എനര്‍ജി ഡ്രിങ്ക് നിരന്തരം കുടിക്കുന്ന ശീലമുള്ള 19കാരന്‍ വൃക്കരോഗം വന്ന് മരിച്ചു, കര്‍ണാടകയിലെ യാദ്ഗിറിലാണ് സംഭവം. ഹുനസഗി താലൂക്കിലെ നാരായണ്‍പുര ഗ്രാമ വാസിയായ ഹനമന്ദ് ദേശായിയാണ് മരിച്ചത്. 19 വയസായിരുന്നു. ഒരു പ്രമുഖ കമ്പനിയുടെ എനര്‍ജി ഡ്രിങ്ക് ആണ് ഹനമന്ദിന്റെ മരണകാരണമെന്ന് ആരോപിച്ച് നാട്ടുകാര്‍ പ്രതിഷേധിച്ചു. നാട്ടുകാര്‍ ഗ്രാമത്തില്‍ ഇത്തരം എനര്‍ജി ഡ്രിങ്ക് വില്‍ക്കുന്നതില്‍ ആശങ്ക അറിയിച്ചു. റോഡില്‍ നൂറുകണക്കിന് എനര്‍ജി ഡ്രിങ്ക് ബോട്ടിലുകള്‍ ഇട്ട് തകര്‍ത്ത ശേഷം നാട്ടുകാര്‍ ഒഴിഞ്ഞ ബോട്ടിലുകള്‍ക്ക് തീയിടുകയും ചെയ്തു.

ഹനമന്ദിന് ദിവസവും നാല് കുപ്പി എനര്‍ജി ഡ്രിങ്ക് കുടിക്കുന്ന ശീലം ഉണ്ടായിരുന്നുവെന്നാണ് നാട്ടുകാര്‍ പറയുന്നത്. വീട്ടുകാര്‍ ഈ ശീലത്തിന് എതിരായിരുന്നു. കഴിഞ്ഞ ദിവസം ആരോഗ്യസ്ഥിതി തീരെ മോശമായതോടെ ഹനമന്ദിനെ ആശുപത്രിയില്‍ പ്രവേശിപ്പിച്ചെങ്കിലും മരിച്ചു.എന്നാല്‍ മരണകാരണം എനര്‍ജി ഡ്രിങ്ക് ആണെന്ന് വ്യക്തമല്ലെന്നാണ് അധികൃതര്‍ അറിയിക്കുന്നത്. ശരിയായ കാരണമറിയാന്‍ പോസ്റ്റ്‌മോര്‍ട്ടത്തിലൂടെയേ സാധിക്കൂ എന്നും ഡോക്ടര്‍മാര്‍ വ്യക്തമാക്കുന്നു.