ഉമര് ഫയാസ് കൊലപ്പെടുന്നതിന് മുമ്പ് ക്രൂരമര്ദ്ദനത്തിന് ഇരയായി
കശ്മീരില് ഭീകരര് തട്ടിക്കൊണ്ടുപോയി കൊലപ്പെടുത്തിയ യുവ സൈനികന് ഉമര് ഫയാസ് ക്രൂരമര്ദനത്തിന് ഇരയായതായി റിപ്പോര്ട്ട്. വെടിവെച്ച് കൊല്ലുന്നതിന് മുമ്പ് ഫയാസിന്റെ ശരീരത്തില് നിരവധി തവണ ഭീകരര് തോക്ക് ഉപയോഗിച്ച് അതിക്രൂരമായി മര്ദ്ദിച്ചിരുന്നു. കൂടാതെ തലക്കും താടിയെല്ലിനും വയറിനും നിരവധി തവണ വെടിയേറ്റതായും മെഡിക്കല് റിപ്പോര്ട്ട് വ്യക്തമാക്കുന്നു. ഷോപിയാനിലെ ഹര്മൈന് ഗ്രാമത്തില് അമ്മാവന്റെ മകളുടെ വിവാഹച്ചടങ്ങില് പങ്കെടുക്കാന് എത്തിയ ലെഫ്റ്റനന്റ് ഉമര് ഫയാസിനെ ബുധനാഴ്ചയാണ് കൊല്ലപ്പെട്ട നിലയില് കണ്ടെത്തിയത്.
ഡല്ഹി സൈനിക കേന്ദ്രത്തില് ഉമര് ഫയാസിന് പരിശീലനം നല്കിയ മേജര് അവ്ദേശ് ചൗധരി സൈനികനെകുറിച്ച് പറഞ്ഞപ്പോള് വാചാലനായി. പരിശീലന സമയത്ത് എപ്പോഴും താന് ഉമറിനെ ശ്രദ്ധിച്ചിരുന്നതായി അവ്ദേശ് ചൗധരി ഓര്മിച്ചു. മറ്റുള്ളവരെ അപേക്ഷിച്ച് ജോലിയില് വലിയ ഉത്സാഹം ഉമര് കാണിച്ചിരുന്നു. അവന്റെ കണ്ണില് എപ്പോഴും തീപ്പൊരി കാണാമായിരുന്നു. അതാണ് തനിക്ക് ഉമറിനെ ഇഷ്ടപ്പെടാന് കാരണമെന്നും ചൗധരി പറഞ്ഞു.
ഭീകരവാദ പ്രവര്ത്തനം ശക്തമായ കുല്ഗാം ജില്ലക്കാരനായ ഉമര് ഫയാസ് ആദ്യം ഇന്ഫന്ട്രി വിഭാഗത്തിലാണ് സേവനമനുഷ്ഠിച്ചത്. കഴിഞ്ഞ വര്ഷം ഡിസംബര് 10നാണ് സൈന്യത്തിലെ രണ്ടാം രജപുത്താന റൈഫിള്സില് ജമ്മുവിലെ അഖ്നൂര് മേഖലയില് നിയമനം ലഭിക്കുന്നത്. പുണെയിലെ നാഷനല് ഡിഫന്സ് അക്കാദമിയില് നിന്ന് ഉമര് ഫയാസ് പരിശീലനം നേടിയിരുന്നു. അക്കാദമി ഹോക്കി ടീമില് അംഗവുമായിരുന്നു. മേയ് 25ന് അവധി കഴിഞ്ഞ് സൈനിക ക്യാമ്പിലേയ്ക്ക് മടങ്ങേണ്ട ഉമര് സെപ്റ്റംബറില് യുവ ഓഫിസര്മാര്ക്കുള്ള പരിശീലനത്തില് പങ്കെടുക്കാനുള്ള ഒരുക്കത്തിലായിരുന്നു.
https://www.facebook.com/Malayalivartha
