ആധാര്‍ പദ്ധതിയില്‍ നിന്ന്‌ സര്‍ക്കാര്‍ പിന്നോട്ടില്ലെന്ന്‌ കേന്ദ്ര ധനകാര്യമന്ത്രി പി. ചിദംബരം. ഇപ്പോള്‍ വിമര്‍ശിക്കുന്നവര്‍ ആധാര്‍ സമൂഹത്തെ ഏതു തരത്തില്‍ ശക്തിപ്പെടുത്തുമെന്ന്‌ പിന്നീട്‌ മനസിലാക്കുമെന്നും മനസിലാക്കുമെന്നും സഹായങ്ങള്‍ താഴെ തട്ടിലെത്താന്‍ ആധാര്‍ കാര്‍ഡ്‌ നിര്‍ബന്ധമാണെന്നും ഇടക്കാല ബഡ്‌ജറ്റ്‌ ലോക്‌സഭയില്‍ അവതരിപ്പിച്ചുകൊണ്ട്‌ ചിദംബരം പറഞ്ഞു.
ബഡ്‌ജറ്റില്‍ ചെറിയ കാറുകള്‍ക്കും ബൈക്കുകള്‍ക്കും എക്‌സൈസ്‌്‌ തീരുവ 12 നിന്നും 8 ശതമാനമാക്കി കുറച്ചു. എസ്‌.യു.വികള്‍ക്കുള്ള തീരുവ 30 നിന്നും 24 ശതമാനമാക്കി, വിലയും കുറയും. നികുതി ഒഴിവാക്കികൊണ്ട്‌, ശാസ്‌ത്രമേഖലയിലെ ഗവേഷണങ്ങള്‍ക്ക്‌ ഫണ്ട്‌ കണ്ടെത്തുന്നതിന്‌ റിസര്‍ച്ച്‌ ഫണ്ടിംഗ്‌ ഓര്‍ഗനൈസേഷന്‍ രൂപികരിക്കും. നിര്‍മാണ മേഖലയ്‌ക്ക്‌ കൂടുതല്‍ ഊന്നല്‍, പരോക്ഷ നികുതിയില്‍ മാറ്റം കൊണ്ടു വരും. ഇന്ധന സബ്‌സിഡിക്ക്‌ 35,000 കോടി, ന്യൂനപക്ഷ ക്ഷേമത്തിന്‌ 3711 കോടി. പ്രതിരോധ പെന്‍ഷന്‍ അക്കൗണ്ടിന്‌ 500 കോടി രൂപ, വനിത ശിശുക്ഷേമത്തിന്‌ 21,000 കോടി എന്നിവയും നീക്കിവെച്ചു. 15 ബില്യണ്‍ ഡോളറിന്റെ വിദേശനാണ്യ ശേഖരമുണ്ടാകും, പുതിയ 3 വ്യവസായിക ഇടനാഴികള്‍ തുടങ്ങും കൂടാതെ 7,35,000 കോടിയുടെ കാര്‍ഷിക വായ്‌പയ്‌ക്കും 6.6 ലക്ഷം കോടിയുടെ 296 പദ്ധതികള്‍ക്കും അനുമതി നല്‍കി.