ഭാഗ്യദേവത അനുഗ്രഹിച്ചെങ്കിലും തിരിച്ചറിയല് കാര്ഡിന്റെ രൂപത്തില് ഗ്രഹപ്പിഴ മുന്നില്...ലക്ഷപ്രഭു മടങ്ങിയെത്തുമെന്ന പ്രതീക്ഷയില് ബാങ്കില് കാത്തിരിക്കുകയാണു സമ്മാനാര്ഹമായ ഭാഗ്യക്കുറി ടിക്കറ്റ്!
എന്തിനും ഏതിനും ആധാര് കാര്ഡ് നിര്ബന്ധമാണ് നമ്മുടെ നാട്ടില്. ചില സമയത്ത് ആധാര് കാര്ഡിന് വീടിന്റെ ആധാരത്തിനേക്കാള് വിലയുണ്ട്. സംസ്ഥാന ഭാഗ്യക്കുറിയുടെ ഒന്നാം സമ്മാനമായ 65 ലക്ഷം രൂപ അടിച്ചെങ്കിലും പണം കൈപ്പറ്റാന് തിരിച്ചറിയല് രേഖകളൊന്നും കയ്യിലില്ലാത്തതു കാരണം സമ്മാനാര്ഹനു ആസാമിലെ വീട്ടിലേക്ക് തിരികെ പോകേണ്ടി വന്നു. ചലഞ്ച് എന്ന അസം കാരനാണ് ഈ അവസ്ഥ ഉണ്ടായത് . ചലഞ്ച് നാട്ടില് പോയിട്ട് ഒരാഴ്ച്ച കഴിഞ്ഞു.
ചേറൂരില് പ്രവര്ത്തിക്കുന്ന ഇമേജ് ലക്കി സെന്ററില്നിന്ന് ഒന്നരയാഴ്ച മുന്പു വിറ്റുപോയ പൗര്ണമി ഭാഗ്യക്കുറിക്കാണ് ഒന്നാം സമ്മാനമടിച്ചത്. കടയുടമ ഫ്രിന്റോ കാഞ്ഞിരത്തിങ്കല് സമ്മാനജേതാവിനെ തിരക്കി നാടൊട്ടുക്കു നടന്നെങ്കിലും കണ്ടെത്താനായില്ല. എന്നാല് അടുത്ത ദിവസം ലോട്ടറിയടിച്ചതു തനിക്കാണെന്നും എസ്ബിഐ ശാഖയില് ടിക്കറ്റ് ഏല്പ്പിച്ചിട്ടുണ്ടെന്നു അറിയിച്ചുകൊണ്ട് ചലഞ്ച് ഫോണ് ചെയ്തിരുന്നു. ആധാര് കാര്ഡും പാന് കാര്ഡും അടക്കമുള്ള രേഖകള് ബാങ്ക് ആവശ്യപ്പെട്ടെങ്കിലും ഒന്നുപോലും കയ്യിലില്ലാത്തതിനാല് താന് അസമിലേക്കു മടങ്ങിപ്പോവുകയാണെന്നും ഉടന് മടങ്ങിയെത്തുമെന്നും ചഞ്ചല് പറഞ്ഞിരുന്നു. എന്നാല് അതിനുശേഷം ചഞ്ചലിനെ ഫോണില് ബന്ധപ്പെടാന് കഴിഞ്ഞിട്ടില്ല.
ലോട്ടറി ടിക്കറ്റ് ബാങ്കിന്റെ ഏതു ശാഖയിലാണ് ഏല്പിച്ചതെന്നു പോലും വ്യക്തമല്ല. കെട്ടിട നിര്മാണ ജോലികള്ക്കും മറ്റുമായാണു ചഞ്ചല് കേരളത്തിലെത്തിയത്. അസമില് എവിടെയാണ് ഇയാളുടെ വീടെന്നോ വിലാസമേതെന്നോ അറിയാത്തതിനാല് അന്വേഷിച്ചു കണ്ടെത്താന് മാര്ഗമില്ല. ആര്വൈ 883346 ആണ് ഒന്നാം സമ്മാനത്തിന് അര്ഹമായ ടിക്കറ്റ് നമ്പര്.
https://www.facebook.com/Malayalivartha
