ആന്ധ്രയില് രാഷ്ട്രപതിഭരണം, രാജ്യത്തെ 29ാമത്തെ സംസ്ഥാനമായി തെലുങ്കാന
ആറു പതിറ്റാണ്ടു നീണ്ടു നിന്ന പ്രക്ഷോഭങ്ങള്ക്കും നാടകീയ രംഗങ്ങള്ക്കുമൊടുവില് തെലുങ്കാന സംസ്ഥാന ബില് രാജ്യസഭയില് പാസാക്കി. ലോക്സഭയില് അവതരിപ്പിച്ച ബില്ലില് ഭേദഗതി കൂടാതെയാണ് രാജ്യസഭ ബില് പാസാക്കിയത്. രാഷ്ട്രപതി പ്രണബ് മുഖര്ജി ഉത്തരവില് ഒപ്പുവയ്ക്കുന്നതോടെ നടപടിക്രമങ്ങള് പൂര്ത്തിയാകും. രാജ്യത്തെ 29-ാമത്തെ സംസ്ഥാനമാണ് തെലുങ്കാന.
തെലുങ്കാനയില് പതിനേഴും സീമാന്ധ്രയും ഇരുപത്തഞ്ചുമ ലോക്സഭ സീറ്റുകളുണ്ട്. രണ്ടര മണിക്കൂര് നീണ്ട ചര്ച്ചക്കൊടുവില് ബില് പാസാക്കുകയായിരുന്നു. സീമാന്ധ്രക്ക് അഞ്ചു വര്ഷത്തേക്ക് പ്രത്യേക പദവിയെന്ന് പ്രധാനമന്ത്രി മന്മോഹന് സിംഗ് പറഞ്ഞു. പിന്നാക്കമേഖലയായ റായലസീമ ഉള്പ്പെടെയുള്ള പ്രദേശങ്ങളുടെ സമഗ്രവികസനത്തിന് ആറിന പാക്കേജ് നടപ്പിലാക്കുമെന്നും പ്രധാനമന്ത്രി പറഞ്ഞു. നാടകീയരംഗങ്ങള്ക്കൊടുവില് ശബ്ദവോട്ടോടെയാണു ബില് പാസാക്കിയത്. ഇന്നലെ വൈകുന്നേരം 3.30-നാണ് ആഭ്യന്തരമന്ത്രി സുശീല്കുമാര് ഷിന്ഡേ ബില് അവതരിപ്പിച്ചത്.
മുഖ്യപതിപക്ഷമായ ബിജെപി ബില്ലിനെ അനുകൂലിച്ചു. എന്നാല് ഹൈദരാബാദിലെ ക്രമസമാധാനം ലക്ഷ്യമിട്ട് ഭരണഘടനാ ഭേദഗതി വേണമന്ന ബി.ജെ.പിയുടെ ആവശ്യം സര്ക്കാര് തള്ളി. സീമാന്ധ്രയില് നിന്നുള്ള അംഗങ്ങളും തൃണമൂല് അംഗങ്ങളും ബില്ലിനെ എതിര്ത്തു. തൃണമൂല് കോണ്ഗ്രസ് അംഗങ്ങള് ബില്ലിന്റെ പകര്പ്പ് വലിച്ചുകീറി. സമാജ്വാദി പാര്ട്ടി, ശിവസേന, ശിരോമണി അകാലിദള് എന്നിവരാണു ബില്ലിനെ എതിര്ത്തത്. ഇടത്-എഐഡിഎംകെ എംപിമാര് ഇറങ്ങിപ്പോയി. ഭാഷാ അടിസ്ഥാനത്തില് വിഭജിച്ച സംസ്ഥാനങ്ങളെ വീണ്ടും വെട്ടിമുറിക്കരുതെന്നും അനന്തരഫലത്തിന്റെ ഉത്തരവാദിത്തം സര്ക്കാരിനായിരിക്കുമെന്നും സി.പി.എം. പാര്ലമെന്ററി നേതാവ് സീതാറാം യെച്ചൂരി പറഞ്ഞു. പ്രധാനമന്ത്രിയുടെ സാന്നിധ്യത്തില് കേന്ദ്രമന്ത്രി ചിരഞ്ജീവി ബില്ലിനെ എതിര്ത്തതു വിവാദമായി. സര്ക്കാര് തീരുമാനത്തെ കേന്ദ്രമന്ത്രി തന്നെ എതിര്ക്കുകയാണെന്നു ബി.ജെ.പി. ആക്ഷേപിച്ചു. ബഹളം കാരണം സഭ തടസപ്പെട്ടപ്പോള് ഉപരാഷ്ട്രപതി സര്വകക്ഷിയോഗം വിളിച്ചു സമവായത്തിനു ശേഷമാണു ബില് അവതരിപ്പിച്ചത്.
സീമാന്ധ്ര, തെലുങ്കാന എന്നിങ്ങനെ രണ്ട് സംസ്ഥാനങ്ങളായാണ് ആന്ധ്രപ്രദേശ് വിഭജിക്കുക. ഇരു സംസ്ഥാനങ്ങളും ഒരു ഗവര്ണറുടെ കീഴിലായിരിക്കും. പത്ത് വര്ഷത്തേയ്ക്ക് ഹൈദരാബാദ് ഇരു സംസ്ഥാനങ്ങള്ക്കും പൊതു തലസ്ഥാനമാകും. പത്ത് വര്ഷത്തിനുള്ളില് ആന്ധ്രക്ക് പുതിയ തലസ്ഥാനം വരും. ഇതോടെ ഹൈദാരാബാദ് തെലുങ്കാനയുടെ മാത്രം തലസ്ഥാനമാകും.
https://www.facebook.com/Malayalivartha
