അഞ്ചരവയസ്സ്‌ പ്രായമുളള രാജു എന്ന കാളകൂറ്റന്‍ പഞ്ചാബിലെ മൊഗാലിയില്‍ നടന്ന കാര്‍ഷിക ഉച്ചകോടിയില്‍ മെഗാസ്റ്റാറായി തിളങ്ങി. 5.8 അടി ഉയരവും 11.5 അടി നീളവും 1200 കിലോഗ്രാം ഭാരവും. അത്‌ കാണേണ്ട ഒരു കാഴ്‌ച തന്നെയാണ്‌ .
രാജു കാളയെ ഓമനിച്ചു വളര്‍ത്തുന്നത്‌ കപൂര്‍ത്തലക്കാരന്‍ സന്തോക്‌ സൊമാലിയാണ്‌ . 10 കോടി രൂപ നല്‍കാമെന്ന്‌ പറഞ്ഞിട്ട്‌ രാജുവിനെ വിട്ടു കൊടുത്തില്ല. കുഞ്ഞുങ്ങളെ പോലെയാണ്‌ വളര്‍ത്തുന്നത്‌ . എത്ര കോടി തന്നാലും കൊടുക്കില്ല എന്നാണ്‌ സന്തോക്‌ പറയുന്നത്‌ . ദിവസവും 10ലിറ്റര്‍ പാല്‍ കുടിക്കും. കൂടാതെ മൂന്നു കിലോഗ്രാം തൈര്‌ , 10 കിലോ കാലിത്തീറ്റയും അകത്താക്കും. കൃത്യനിഷ്‌ഠയുള്ളവനാണ്‌ . ആരോഗ്യപരിപാലനത്തിനായി ദിവസവും രാവിലെ ആറു കിലോമീറ്റര്‍ നടത്തം. എല്ലാ മത്സര ഇനങ്ങളിലും പങ്കെടുക്കുകയും സമ്മാനം നേടുകയും ചെയ്യും. രാജു ഉണ്ടെങ്കില്‍ പിന്നെ നോക്കണ്ട അവനു തന്നെ സമ്മാനം. ഈ പ്രായത്തിനിടയ്‌ക്ക്‌ 18 ലക്ഷം രൂപ സമ്മാന ഇനത്തിലായി ലഭിച്ചു കഴിഞ്ഞു.
പഞ്ചാബ്‌ ഗവണ്‍മെന്റ്‌ സംഘടിപ്പിച്ച മൊഹാലി കാര്‍ഷിക ഉച്ചകോടിയില്‍ യുവരാജ്‌ എന്ന കാളക്കൂറ്റനും ശ്രദ്ധ ഏറെ പിടിച്ചു പറ്റി. അവനാകട്ടെ പ്രായം 5 വയസ്സും 14 അടി നീളം 5.7 അടി ഉയരവും. കുരുക്ഷേത്രയിലെ സുനേരിയോ സ്വദേശിയായ കരം വീര്‍സിംഗിന്റെ ഓമനയാണിവന്‍.
ദിവസവും 20 ലിറ്റര്‍ പാല്‍ കുടിക്കും. 5 കിലോഗ്രാം ആപ്പിളും മൂന്നു കിലോ കാലിത്തീറ്റയും ശാപ്പിടും. അതിനു പുറമെ ദിവസവും ഒരു കുപ്പി നാടന്‍ ചാരായവും കൊടുക്കാറുണ്ടെന്ന്‌ ഇവനെ നോക്കുന്നയാള്‍ പറയുന്നു.
വിത്തുകാളകളില്‍ ഉത്തരേന്ത്യയില്‍ പ്രീയപ്പെട്ടവനാണ്‌. വിലയാകട്ടെ 2 കോടിരൂപ. മുറാ കാളകളുടെ സ്വദേശങ്ങളാണ്‌ ഇന്ത്യയില്‍ പഞ്ചാബ്‌, ഹരിയാന പാകിസ്ഥാനില്‍ പഞ്ചാബ്‌ പ്രവിശ്യയിലുമാണ്‌ .