോക്ക വിഭാഗങ്ങള്‍ക്കും നിതീ ഉറപ്പാക്കിയതിനും കവിത കെസിആറിനെ പ്രശംസിച്ചു. 'പാര്‍ട്ടിക്കുളളിലെ ഗൂഢാലോചനകള്‍ തന്നെ ലക്ഷ്യം വച്ചിരിക്കുകയാണെന്നും അവര്‍ ആരോപിച്ചു. പാര്‍ട്ടി ഓഫീസിനുളളില്‍ എനിക്കെതിരായ പ്രചാരണം നടക്കുന്നുണ്ടെന്ന് സഹോദരനോട് പറഞ്ഞിരുന്നു. എന്നാല്‍ വര്‍ക്കിംഗ് പ്രസിഡന്റായ സഹോദരനില്‍ നിന്നുപോലും ഒരു പ്രതികരണവും ലഭിച്ചില്ല' കവിത കൂട്ടിച്ചേര്‍ത്തു.

കഴിഞ്ഞ കുറേനാളായി കവിത നേതാക്കള്‍ക്കെതിരെ പരസ്യ വിമര്‍ശനം നടത്തുന്നത് പതിവായിരുന്നു. തെലങ്കാന മുഖ്യമന്ത്രി രേവന്ത് റെഡ്ഡിക്കൊപ്പം ചേര്‍ന്ന് മുന്‍മന്ത്രി ടി ഹരീഷ് റാവുവും രാജ്യസഭ മുന്‍ എംപി സന്തോഷ് കുമാറും ചന്ദ്രശേഖര റാവുവിന്റെ പ്രതിച്ഛായ ഇല്ലാതാക്കാന്‍ ശ്രമിക്കുന്നുവെന്നായിരുന്നു കവിതയുടെ ആരോപണം. കെസിആര്‍ ആരോപണവിധേയനായ കലേശ്വരം പദ്ധതി ക്രമക്കേട് കേസിന്റെ അന്വേഷണം കോണ്‍ഗ്രസ് സര്‍ക്കാര്‍ സിബിഐക്ക് കൈമാറിയതിനു പിന്നാലെയായിരുന്നു ഇത്. പിതാവിനെ മറ്റുള്ളവര്‍ കബളിപ്പിക്കുകയാണെന്ന തരത്തിലായിരുന്നു കവിതയുടെ ആരോപണമെങ്കിലും അത് കെസിആറിനു തന്നെ തലവേദനയായി.