വെല്ലൂരിലെ കാട്ടുപാക്കം ഗ്രാമത്തില്‍ വളര്‍ത്തുനായകള്‍ അമ്പതുകാരനെ കടിച്ച്‌കൊന്നു. ചെന്നൈയിലെ റെയില്‍വേ പോലീസ് എ.ഡി.ജി.പി. ഓഫീസില്‍ അസിസ്റ്റന്റായി ജോലിചെയ്തിരുന്ന കൃപാകരനാണ് നായകളുടെ ആക്രമണത്തില്‍ കൊല്ലപ്പെട്ടത്. വെല്ലൂരിനടുത്ത് കാട്ടുപാക്കം സ്വദേശിയായ കൃപാകരന് വീടിനു പുറത്തുള്ള മാന്തോട്ടത്തില്‍ നായകള്‍ക്ക് ഭക്ഷണം കൊടുക്കുന്നതിനിടെയാണ് ആക്രമണത്തിനിരയായത്. റോട്ട്വീലര്‍ ഇനത്തില്‍പ്പെട്ട നായകളാണ് കൃപാകരനെ കടിച്ചുകൊന്നതെന്ന് പോലീസ് പറഞ്ഞു.
ചൊവ്വാഴ്ച രാത്രി പത്തോടെയാണ് കൃപാകരന് നായകള്‍ക്ക് ഭക്ഷണംകൊടുക്കാനായി പോയത്. 10.20ഓടെ തൊട്ടടുത്തുള്ള കൃഷിയിടങ്ങളിലുള്ളവര്‍ നിലവിളികേട്ട് ഓടിയെത്തിയപ്പോള്‍ രക്തത്തില്‍ക്കുളിച്ചു കിടക്കുകയായിരുന്നു. ആസ്പത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. കൃപാകരന്റെ ദേഹമാസകലം നായകളുടെ കടിയേറ്റുവെന്ന് ആസ്പത്രി അധികൃതര്‍ പറഞ്ഞു.
റാട്ട്വീലര്‍ ഇനത്തില്‍പ്പെട്ട പട്ടിയെ കൃപാകരന്‍ വളര്‍ത്തിയിരുന്നു. ഇതിനെ ഇണചേര്‍ക്കുന്നതിനായി രണ്ടുദിവസംമുമ്പ് ഒരു നായയെ എത്തിച്ചു. ഈ നായക്ക് ഭക്ഷണം കൊടുക്കുന്നതിനിടയിലാണ് ആക്രമണമുണ്ടായത്. റോട്ട്വീലര്‍ ഇനത്തില്‍പ്പെട്ട നായകള്‍ക്ക് ഇണചേരുന്ന കാലയളവില്‍ ആക്രമണോത്സുകത കൂടുതലാണെന്ന് മൃഗപരിപാലകര്‍ പറയുന്നു. ഉടമയുടെയോ, പരിശീലകന്റെയോ സാന്നിധ്യമില്ലാതെ ഈ ഇനത്തില്‍പ്പെട്ട നായകളുടെ അടുത്ത് അപരിചിതര്‍ പോവുന്നത് അപകടമാണ്. സാധാരണഗതിയില്‍ ഉടമയുടെ ആജ്ഞ മാത്രമാണ് ഈ നായകള്‍ അനുസരിക്കുക.