കൊലപാതക കേസില്‍ പരോളിറങ്ങി മുങ്ങിയ നടന്‍ കൂടിയായ പ്രതിയെ വര്‍ഷങ്ങള്‍ക്കു ശേഷം പിടികൂടി പൊലീസ്. ഹേമന്ത് വൈഷ്ണവാണ് 12 വര്‍ഷത്തിനുശേഷം പിടിയിലായത്. ഒളിവിലായിരുന്ന കാലത്ത് പ്രതി സിനിമകളിലും അഭിനയിച്ചതായി പൊലീസ് പറഞ്ഞു.

അമിതാഭ് ബച്ചന്‍, ആമിര്‍ ഖാന്‍, രണ്‍വീര്‍ സിങ്, സാറാ അലി ഖാന്‍ എന്നിവരോടൊപ്പം ബോളിവുഡ് സിനിമകളിലും വെബ് സീരീസുകളിലും ഹേമന്ത് അഭിനയിച്ചിട്ടുണ്ട്. മലയാള സിനിമയിലും അഭിനയിച്ചു. 2008 ഓഗസ്റ്റ് 27 നാണ് നാനോ യശ്വന്ത് കാംബ്ലെ എന്ന യുവാവിനെ കൊലപ്പെടുത്തിയ കേസില്‍ ഹേമന്തും സഹോദരന്‍ സച്ചിനും ഉള്‍പ്പെടെ അഞ്ചുപേര്‍ ശിക്ഷിക്കപ്പെട്ടത്. 2005 ജൂണ്‍ 15നായിരുന്നു കൊലപാതകം. ഭൂമി തര്‍ക്കത്തെച്ചൊല്ലി രണ്ട് സംഘങ്ങള്‍ ഏറ്റുമുട്ടുന്നതിനിടെയാണ് നാനോ യശ്വന്ത് കാംബ്ലെ കൊല്ലപ്പെട്ടത്. എല്ലാ പ്രതികള്‍ക്കും ജീവപര്യന്തം തടവ് ശിക്ഷ വിധിച്ചു.

ആറ് വര്‍ഷത്തെ തടവിന് ശേഷം 2014 ജൂലൈ 25ന് ഗുജറാത്ത് ഹൈക്കോടതി ഹേമന്തിന് 30 ദിവസത്തെ പരോള്‍ അനുവദിച്ചു. പരോളിലിറങ്ങിയ ഹേമന്ത് ഒളിവില്‍പോയി. പൊലീസ് ഇയാളെ പിടികിട്ടാപ്പുള്ളിയായി പ്രഖ്യാപിച്ചു. ഒളിവില്‍ കഴിയുന്നതിനിടെ ഇയാള്‍ സിനിമയില്‍ സജീവമായി. 2015 വരെ ഗുജറാത്തിലെ പത്താന്‍ ജില്ലയില്‍ ഒളിവില്‍ കഴിഞ്ഞു. പിന്നീട് ട്വിങ്കിള്‍ മുകുന്ദ് ദവേ എന്ന പേര് മാറ്റി അഹമ്മദാബാദിലേക്ക് താമസം മാറി. ഇതിനിടെ നാടകങ്ങളിലും അഭിനയിക്കാന്‍ തുടങ്ങി. 2017ല്‍ മുംബൈയില്‍ എത്തി ബോളിവുഡില്‍ സഹനടനായി ചെറിയ വേഷങ്ങള്‍ ചെയ്തു.

കൂടുംബവുമായുള്ള ബന്ധം അവസാനിപ്പിച്ചു. സമൂഹമാധ്യമങ്ങളില്‍ അക്കൗണ്ട് ഉണ്ടായിരുന്നില്ല. ഹോളിവുഡ് സിനിമകളിലും ഗുജറാത്തി സിനിമകളിലും വെബ് സീരീസുകളിലും സീരിയലുകളിലും നാടകങ്ങളിലും ഇയാള്‍ അഭിനയിച്ചു. സിനിമാ മേഖലയില്‍ 'സ്പന്ദന്‍ മോദി' എന്ന പേരിലാണ് അറിയപ്പെട്ടിരുന്നത്. താന്‍ സുരക്ഷിതനാണെന്ന വിശ്വാസത്തില്‍ 2025ല്‍ ഹേമന്ത് അഹമ്മദാബാദില്‍ താമസത്തിനായി മടങ്ങിയെത്തി. ഹേമന്തിനെ തിരിച്ചറിഞ്ഞ ഒരാള്‍ പൊലീസില്‍ വിവരമറിച്ചതിനെ തുടര്‍ന്നാണ് അറസ്റ്റു ചെയ്തത്.