ചൈനയിലെ കപ്പല്ശാലയില് വന് തീപിടിത്തം; അപകടത്തില് 25 പേര് മരിച്ചു
ചൈനയിലെ കപ്പല്ശാലയില് അറ്റകുറ്റപ്പണിക്കായി നങ്കൂരമിട്ട ചരക്കുകപ്പലില് വന് തീപിടിത്തം. അപകടത്തില് 25 പേര് മരിച്ചു. നിരവധി പേര് കപ്പലിനുള്ളില് കുടുങ്ങിക്കിടക്കുന്നതായും കാണാതായതായും സംശയമുണ്ട്. ഷാന്ഡോങ് പ്രവിശ്യയിലെ ക്വിങ്ദാവോയിലുള്ള ബെഹായ് ഷിപ്പ്ബില്ഡിംഗ് കമ്പനിയുടെ കപ്പല്ശാലയില് വ്യാഴാഴ്ച പ്രാദേശിക സമയം രാവിലെ 11.15ഓടെയാണ് തീപിടിത്തമുണ്ടായത്. 42 പേര് കപ്പലിലുണ്ടായിരുന്നു. അറ്റകുറ്റപ്പണികള്ക്കായി തുറമുഖത്ത് എത്തിയ വിദേശ ചരക്കുകപ്പലിലാണ് തീ പടര്ന്നതെന്ന് ചൈനീസ് ഔദ്യോഗിക വാര്ത്താ ഏജന്സിയായ സിന്ഹുവ റിപ്പോര്ട്ട് ചെയ്തു.
ലൈബീരിയന് പതാകയ്ക്ക് കീഴില് സര്വീസ് നടത്തുന്ന ഏകദേശം 190 മീറ്റര് നീളമുള്ള 'ഓഷ്യന് മെലഡി' എന്ന ബള്ക്ക് കാരിയറാണ് അപകടത്തില്പ്പെട്ട കപ്പലെന്ന് മറൈന്ട്രാഫിക് വിവരങ്ങള് സൂചിപ്പിക്കുന്നു. അപകടത്തെ തുടര്ന്ന് ചൈനീസ് അധികൃതര് അടിയന്തര രക്ഷാപ്രവര്ത്തനം ആരംഭിച്ചു. തീപിടിത്തത്തിന്റെ കാരണം വ്യക്തമല്ല. കാണാതായവര്ക്കായി തെരച്ചില് നടത്താനും അപകടത്തിന് ഉത്തരവാദികളായവര്ക്കെതിരെ കര്ശന നടപടി സ്വീകരിക്കാനും ചൈനീസ് പ്രസിഡന്റ് ഷി ജിന്പിംഗ് ഉത്തരവിട്ടു. കുടുങ്ങിക്കിടക്കുന്നവരെ രക്ഷപ്പെടുത്തുന്നതിനൊപ്പം പരിക്കേറ്റവര്ക്ക് ആവശ്യമായ ചികിത്സ ഉറപ്പാക്കണമെന്നും ചൈനീസ് പ്രധാനമന്ത്രി ലീ ക്വിയാംഗ് നിര്ദേശിച്ചു.
സിന്ഹുവ പുറത്തുവിട്ട ചിത്രത്തില് കപ്പല്ശാലയില് നങ്കൂരമിട്ട വലിയൊരു കപ്പലിനുസമീപം നിരവധി അഗ്നിരക്ഷാ വാഹനങ്ങള് നിര്ത്തിയിട്ടിരിക്കുന്നതായി കാണാം. അപകടത്തെ തുടര്ന്ന് രാജ്യത്തെ എല്ലാ മേഖലകളിലും അഗ്നിബാധാ സാധ്യതയുള്ള ഇടങ്ങളില് സമഗ്ര പരിശോധന നടത്താനും കണ്ടെത്തുന്ന സുരക്ഷാ വീഴ്ചകള് പരിഹരിക്കാനും ഷി ജിന്പിംഗ് നിര്ദേശിച്ചു.
https://www.facebook.com/Malayalivartha
