ചീഫ് ജസ്റ്റിസ് അടക്കം 8 സുപ്രീം കോടതി ജഡ്ജിമാരെ അറസ്റ്റ് ചെയ്ത് ജയിലിലടയ്ക്കാന്‍ ജസ്റ്റിസ് കര്‍ണന്റെ ഉത്തരവ്
ചീഫ് ജസ്റ്റിസ് ജെ.എസ്. കേഹാര്‍ ഉള്‍പ്പെടെ സുപ്രീംകോടതിയിലെ എട്ടു ജഡ്ജിമാരെ അറസ്റ്റ് ചെയ്ത് ജയിലില്‍ അടയ്ക്കാന്‍ കൊല്‍ക്കത്ത ഹൈക്കോടതിയിലെ ജസ്റ്റിസ് സി.എസ്. കര്‍ണന്റെ ഉത്തരവിട്ടു. സുപ്രീംകോടതിയിലെ ജഡ്ജിമാരുമായി ഏറെനാളായി തുടരുന്ന തര്‍ക്കമാണ് പുതിയ തലത്തില്‍ എത്തിയിരിക്കുന്നത്. ജാതീയമായി അധിക്ഷേപിച്ചുവെന്ന പരാതിയിലാണ് കര്‍ണന്‍ തന്നെ ശിക്ഷ വിധിച്ചത്. എസ്‌സി/എസ്ടി ആക്ടിലെ വകുപ്പുകള്‍ പ്രകാരമാണ് നടപടി.
എട്ടുപേര്‍ അഞ്ചു വര്‍ഷം തടവും ഒരോ ലക്ഷം രൂപ വീതം പിഴയും അടയ്ക്കണം. പിഴയടയ്ക്കാത്ത പക്ഷം ആറു മാസം കൂടി തടവ് ശിക്ഷ അനുഭവിക്കണം. തനിക്കെതിരെ കോടതിയലക്ഷ്യത്തിന് കേസെടുത്ത ഈ ജഡ്ജിമാര്‍ ന്യായാധിപന്‍ എന്ന പദവിയെ പരിഗണിക്കുകയോ താനൊരു ദലിതനാണെന് കാര്യം അവഗണിക്കുകയും ചെയ്തു. തന്റെ ഭാഗം വിശദീകരിക്കാനുള്ള അവസരം പോലും നല്‍കാതിരുന്ന ചീഫ് ജസ്റ്റിസും സംഘവും തനിക്കെതിരെ ഗൂഢാലോചന നടത്തുകയും അപമാനിക്കുന്ന രീതിയില്‍ ഉത്തരവ് പുറപ്പെടുവിക്കുകയും ചെയ്‌തെന്നും കര്‍ണന്‍ ഉത്തരവില്‍ പറയുന്നു.
പിഴയായി വിധിച്ച പണം ഒരാഴ്ചയ്ക്കുള്ളില്‍ നാഷനല്‍ കമ്മിഷന്‍, എസ്‌സി-എസ്ടി കോണ്‍സ്റ്റിട്യൂഷനല്‍ ബോഡി, ഖാന്‍ മാര്‍ക്കറ്റ്, ന്യൂഡല്‍ഹി എന്ന വിലാസത്തിലാണ് അടയ്‌ക്കേണ്ടത്. ഡല്‍ഹി പൊലീസ് കമ്മിഷണര്‍ക്കാണ് സുപ്രീംകോടതി ജഡ്ജിമാരെ അറസ്റ്റ് ചെയ്യാന്‍ കര്‍ണന്‍ നിര്‍ദേശം നല്‍കിയിരിക്കുന്നത്. അറസ്റ്റ് വരിക്കാന്‍ തയാറാകാത്ത പക്ഷം ജഡ്ജിമാര്‍ പാര്‍ലമെന്റിനെ സമീപിക്കണം. അതുവരെ സുപ്രീംകോടതിയിലെ ഒരു കേസും ഇവര്‍ പരിഗണിക്കരുത്. ജഡ്ജിമാരുടെ പാസ്‌പോര്‍ട്ടുകള്‍ പൊലീസിന് കൈമാറാനും കര്‍ണന്റെ ഉത്തരവില്‍ ചൂണ്ടിക്കാണിക്കുന്നു. വിഷയത്തില്‍ പാര്‍ലമെന്റ് ഒരു തീരുമാനം എടുക്കുന്നത് വരെ ഇവരെ വിദേശയാത്ര ചെയ്യാന്‍ അനുവദിക്കരുതെന്ന് വിദേശകാര്യമന്ത്രാലയത്തിനും എയര്‍പോര്‍ട്ട് അതോറിറ്റിയോടും ഉത്തരവിലൂടെ ആവശ്യപ്പെട്ടിട്ടുണ്ട്.
സുപ്രീം കോടതി ചീഫ് ജസ്റ്റിസ് ഉള്‍പ്പെടെയുള്ള ജഡ്ജിമാര്‍ തന്റെ 'വീട്ടിലെ കോടതി'യില്‍ ഹാജരാകണമെന്ന് ആവശ്യപ്പെട്ട് പുറപ്പെടുവിച്ച ഉത്തരവു പാലിച്ചില്ലെന്ന കാരണം കാട്ടി സി.എസ്. കര്‍ണന്‍ ജാമ്യമില്ലാ വാറന്റ് പുറപ്പെടുവിച്ചിരുന്നു. കോടതിയലക്ഷ്യക്കേസില്‍ ജസ്റ്റിസ് കര്‍ണന്‍ മാര്‍ച്ച് 31നു സുപ്രീംകോടതിയില്‍ ഹാജരായിരുന്നു. അന്നു ജഡ്ജിമാര്‍ തന്നെ അപമാനിച്ചെന്നാണു ജസ്റ്റിസ് കര്‍ണന്‍ പറയുന്നത്. ഇക്കാരണം കാട്ടിയാണു പട്ടികവിഭാഗങ്ങള്‍ക്കെതിരായ അക്രമം തടയുന്ന നിയമത്തിന്റെ അടിസ്ഥാനത്തില്‍ സുപ്രീം കോടതി ചീഫ് ജസ്റ്റിസ് ഉള്‍പ്പെടെയുള്ളവര്‍ക്കു കര്‍ണന്‍ സമന്‍സ് പുറപ്പെടുവിച്ചത്. ഈ കേസിലാണ് ഇപ്പോള്‍ ജഡ്ജിമാരെ അറസ്റ്റ് ചെയ്ത് ജയിലില്‍ അടയ്ക്കാന്‍ ഉത്തരവിട്ടതും.
സമന്‍സ് കിട്ടിയ സുപ്രീം കോടതി ജഡ്ജിമാര്‍ കഴിഞ്ഞദിവസം ജസ്റ്റിസ് കര്‍ണന്റെ മാനസികനില പരിശോധിക്കണമെന്ന് ആവശ്യപ്പെട്ടിരുന്നു. ഇതനുസരിച്ച് മെഡിക്കല്‍ സംഘം കര്‍ണന്റെ വസതിയില്‍ എത്തിയെങ്കിലും പരിശോധന നിയമവിരുദ്ധമാണെന്ന് കാണിച്ച് കര്‍ണന്‍ അവരെ തിരികെ അയയ്ക്കുകയായിരുന്നു. മദ്രാസ് ഹൈക്കോടതി ചീഫ് ജസ്റ്റിസിനും വിരമിച്ച ജഡ്ജിമാര്‍ക്കുമെതിരെ അഴിമതി ആരോപിച്ചു സുപ്രീം കോടതി ചീഫ് ജസ്റ്റിസ്, പ്രധാനമന്ത്രി, പ്രതിപക്ഷ നേതാവ് എന്നിവര്‍ക്കു കത്തയച്ചതിനാണു കര്‍ണനെതിരെ കോടതിയലക്ഷ്യ നടപടി തുടങ്ങിയത്.
അന്നു മദ്രാസ് ഹൈക്കോടതിയില്‍നിന്നു കൊല്‍ക്കത്ത ഹൈക്കോടതിയിലേക്കു സ്ഥലംമാറ്റിയ സുപ്രീം കോടതി നടപടി കര്‍ണന്‍ സ്വയം സ്‌റ്റേ ചെയ്‌തെങ്കിലും പിന്നീട് കൊല്‍ക്കത്തയിലെത്തുകയായിരുന്നു.
https://www.facebook.com/Malayalivartha
