രാജ്യത്ത് കഫ് സിറപ്പുകളുടെ സുരക്ഷിത ഉപയോഗവും പൊതുജനങ്ങളുടെ ആരോഗ്യവും ലക്ഷ്യമിട്ട് സിറപ്പ് വില്‍പ്പനയില്‍ നിയന്ത്രണങ്ങള്‍ കടുപ്പിച്ച് കേന്ദ്ര ആരോഗ്യ മന്ത്രാലയം. ജനസംഖ്യ കുറഞ്ഞ ഗ്രാമങ്ങളില്‍ ലൈസന്‍സ് ഇല്ലാതെ സിറപ്പുകള്‍ വില്‍ക്കാനുള്ള ഇളവ് റദ്ദാക്കിയെന്ന് മന്ത്രാലയം ഗസറ്റ് വിജ്ഞാപനം ഇറക്കി.

സിറപ്പുകളെ ഷെഡ്യൂള്‍ കെ വിഭാഗത്തില്‍ നിന്നും ഒഴിവാക്കിയെന്ന് വിജ്ഞാപനത്തില്‍ പറയുന്നു. സിറപ്പുകള്‍ ഡോക്ടറുടെ കുറിപ്പടി ഇല്ലാതെ വില്‍ക്കുന്നതിലടക്കം നേരത്തെ കര്‍ശന നിയന്ത്രണം കൊണ്ടുവന്നിരുന്നു. സിറപ്പുകളുടെ ഉല്‍പാദനം വിതരണം എന്നിവയില്‍ കര്‍ശന നിയന്ത്രണങ്ങള്‍ പാലിക്കണമെന്നും കേന്ദ്ര ആരോഗ്യമന്ത്രാലയം പ്രസ്താവനയിലൂടെ അറിയിച്ചു. വ്യാജ കഫ് സിറപ്പുകള്‍ കഴിച്ച് 22 കുട്ടികള്‍ മധ്യപ്രദേശില്‍ മരിച്ചതിന് പിന്നാലെയാണ് കടുത്ത നിയന്ത്രണങ്ങള്‍ കൊണ്ടുവന്നത്.

കഫ് സിറപ്പുകളുടെ സുരക്ഷിത ഉപയോഗവും പൊതുജനങ്ങളുടെ ആരോഗ്യവും ലക്ഷ്യമിട്ടാണ് പുതിയ നടപടി. മെഡിക്കല്‍ സ്‌റ്റോറുകളുടെ കൗണ്ടറില്‍ നിന്ന് സിറപ്പിന്റെ പേര് പറഞ്ഞ് നേരിട്ട് വാങ്ങുന്നത് നിയമവിരുദ്ധമായി കണക്കാകുമെന്നാണ് ഉത്തരവ്. രാജ്യവ്യാപകമായി പരാതികള്‍ ഉയര്‍ന്നതിന്റെ അടിസ്ഥാനത്തിലാണ് സിറപ്പുകള്‍ വാങ്ങുന്നതില്‍ നിയന്ത്രണം ഏര്‍പ്പെടുത്തിയത്.

വ്യാജ സിറപ്പ് കഴിച്ച് മധ്യപ്രദേശിലെയും രാജസ്ഥാനിലെയും നിരവധി കുട്ടികള്‍ മരിച്ചതിന്റെ പശ്ചാത്തലത്തിലാണ് കേന്ദ്ര ആരോഗ്യമന്ത്രാലയം കര്‍ശന നടപടി സ്വീകരിച്ചത്. മധ്യപ്രദേശില്‍ ഇരുപത്തോളം കുട്ടികള്‍ വ്യാജ സിറപ്പുകള്‍ കുടിച്ച് മരിച്ചിരുന്നു. ഈ സംഭവത്തിന്റെ അടിസ്ഥാനത്തില്‍ കുട്ടികള്‍ക്ക് നല്‍കുന്ന സിറപ്പുകള്‍ക്ക് നിലവില്‍ എല്ലാ സംസ്ഥാനങ്ങളിലും ഈ നിയമം നിലനില്‍ക്കുന്നുണ്ട്. 1945 ലെ ഡ്രഗ് റൂള്‍സിലെ അഞ്ചാമത്തെ അമന്‍മെന്റായിട്ടാണ് ഈ ഭേദഗതി ഇപ്പോള്‍ കൊണ്ടുവരുന്നത്. ഇതോടെ, കഫ് സിറപ്പുകള്‍ നേരിട്ട് ഫാര്‍മസികളില്‍നിന്ന് വാങ്ങുന്നതിന് പകരം ഡോക്ടര്‍ നല്‍കുന്ന കുറിപ്പടി ഹാജരാക്കിയാല്‍ മാത്രമേ ലഭിക്കൂ.