ലൈംഗീകവൃത്തിക്കടക്കം കുട്ടികളെ കടത്തുന്ന രണ്ട് ബി.ജെ.പി നേതാക്കള് അറസ്റ്റില്
ബി.ജെ.പി പശ്ചിമബംഗാള് വനിതാ നേതാവ് ജൂഹി ചൗധരി ജഗല്പായ്പുരി കുട്ടിക്കടത്തുമായി ബന്ധപ്പെട്ട് അറസ്റ്റില്. ഇന്ഡോ-നേപ്പാള് അതിര്ത്തിക്കടുത്ത് ബട്ടാസിയയില് വെച്ചാണ് ഇവരെ സി.ഐ.ഡികള് പിടികൂടിയത്. ജൂഹിയുടെ അറസ്റ്റോടെ കേസില് അറസ്റ്റിലായവരുടെ എണ്ണം നാലായി. ജൂഹി ചൗധരിയെ തുടരന്വേഷണങ്ങള്ക്കായി ജഗല്പായ്പുരിയിലെത്തിക്കുമെന്ന് സി.ഐ.ഡി വൃത്തങ്ങള് അറിയിച്ചു. ബിമലാ ശിശു ഗ്രോ എന്ന ഒരു ഏജന്സി വഴി ഇന്ത്യക്കകത്തും പുറത്തേക്കുമായി കുട്ടികളെ കടത്തി എന്നാണ് ഇവര്ക്കെതിരെയുള്ള കുറ്റം.
ഏജന്സിയുടെ ചീഫ് അഡോപ്ഷന് ഓഫീസര് സൊണാലി മണ്ഡല്, ചെയര്പേഴ്സണ് ചന്ദന ചക്രബര്ത്തി, ചന്ദനയുടെ സഹോദരന് മനാസ് ഭൗമിക് എന്നിവരാണ് നേരത്തെ പിടിയിലായ മൂന്നുപേര്. അതേ സമയം ജഗല്പായ്പുരി കുട്ടിക്കടത്ത് കേസില് മഹിളാമോര്ച്ച പശ്ചിമബംഗാള് ഘടകം സെക്രട്ടറി ജൂഹി ചൗധരി അറസ്റ്റിലായതിനു പിന്നാലെ ബി.ജെ.പി ദേശീയ ജനറല് സെക്രട്ടറി കൈലാഷ് വിജയവാര്ഗിയക്കും രാജ്യസഭാംഗം രൂപാ ഗാംഗുലിക്കുമെതിരേ ആരോപണം ഉയര്ന്നിട്ടുണ്ട്.
കൈലാഷ് വിജയവാര്ഗിയയും മഹിളാമോര്ച്ചാ ബംഗാള്ഘടകം അധ്യക്ഷകൂടിയായ രൂപാ ഗാംഗുലിയും കുട്ടിക്കടത്ത് മാഫിയയുമായി അടുത്ത ബന്ധം പുലര്ത്തിയിരുന്നതായി കേസില് അറസ്റ്റിലായ ചന്ദന ചക്രവര്ത്തി മൊഴിനല്കി. ബി.ജെ.പിയുടെ ബംഗാള് ഘടകത്തിന്റെ ചുമതലയുള്ളയാളാണ് മധ്യപ്രദേശുകാരനായ വിജയവാര്ഗിയ. നേരത്തെ ചന്ദന ചക്രവര്ത്തിയുടെ മൊഴിയുടെ അടിസ്ഥാനത്തിലാണ് ജൂഹി ചൗധരി അറസ്റ്റിലായത്. ഇന്നലെ കോടതിയില് ഹാജരാക്കിയ ജൂഹി ചൗധരിയെ ജഗല്പായ്പുരി ജില്ലാ കോടതി റിമാന്ഡ് ചെയ്തു. തന്നെ കേസില് ബലിയാടാക്കുകയായിരുന്നെന്നും വിജയവാര്ഗിയയും രൂപാഗാംഗുലിയും കുട്ടിക്കടത്തുമായി ബന്ധപ്പെട്ടു പ്രവര്ത്തിക്കാന് തുടങ്ങിയിട്ടു മൂന്നുവര്ഷമായെന്നും ചന്ദന ചക്രവര്ത്തി ബംഗാള് ക്രൈം ഇന്വെസ്റ്റിഗേഷന് ഡിപ്പാര്ട്ട്മെന്റിന് മൊഴിനല്കി.
രണ്ടുപേരുമായും അടുത്ത ബന്ധം പുലര്ത്തുന്ന വ്യക്തിയാണ് ജൂഹി. ഇവരാണ് റാക്കറ്റിനു പിന്നിലെ ആസൂത്രക. കുട്ടിക്കടത്ത് ചര്ച്ചചെയ്യാനായി താനും ജൂഹി ചൗധരിയും ഡല്ഹിയിലെത്തി വിജയവാര്ഗിയെയും രൂപാ ഗാംഗുലിയെയും കണ്ടിരുന്നു. വനിതാ ശിശുക്ഷേമ മന്ത്രാലയത്തില് സ്വാധീനം ചെലുത്തി തങ്ങളുടെ സന്നദ്ധസംഘടനയ്ക്കു 22.5 ലക്ഷംരൂപ ഗ്രാന്റ് അനുവദിക്കണമെന്ന് ഇവരോട് ആവശ്യപ്പെട്ടു. മറ്റു ശിശുക്ഷേമകേന്ദ്രങ്ങളില് നിന്നു 14 കുഞ്ഞുങ്ങളെ തങ്ങളുടെ കേന്ദ്രത്തിലേക്കു മാറ്റാനും ആവശ്യപ്പെട്ട ചന്ദന, പ്രത്യുപകാരമായി 'വലിയ സമ്മാനം' തരാമെന്നും വാഗ്ദാനംചെയ്തതായും സി.ഐ.ഡി പറഞ്ഞു. അതേസമയം, ആരോപണങ്ങളെല്ലാം വിജയവാര്ഗിയയും രൂപാ ഗാംഗുലിയും നിഷേധിച്ചു.
https://www.facebook.com/Malayalivartha
