കൃഷി നശിപ്പിച്ച പശുക്കുട്ടിയെ കൊന്നതിന് പിതാവിന് പകരം പ്രായശ്ചിത്തം ചെയ്യേണ്ടത് അഞ്ചു വയസ്സുകാരിയായ മകള്‍. പശുകികുട്ടിയെ പിതാവ് കൊന്നതിനു പ്രായശ്ചിത്തമായി അഞ്ചു വയസ്സുകാരിയായ മകളെ എട്ടു വയസ്സുകാരനു വിവാഹം ചെയ്തുകൊടുക്കാന്‍ നാട്ടുകൂട്ടം തീരുമാനിച്ചതായി പരാതി. മധ്യപ്രദേശിലെ ഠര്‍പൂരിലാണ് സംഭവം.

പെണ്‍കുട്ടിയുടെ പിതാവ് ജഗദീഷ് ബഞ്ചാര മൂന്നു വര്‍ഷം മുന്‍പ് ഒരു പശുക്കുട്ടിയെ കൊന്നിരുന്നു. തന്റെ പാടത്തുകയറി വിളകള്‍ നശിപ്പിച്ചതിനെ തുടര്‍ന്നായിരുന്നു ഇത്. കൃഷി സ്ഥലത്തുകയറിയ പശുക്കുട്ടിയെ ജഗദീഷ് കല്ലുകൊണ്ട് ആക്രമിക്കുകയായിരുന്നു. പശുക്കുട്ടി ചത്തതിനെ തുടര്‍ന്ന് ജഗദീഷിനെയും കുടുംബത്തെയും ഗ്രാമവാസികള്‍ ഒറ്റപ്പെടുത്തുകയും ചെയ്തു. ഇതിനു പിന്നാലെയാണ് നാട്ടുകൂട്ടം കൂടി പെണ്‍കുട്ടിയുടെ വിവാഹം തീരുമാനിക്കുന്നത്.

ചെയ്ത തെറ്റിനുള്ള പ്രായശ്ചിത്തമായി വിവാഹം നടത്തുന്നതിനൊപ്പം ഗംഗയില്‍ സ്‌നാനം ചെയ്യുകയും ഗ്രാമത്തില്‍ ഭക്ഷണം വിതരണം ചെയ്യണമെന്നും ഉത്തരവില്‍ പറയുന്നു. ഇതിനെതിരെ പെണ്‍കുട്ടിയുടെ അമ്മ പരാതി നല്‍കുകയും പൊലീസിനെ സമീപിക്കുകയും ചെയ്തതോടെയാണ് വിവരം പുറംലോകം അറിയുന്നത്. ഇതേത്തുടര്‍ന്ന് സംഭവത്തില്‍ വിശദമായ അന്വേഷണം നടത്തുമെന്ന് അധികൃതര്‍ വ്യക്തമാക്കി.