രാജ്യത്ത് ഇനി നടക്കാനിരിക്കുന്ന എല്ലാ നിയമസഭ ലോക്‌സഭാ തെരഞ്ഞെടുപ്പിലും വിവിപാറ്റ് ഘടിപ്പിച്ച വോട്ടിങ് യന്ത്രങ്ങളാകും പൂര്‍ണമായും ഉപയോഗിക്കുകയെന്ന് കേന്ദ്ര തെരഞ്ഞെടുപ്പ് കമീഷന്‍ വ്യക്തമാക്കി. വോട്ടിങ് യന്ത്രങ്ങളുടെ വിശ്വാസ്യതയില്‍ ഗുരുതര ആക്ഷേപങ്ങളുയര്‍ന്ന സാഹചര്യത്തില്‍ വെള്ളിയാഴ്ച വിളിച്ചുചേര്‍ത്ത അംഗീകൃത ദേശീയ സംസ്ഥാന രാഷ്ട്രീയപാര്‍ടികളുടെ യോഗത്തിലാണ് കമീഷന്‍ ഈ ഉറപ്പ് നല്‍കിയത്.

വോട്ടിങ് യന്ത്രങ്ങളില്‍ ഏതെങ്കിലും വിധത്തില്‍ തിരിമറി സാധ്യമാണോയെന്ന കാര്യത്തില്‍ രാഷ്ട്രീയപാര്‍ട്ടി പ്രതിനിധികളെ വിളിച്ചുവരുത്തി വോട്ടിങ് യന്ത്രങ്ങള്‍ കൈമാറിയുള്ള പരസ്യ പരിശോധനയും കമീഷന്‍ നടത്തും. ഇതിന്റെ തീയതി പിന്നീട് അറിയിക്കാമെന്ന് മുഖ്യ തെരഞ്ഞെടുപ്പ് കമീഷണര്‍ നസീം സെയ്ദി പറഞ്ഞു.

വോട്ടിങ് യന്ത്രങ്ങളുടെ കാര്യത്തില്‍ ഉയര്‍ന്നുവന്ന ആക്ഷേപങ്ങള്‍ അടിസ്ഥാനരഹിതമാണെന്ന് മുഖ്യ തെരഞ്ഞെടുപ്പ് കമീഷണര്‍ ആമുഖപ്രസംഗത്തില്‍ പറഞ്ഞു. തെരഞ്ഞെടുപ്പുപ്രക്രിയ കുറ്റമറ്റതാക്കുന്നതിനുള്ള ഏത് ശ്രമത്തെയും സ്വാഗതം ചെയ്യും. ഇനിയുള്ള തെരഞ്ഞെടുപ്പുകളില്‍ പൂര്‍ണമായും വിവിപാറ്റുകള്‍ ഉപയോഗിക്കുന്നതിനൊപ്പംതന്നെ ഒരു നിശ്ചിത ശതമാനം വിവിപാറ്റ് സ്‌ളിപ്പുകള്‍ എണ്ണിത്തിട്ടപ്പെടുത്തും. യന്ത്രത്തിലെ വോട്ടുകണക്കും വിവിപാറ്റ് കണക്കും ആനുപാതികം തന്നെയെന്ന് ഉറപ്പാക്കാനാണിത്.

വിവിപാറ്റ് എന്നാല്‍
സമ്മതിദാനാവകാശം രേഖപ്പെടുത്തുമ്പോള്‍ കൃത്യമായി തന്നെയാണ് രേഖപ്പെടുത്തിയതെന്ന് വോട്ടര്‍ക്ക് ബോധ്യപ്പെടാന്‍ സഹായിക്കുന്നതാണ് വോട്ടര്‍ വെരിഫയബിള്‍ പേപ്പര്‍ ഓഡിറ്റ് ട്രയല്‍(വിവിപിഎ) അഥവാ വെരിഫയബിള്‍ പേപ്പര്‍ റെക്കോര്‍ഡ്(വിപിആര്‍)

വോട്ടു ചെയ്തു കഴിയുമ്പോള്‍ തന്നെ വോട്ടിങ് യന്ത്രത്തില്‍ നിന്ന് വോട്ട് ലഭിച്ച സ്ഥാനാര്‍ത്ഥിയുടെ പേരും ചിഹ്നവും രേഖപ്പെടുത്തി പുറത്തേയ്ക്ക് വരുന്ന കടലാസാണ് വിവിപിഎ. ഇത് വോട്ടര്‍ക്ക് പരിശോധിച്ച് ബോധ്യപ്പെടാം.
യന്ത്രത്തിലെ വോട്ടിന്റെ കാര്യത്തില്‍ ഏതെങ്കിലും തരത്തിലുള്ള തര്‍ക്കങ്ങള്‍ വന്നാല്‍ വിവിപാറ്റുകള്‍ എണ്ണി തിട്ടപ്പെടുത്തി യഥാര്‍ത്ഥ വോട്ടു കണക്കാക്കാം.

തെരഞ്ഞെടുപ്പുകളില്‍ പണത്തിന്റെ ദുരുപയോഗവും കോഴയും തടയുന്നതിന് പരിഷ്‌കാരങ്ങള്‍ ആവശ്യമാണ്. രാഷ്ട്രീയപാര്‍ട്ടികളുടെ ഫണ്ടില്‍ സുതാര്യത ഉറപ്പാക്കാന്‍ ആദായനികുതി നിയമത്തിലും ജനപ്രാതിനിധ്യ നിയമത്തിലും ഭേദഗതികള്‍ വേണമെന്നും മുഖ്യ തെരഞ്ഞെടുപ്പ് കമീഷണര്‍ പറഞ്ഞു.

വോട്ടിങ് യന്ത്രത്തിന്റെ ഉപയോഗം കൂടുതല്‍ വിശ്വാസയോഗ്യമാക്കണമെന്ന് കോണ്‍ഗ്രസും ഇടതുപക്ഷപാര്‍ടികളും ആവശ്യപ്പെട്ടു. വോട്ടിങ് യന്ത്രങ്ങളില്‍ വിവിപാറ്റുകള്‍ ഘടിപ്പിക്കുന്ന പ്രക്രിയ എത്രയും വേഗത്തില്‍ പൂര്‍ത്തീകരിക്കണമെന്ന് സിപിഐ എമ്മിനെ പ്രതിനിധാനം ചെയ്ത് യോഗത്തില്‍ പങ്കെടുത്ത കേന്ദ്ര കമ്മിറ്റി അംഗം നീലോല്‍പ്പല്‍ ബസു ആവശ്യപ്പെട്ടു.

വോട്ടിങ് യന്ത്രങ്ങളുടെ വിശ്വാസ്യതയില്‍ നിരവധി രാഷ്ട്രീയപാര്‍ട്ടികള്‍ സംശയം പ്രകടിപ്പിച്ചതിനെതുടര്‍ന്ന് കമീഷന്‍ ഡയറക്ടര്‍ ജനറല്‍ സുധീപ് ജയിന്‍ യന്ത്രങ്ങളുടെ പ്രവര്‍ത്തനരീതിയും പ്രക്രിയയും മറ്റും വിശദീകരിച്ചു. വോട്ടിങ് യന്ത്രങ്ങളുടെ കാര്യത്തില്‍ പാര്‍ട്ടികള്‍ പ്രകടമാക്കിയ ആശങ്കകളും സംശയങ്ങളും ഗൗരവത്തോടെ പരിഗണിക്കുമെന്ന് നസീം സെയ്ദി ഉറപ്പുനല്‍കി. 

2013 സെപ്തംബറില്‍ നാഗാലാന്‍ഡിലെ നോക്‌സെന്‍ നിയമസഭാ മണ്ഡലത്തിലേക്ക് നടന്ന തെരഞ്ഞെടുപ്പിലാണ് രാജ്യത്ത് വിവിപാറ്റ് യന്ത്രങ്ങള്‍ പൂര്‍ണമായും ഉപയോഗിച്ചത്. 2017ലെ ഗോവ നിയമസഭാ തെരഞ്ഞെടുപ്പില്‍ പൂര്‍ണമായും വിവിപാറ്റ് യന്ത്രങ്ങളാണ് ഉപയോഗിച്ചത്.