അടുത്തത് ആരാകും മുഖ്യമന്ത്രി, ഗുജറാത്തില് ചര്ച്ചകള് സജീവമാകുന്നു, സംസ്ഥാന നേതാവ് മുതല് മന്ത്രിസഭാംഗം വരെ പരിഗണനയില്, കൂടുതല് സാധ്യത നിഥിന്ഭായ് പട്ടേലിനു
പട്ടേല് പ്രക്ഷോഭം മുതല് ദലിത് പ്രതിഷേധം വരെ രൂക്ഷമായ കാലത്ത് ഗുജറാത്തിന്റെ മുഖ്യമന്ത്രിയായിരുന്ന ബെന് ആരോഗ്യ പ്രശ്നങ്ങള് ചൂണ്ടി കാണിച്ച് രാജി സമര്പ്പിച്ച സാഹചര്യത്തില് സംസ്ഥാനത്തെ മുയ്ഖ്യമന്ത്രി ആരാകുമെന്നുള്ള ചര്ച്ചകള് പുരോഗമിക്കുന്നു. പ്രധാനമന്ത്രിപദമേറ്റെടുക്കാന് നരേന്ദ്ര മോദി സ്ഥാനമൊഴിഞ്ഞതിനെത്തുടര്ന്നാണ് 2014ല് സംസ്ഥാനത്തിന്റെ ആദ്യ വനിതാ മുഖ്യമന്ത്രിയായി ആനന്ദിബെന് പട്ടേല് സ്ഥാനമേറ്റത്. തനിക്ക് 75 വയസ്സായെന്നും പാര്ട്ടി ഏല്പ്പിക്കുന്ന പ്രധാനപ്പെട്ട ഉത്തരവാദിത്തങ്ങള് നിറവേറ്റാന് ആരോഗ്യം അനുവദിക്കുന്നില്ലയെന്നും കാണിച്ചാണ് ബെന് രാജി വച്ചത്.
മുഖ്യമന്ത്രി സ്ഥാനത്തേക്ക് പ്രധാനമായും മൂന്ന് പേരെയാണ് പരിഗണിക്കുന്നത്.
ഇപ്പോഴത്തെ സംസ്ഥാന ആരോഗ്യമന്ത്രി നിഥിന്ഭായ് പട്ടേല്, അകോടയില് നിന്നുള്ള നിയമസഭാംഗം സൗരഭ് പട്ടേല്, ബിജെപി സംസ്ഥാന അധ്യക്ഷന് വിജയ് രൂപാണി എന്നിവരുടെ പേരുകളെ ചുറ്റിപ്പറ്റി ചര്ച്ചകള് പുരോഗമിക്കുകയാണെങ്കിലും കൂടുതല് സാധ്യത നിഥിന്ഭായ് പട്ടേലിനു തന്നെയാണ്. മെഹ്സാനയില്നിന്നുള്ള നിയമസഭാ അംഗമായ നിധിന് പട്ടേല് സംവരണസമരം നയിക്കുന്ന പട്ടേല് സമുദായത്തിലെ പ്രമുഖ നേതാവും കൂടിയാണ്.ശക്തനായ ഒരു നേതാവിന്റെ കീഴില് തയ്യാറെടുപ്പുകള് നടത്തിയില്ലെങ്കില് അടുത്തകൊല്ലം നടക്കാനിരിക്കുന്ന നിയമസഭാ തെരഞ്ഞെടുപ്പില് അടിതെറ്റുമെന്ന് ബിജെപി കേന്ദ്ര നേതൃത്വം കണക്കു കൂട്ടുന്നു. അതുകൊണ്ട് തന്നെ, ദളിത് വിഷയത്തില് അടക്കം പെട്ട് പ്രതിഛായ നഷ്ടമായ സര്ക്കാരിന് പുതിയ ഒരു നേതാവിന്റെ കീഴില് വേറിട്ട ഒരു മുഖം നല്കാനാണ് ബിജെപി നേതൃത്വം ശ്രമിക്കുന്നത്.
ആരാകണം മുഖ്യമന്ത്രിയെന്നതില് അന്തിമ തീരുമാനം പ്രധാനമന്ത്രി നരേന്ദ്രമോദിയുടേതായിരിക്കും
https://www.facebook.com/Malayalivartha
