ഗൗതം അദാനി, അനന്തരവന്‍ സാഗര്‍ അദാനി എന്നിവര്‍ക്കെതിരെയുള്ള ക്രിമിനല്‍ കുറ്റപത്രങ്ങള്‍ പൂര്‍ണമായി ഒഴിവാക്കി യുഎസ് നീതിന്യായ വകുപ്പ്. ന്യൂയോര്‍ക്ക് കോടതിയില്‍ നിലനിന്നിരുന്ന തട്ടിപ്പ് കേസുകളാണ് യുഎസ് പ്രോസിക്യൂട്ടര്‍മാര്‍മാര്‍ റദ്ദാക്കിയത്. കുറ്റാരോപണങ്ങള്‍ നിലനിര്‍ത്താന്‍ ആവശ്യമായ തെളിവുകളില്ലെന്ന് വ്യക്തമാക്കിയാണ് നീക്കം. ഇതോടെ അദാനി ഗ്രൂപ്പിനെതിരെ യുഎസില്‍ നിലനിന്നിരുന്ന എല്ലാ നിയമനടപടികളും അവസാനിച്ചു.

ഇന്ത്യയിലെ സൗരോര്‍ജ പദ്ധതികളുമായി ബന്ധപ്പെട്ട് നിക്ഷേപകരെ വഞ്ചിച്ചുവെന്ന സിവില്‍ കേസുകള്‍ കഴിഞ്ഞ ആഴ്ചയാണ് യുഎസ് സെക്യൂരിറ്റീസ് ആന്റ് എക്‌സ്‌ചേഞ്ച് കമ്മീഷന്‍ ഒത്തുതീര്‍പ്പാക്കിയത്. ഗൗതം അദാനി ആറ് മില്യണ്‍ ഡോളറും സാഗര്‍ അദാനി 12 മില്യണ്‍ ഡോളറും പിഴയൊടുക്കാന്‍ സമ്മതിച്ചതോടെയാണ് കേസ് തീര്‍ന്നത്. അതേസമയം, കുറ്റം സമ്മതിക്കാനോ നിഷേധിക്കാനോ അവര്‍ തയ്യാറായില്ല.

2024 ന്റെ അവസാനത്തിലാണ് അദാനി ഗ്രൂപ് ഇന്ത്യന്‍ ഉദ്യോഗസ്ഥര്‍ക്ക് കൈക്കൂലി നല്‍കി സൗരോര്‍ജ്ജ കരാറുകള്‍ സ്വന്തമാക്കിയെന്നും ഇത് യുഎസ് നിക്ഷേപകരില്‍ നിന്ന് മറച്ചുവച്ചെന്നും ആരോപിച്ച് യുഎസ് പ്രോസിക്യൂഷന്‍ രംഗത്തെത്തിയത്. എന്നാല്‍, ഈ കേസിന് യുഎസുമായി നേരിട്ട് ബന്ധമില്ലെന്നും കുറ്റാരോപണങ്ങള്‍ തെളിയിക്കാന്‍ ആവശ്യമായ തെളിവുകള്‍ ഇല്ലെന്നും പ്രോസിക്യൂട്ടര്‍മാര്‍ സമ്മതിക്കുകയായിരുന്നു.

ഇതിനുപിന്നാലെ, യുഎസ് ട്രഷറി വകുപ്പിന്റെ ഭാഗമായ ഓഫീസ് ഓഫ് ഫോറിന്‍ അസെറ്റ്‌സ് കണ്‍ട്രോളിന്റെ ഉപരോധം ലംഘിച്ച് ഇറാനില്‍ നിന്ന് എല്‍പിജി ഇറക്കുമതി ചെയ്തതുമായി ബന്ധപ്പെട്ട കേസും തിങ്കളാഴ്ച ഒത്തുതീര്‍പ്പായി. കേസില്‍ 27.5 കോടി രൂപയാണ് അദാനി ഗ്രൂപ് പിഴയൊടുക്കാമെന്ന് സമ്മതിച്ചത്.