17 വയസ്സുള്ള പെണ്‍കുട്ടിയെ ബിയറില്‍ മയക്കുമരുന്ന് കലക്കി കൊടുത്തു മയക്കി കൂട്ടബലാല്‍സംഗത്തിനിരയാക്കിയ കാമുകനെയും കൂട്ടുകാരനെയും പൊലീസ് അറസ്റ്റ് ചെയ്തു.
രണ്ടു പേരെ കൂടി പിടികിട്ടാനുണ്ട്. മുംബൈയിലെ വാസയിലാണ് സംഭവം. ബിയറില്‍ മയക്കുമരുന്നു കലക്കിയ ശേഷം ആദ്യം കാമുകനും പിന്നീട് കൂട്ടുകാരും പീഡിപ്പിക്കുകയായിരുന്നു. കഴിഞ്ഞയാഴ്ച നടന്ന സംഭവത്തില്‍ പരാതിയെ തുടര്‍ന്ന് ഇന്നാണ് 22 കാരനായ കാമുകനെയും കൂട്ടുകാരെയും പൊലീസ് പിടികൂടിയത്.

വസായിലെ ഒരു ഗ്രാമത്തില്‍ പെണ്‍കുട്ടി സ്ഥിരമായി ഡാന്‍സ് ക്ലാസില്‍ പോകാറുണ്ടായിരുന്നു. അങ്ങനെയാണ് 22 കാരനായ പയ്യനുമായി പെണ്‍കുട്ടി പരിചയത്തിലാകുന്നത്. സൗഹൃദം പിന്നീട് പ്രണയത്തിലേക്ക് വഴിമാറി. ചാറ്റിംഗിലൂടെയാണ് സൗഹൃദം പ്രണയമായി വളര്‍ന്നത്.
ജൂലൈ ആറിന് പെണ്‍കുട്ടി ബസ് കാത്തുനില്‍ക്കുമ്‌ബോള്‍ കാമുകന്‍ കാറുമായി വരുകയും ഔട്ടിംഗിനു പോകാന്‍ നിര്‍ബന്ധിക്കുകയും ചെയ്തു. കാമുകന്റെ മൂന്നു കൂട്ടുകാരും കാറിലുണ്ടായിരുന്നു. എല്ലാവര്‍ക്കും 20 വയസ്സാണ് പ്രായം.

വജ്രേശ്വരി ഭിവാന്ദയിലെത്തിയ ഇവര്‍ ഒരു ലോഡ്ജില്‍ മുറി ബുക്ക് ചെയ്തു. പെണ്‍കുട്ടിക്ക് കാമുകന്‍ ബിയര്‍ കൊടുത്തു. ബിയര്‍ കഴിച്ച പെണ്‍കുട്ടി മയങ്ങിവീഴുകയും ചെയ്തു. മണിക്കൂറുകള്‍ക്ക് ശേഷം ബോധം വന്നപ്പോള്‍ കാമുകന്‍ അടക്കം നാലുപേരും സ്ഥലം വിട്ടിരുന്നു. കഠിനമായ വേദന അനുഭവപ്പെട്ട അവള്‍ താന്‍ ലൈംഗികമായി പീഡിപ്പിക്കപ്പെട്ടതായി മനസ്സിലാക്കി. വീട്ടിലെത്തിയ പെണ്‍കുട്ടി കാര്യങ്ങള്‍ എല്ലാം രക്ഷിതാക്കളോടു പറഞ്ഞു.

തിങ്കളാഴ്ച തന്നെ രക്ഷിതാക്കള്‍ സ്‌റ്റേഷനിലെത്തി പരാതി നല്‍കുകയും ചെയ്തു. പെണ്‍കുട്ടിയെ വൈദ്യപരിശോധനയ്ക്ക് വിധേയയാക്കി. ദൃശ്യങ്ങള്‍ പകര്‍ത്തിയിട്ടുണ്ടോ എന്ന കാര്യവും പൊലീസ് അന്വേഷിച്ചു വരുകയാണ്. ഐപിസി 363 പ്രകാരം തട്ടിക്കൊണ്ടു പോകല്‍, 376 ഡി പ്രകാരം കൂട്ടബലാല്‍സംഗം എന്നീ കുറ്റങ്ങളാണ് പ്രതികള്‍ക്കെതിരെ ചുമത്തിയിട്ടുള്ളത്. പോക്‌സോ നിയമവും ചുമത്തിയിട്ടുണ്ട്.