പാട്ന സ്ഫോടന പരമ്പരയ്ക്കു പിന്നില് ഇന്ത്യന് മുജാഹിദ്ദീന്; ഭട്കലിനെ കസ്റ്റഡിയില് വേണമെന്ന് എന്.ഐ.എ
പാട്ന സ്ഫോടന പരമ്പരയ്ക്കു പിന്നില് ഇന്ത്യന് മുജാഹിദ്ദീനെന്ന് റിപ്പോര്ട്ട്. ഇന്ത്യന് മുജാഹിദീന് സ്ഥാപകനായ യാസിന് ഭട്കലിന് സ്ഫോടനത്തില് പങ്കുണ്ടെന്നാണ് കരുതുന്നത്. ഇയാളെ കസ്റ്റഡിയില് വേണമെന്ന് ആവശ്യപ്പെട്ട് എന്.ഐ.എ കോടതിയെ സമീപിച്ചു. കഴിഞ്ഞ മാസമാണ് യാസിന് ഭട്കല് പിടിയിലാവുന്നത്. മാസങ്ങള്ക്ക് മുമ്പുതന്നെ സ്ഫോടനങ്ങള്ക്ക് പദ്ധതിയിട്ടിരിക്കാം എന്നാണ് എന്.ഐ.എ കരുതുന്നത്.
ബിഹാര് കേന്ദ്രമാക്കി പ്രവര്ത്തിക്കുന്ന ഇന്ത്യന് മുജാഹിദ്ദീന് പ്രവര്ത്തകനായ തഹ്സീന് അക്തര് ആണ് സ്ഫോടനങ്ങള്ക്കു പിന്നിലെന്നാണ് പോലീസിന് ലഭിച്ചിരിക്കുന്ന വിവരം. പിടിയിലായ രണ്ടുപേരില് നിന്ന് ലഭിച്ച മൊഴിയില് നിന്നാണ് പോലീസിന് ഇതു സംബന്ധിച്ച് സൂചന ലഭിച്ചത്.
സംഭവത്തിന്റെ പേരില് അറസ്റ്റിലായ ഒരാളുടെ റാഞ്ചിയിലെ വീട്ടില് നിന്ന് തീവ്രവാദ സംഘടനയുടെ ലഘുലേഖകളും പ്രഷര് കുക്കര് ബോംബുകളും ഡിറ്റണേറ്ററുകളും കണ്ടെടുത്തു. ഇംതിയാസ് അന്സാരിയുടെ വീട്ടില് നിന്നാണ് ഇവ കണ്ടെടുത്തത്. ഇയാള്ക്ക് സംഭവത്തിന്റെ ഗൂഢാലോചനയില് ഉള്പ്പെടെ പങ്കുണ്ടെന്നാണ് അന്വേഷണ സംഘത്തിന്റെ പ്രാഥമിക നിഗമനം.
തഹ്സീന് അക്തര് തീവ്രവാദ പ്രവര്ത്തനത്തിനായി ആളുകളെ റിക്രൂട്ട് ചെയ്തിരുന്ന ഗ്രാമത്തിലെ താമസക്കാരനാണ് ഇംതിയാസ് അന്സാരി. ഇയാള്ക്കു പുറമേ അയ്നുള്, അക്തര്, കാലീം എന്നിവരുള്പ്പെടെ 13 പേരെ പോലീസ് കസ്റ്റഡിയിലെടുത്തിട്ടുണ്ട്.
പ്രതികളില് നിന്ന് ലഭിച്ച വിവരങ്ങളുടെ അടിസ്ഥാനത്തില് പോലീസ് പാട്നയിലും റാഞ്ചിയിലും റെയ്ഡുകള് നടത്തി. സ്ഫോടനങ്ങളില് ആറു പേര് കൊല്ലപ്പെടുകയും നൂറിലേറെ പേര്ക്ക് പരിക്കേല്ക്കുകയും ചെയ്തിരുന്നു.
https://www.facebook.com/Malayalivartha