മുഖ്യമന്ത്രിയുടെ മകന് കലക്കി; ഒരു മണിക്കൂര് ഐസ്ക്രീം വിറ്റ് സമ്പാദിച്ചത് ഏഴര ലക്ഷം രൂപ
തെലങ്കാന മുഖ്യമന്ത്രിയുടെ മകനും ഐ.ടി. മന്ത്രിയുമായ കെ.ടി.രാമറാവു ഒരു മണിക്കൂര് ഐസ്ക്രീം വിറ്റ് സമ്പാദിച്ചത് ഏഴര ലക്ഷം രൂപ. തെലങ്കാന മുഖ്യമന്ത്രി കെ.ചന്ദ്രശേഖര റാവു തന്റെ മന്ത്രിസഭാംഗങ്ങളോടും നേതാക്കളോടും പാര്ട്ടി സമ്മേളനത്തിന്റെ ചെലവിനുള്ള തുക കണ്ടെത്താന് രണ്ടു ദിവസം 'കൂലി'യായി പണിയെടുക്കാനാവശ്യപ്പെട്ടപ്പോള് മകന് ഒരു മണിക്കൂര് കൊണ്ട് സമ്പാദിച്ചത് ഏഴരലക്ഷം രൂപ.
മുഖ്യമന്ത്രിയുടെ പുത്രനും സംസ്ഥാന ഐ.ടി. മന്ത്രിയുമായ കെ.ടി.രാമറാവുവാണ് ഇത് സമ്പാദിച്ചത്. ഹൈദരാബാദ് നാഗ്പൂര് ദേശീയപാതയിലെ സുചിത്ര ഐസ്ക്രീം പാര്ലറില് നിന്നാണ് കച്ചവടം. പാര്ലറില് ഒരു മാസത്തെ മൊത്തം വരുമാനം ഏകദേശം ഈ തുകയ്ക്കടുത്തേ വരൂ. എന്നാല്, രാമറാവുവിന്റെ കസ്റ്റമേഴ്സെല്ലാം ധനികരാണ്. കൂടുതലും രാഷ്ട്രീയപ്രവര്ത്തകര്. ആന്ധ്രതെലങ്കാന പ്രദേശത്തെ നിയമസഭാംഗങ്ങളില് മിക്കവരും അതിസമ്പന്നരാണ്.
ഇവര് വന്തുകയ്ക്ക് ഐസ്ക്രീം വാങ്ങിയതാണ് ഐ.ടി. മന്ത്രിയെ മണിക്കൂറിനുള്ളില് 'ലക്ഷപ്രഭു'വാക്കിയത്. സംസ്ഥാനത്തെ നിരവധി എഞ്ചിനീയറിങ് കോളേജുകളുടെ ഉടമയായ മല്ല റെഡ്ഢി അഞ്ചു ലക്ഷം രൂപയ്ക്കാണ് രാമറാവുവില് നിന്ന് ഐസ്ക്രീം വാങ്ങിയത്. അദ്ദേഹം നിയമസഭാംഗം കൂടിയാണ്. 'ഗുലാബി കൂലി ദിനാലു' അഥവാ പിങ്ക് തൊഴില് ദിനങ്ങള് എന്ന ഒരാഴ്ച നീണ്ടു നില്ക്കുന്ന കര്മപരിപാടി മുഖ്യമന്ത്രി പ്രഖ്യാപിച്ചിട്ടുണ്ട്.
പിങ്ക് തെലങ്കാന രാഷ്ട്രീയ സമിതിയുടെ ഔദ്യോഗിക നിറമാണ്. രണ്ടു ദിവസത്തെ കൂലിയായി എല്ലാവരും ചേര്ന്ന് സമാഹരിച്ച തുക പാര്ട്ടിയുടെ വാര്ഷിക സമ്മേളനം ഗംഭീരമായി നടത്താനായി ചെലവിടും. ഏപ്രില് ഇരുപത്തിയൊന്നിനാണ് വാര്ഷികസമ്മേളനം നടക്കുന്നത്. അതോടൊപ്പം പൊതുസമ്മേളനവും നടക്കും. ഇതിനു വേണ്ടി 35 കോടി രൂപ പാര്ട്ടിയുടെ അക്കൗണ്ടിലെത്തിയിട്ടുണ്ട്. ധനശേഖരണത്തെക്കുറിച്ചുള്ള കണക്കുകള് തിരഞ്ഞെടുപ്പ് കമ്മീഷനെ ചന്ദ്രശേഖരറാവുവിന് താമസിയാതെ ബോധ്യപ്പെടുത്തേണ്ടി വരും.
https://www.facebook.com/Malayalivartha
