20 തൃണമൂല് എംപിമാര് എന്ഡിഎയിലേക്ക്
തൃണമൂലിന്റെ 28 ലോക്സഭാ എംപിമാരില് 20 പേര് എന്ഡിഎ സഖ്യത്തില് ചേരാന് ഒരുങ്ങുന്നതായി വിവരം. ജനവിധി മാനിച്ച് തങ്ങളുടെ ഭാവി രാഷ്ട്രീയം എന്ഡിഎയ്ക്കൊപ്പമായിരിക്കുമെന്ന് പാര്ട്ടി ചീഫ് വിപ്പ് സ്ഥാനത്തുനിന്ന് നീക്കിയതില് അസംതൃപ്തയായ മുതിര്ന്ന നേതാവ് കാകൊളി ഘോഷ് ദസ്തിദാര് വ്യക്തമാക്കി.
താനടക്കം 20 തൃണമൂല് എംപിമാര് എന്ഡിഎയുടെ ഭാഗമാകാനുള്ള തങ്ങളുടെ താല്പര്യം ഔദ്യോഗികമായി അറിയിച്ചുകൊണ്ട് സ്പീക്കര് ഓം ബിര്ളയ്ക്ക് കത്തയക്കാന് തീരുമാനിച്ചതായി ദസ്തിദാര് മാദ്ധ്യമങ്ങളോട് പ്രതികരിച്ചു. ശിവസേനയിലെ പിളര്പ്പിന് സമാനമായ സംഭവങ്ങളാണ് നിലവില് പശ്ചിമ ബംഗാളിലും നടക്കുന്നത്. സംസ്ഥാനത്ത് പുറത്താക്കപ്പെട്ട വിമത നേതാവ് ഋതബ്രത ബാനര്ജിയുടെ നേതൃത്വത്തില് 58 എംഎല്എമാര് പ്രത്യേക ബ്ലോക്ക് രൂപീകരിക്കുകയും തങ്ങളാണ് യഥാര്ത്ഥ തൃണമൂല് എന്ന് അവകാശപ്പെടുകയും ചെയ്തിട്ടുണ്ട്.
ലോക്സഭയിലെ തൃണമൂല് ചീഫ് വിപ്പ് സ്ഥാനത്തുനിന്ന് ദസ്തിദാറെ മാറ്റി കല്യാണ് ബാനര്ജിയെ നിയമിച്ചതു മുതലാണ് അതൃപ്തി പരസ്യമായത്. ഇതിന് പിന്നാലെ ബാരാസത് എംപിയായ ദസ്തിദാര് പാര്ട്ടി പദവികള് രാജിവയ്ക്കുകയും, രാഷ്ട്രീയ കണ്സള്ട്ടന്സി കമ്പനിയായ ഐപാക്കിനെ പാര്ട്ടി കാര്യങ്ങള് ഏല്പ്പിച്ച തീരുമാനത്തെ രൂക്ഷമായി വിമര്ശിക്കുകയും ചെയ്തിരുന്നു.
നിയമസഭാ തെരഞ്ഞെടുപ്പ് തോല്വിക്ക് പിന്നാലെ ബംഗാളില് തൃണമൂലിന്റെ അടിത്തറ ഇളകുന്ന കാഴ്ചയാണ് കാണുന്നത്. പാര്ട്ടിയിലെ രണ്ടാമനായ അഭിഷേക് ബാനര്ജി അടക്കമുള്ള നേതാക്കള്ക്കെതിരെ ജനരോഷം ശക്തമാണ്. രണ്ടാം നിര നേതാക്കളും നൂറോളം കൗണ്സിലര്മാരും ഇതിനകം പാര്ട്ടി വിട്ടുകഴിഞ്ഞു. മുന്പൊക്കെ ബഹുമാനത്തോടെ 'ദീദി എന്ന് മാത്രം വിളിച്ചിരുന്ന മമത ബാനര്ജിയെ, ഇപ്പോള് അണികള് പേരെടുത്ത് വിളിക്കാന് തുടങ്ങിയത് പാര്ട്ടിയിലുണ്ടായ അധികാരക്ഷയത്തിന്റെ തെളിവായാണ് രാഷ്ട്രീയ നിരീക്ഷകര് വിലയിരുത്തുന്നത്.
https://www.facebook.com/Malayalivartha
