പശു സംരക്ഷകര് ഒരാളെ തല്ലിക്കൊന്ന സംഭവത്തില് പ്രതികളെ അറസ്റ്റ് ചെയ്യില്ലെന്ന് പോലീസ്
ജെയ്പൂര്: ഇങ്ങനെയും ഒരു നാട്. രാജസ്ഥാനിലെ ആല്വാറില് പശു സംരക്ഷകര് ഒരാളെ തല്ലിക്കൊന്ന സംഭവത്തില് പ്രതികളെ ഉടന് അറസ്റ്റ് ചെയ്യില്ലെന്ന് രാജസ്ഥാന് പോലീസ്. പെഹ്ലു ഖാന് എന്ന ക്ഷീര കര്ഷകനെ പശുക്കടത്ത് ആരോപിച്ച് മര്ദ്ദിച്ച് കൊന്ന സംഭവത്തിലാണ് പോലീസിന്റെ തണുപ്പന് നിലപാട്. പ്രഥമ വിവര റിപ്പോര്ട്ടില് പേര് പരാമര്ശിച്ചിരിക്കുന്ന ആറ് പേരെയും അവര് കുറ്റക്കാരാണെന്ന് തെളിയാതെ അറസ്റ്റ് ചെയ്യില്ലെന്ന് പോലീസ് വ്യക്തമാക്കി.
എഫ്.ഐ.ആറില് പേര് പരാമര്ശിക്കുന്ന ആറ് പേര്ക്കായും വ്യാപകമായ തെരച്ചില് നടക്കുകയാണെന്ന് ആല്വാര് എസ്്.പി രാഹുല് പ്രകാശ് വ്യക്തമാക്കി. അവരെ കണ്ടെത്തിയാല് ഉടന് അറസ്റ്റ് ചെയ്യില്ല. കുറ്റകൃത്യത്തില് പങ്കുണ്ടെന്ന് വ്യക്തമായ ശേഷമേ അറസ്റ്റ് ചെയ്യൂ-രാഹുല് പ്രകാശ് പറഞ്ഞു. ഏപ്രില് ഒന്നിന് നടന്ന സംഭവത്തില് പെഹ്ലു ഖാന് നല്കിയ മൊഴിയുടെ അടിസ്ഥാനത്തിലാണ് ആറ് പേരെ എഫ്.ഐ.ആറില് ചേര്ത്തിരിക്കുന്നത്.
ഓം യാദവ്, ഹുക്കും ചന്ദ് യാദവ്, സുധീര് യാദവ്, ജഗ്മല് യാദവ്, നവീന് ശര്മ്മ, രാഹുല് സൈനി എന്നിവരുടെയും മറ്റ് നാല് പേരുടെയും പേരാണ് പെഹ്ലു ഖാന് വെളിപ്പെടുത്തിയത്. ആക്രമണത്തിനിരയായ ആള് തന്നെ പറഞ്ഞ പേരുകാരെ അറസ്റ്റ് ചെയ്യില്ലെന്നാണ് പോലീസ് നിലപാട്. പ്രതികളെല്ലാം ആര്.എസ്.എസ് ഉള്പ്പെടെയുള്ള സംഘപരിവാര് സംഘടനകളുമായി ബന്ധമുള്ളവരാണ്.
https://www.facebook.com/Malayalivartha
