കണ്ണൂർ അഴീക്കോട് പുന്നക്കപാറയിൽ പടക്കം പൊട്ടിക്കുന്നതിനിടെയുണ്ടായ അപകടത്തിൽ എട്ട് വയസുകാരൻ മരിച്ചു. പുന്നക്കപാറ സ്വദേശി അമൻ ആണ് മരണപ്പെട്ടത്. പുതിയ മന്ത്രിസഭയുടെ സത്യപ്രതിജ്ഞയോടനുബന്ധിച്ച് നടത്തിയ ആഹ്ലാദ പ്രകടനങ്ങൾക്കിടെയായിരുന്നു അപകടം. പുതിയ മന്ത്രിസഭയുടെ സത്യപ്രതിജ്ഞയുമായി ബന്ധപ്പെട്ട് പ്രദേശത്ത് ആഹ്ലാദ പ്രകടനങ്ങൾ നടന്നിരുന്നു. ഇതിന് പിന്നാലെ അമനും സുഹൃത്തുക്കളും ചേർന്ന് ഈ ഭാഗത്തുനിന്ന് പടക്കം പൊട്ടിക്കുകയായിരുന്നു. ഇതിനിടെ പടക്കം അപ്രതീക്ഷിതമായി പൊട്ടിത്തെറിക്കുകയായിരുന്നുവെന്നാണ് വിവരം.കുട്ടിയുടെ കഴുത്തിനേറ്റ ഗുരുതരമായ പരിക്കാണ് മരണത്തിന് കാരണമായത്.

അപകടം നടന്നയുടൻ അമനെ കണ്ണൂരിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. അപകടത്തിൽ കൂടെയുണ്ടായിരുന്ന മറ്റ് മൂന്ന് കുട്ടികൾക്കും പരിക്കേറ്റിട്ടുണ്ട്. എന്നാൽ ഇവരുടെ പരിക്ക് നിസാരമാണ്. സംഭവത്തിൽ പോലീസ് അന്വേഷണം ആരംഭിച്ചിട്ടുണ്ട്.