ചരക്കു സേവന നികുതി (ജിഎസ്ടി) നടപ്പാകുന്നതോടെ ധാന്യങ്ങള്‍ ഉള്‍പ്പെടെയുള്ള ഭക്ഷ്യവസ്തുക്കള്‍ക്ക് വില കുറയുമെന്ന് ധനമന്ത്രി അരുണ്‍ ജയ്റ്റ്‌ലി. ശ്രീനഗറില്‍ ചേര്‍ന്ന ജിഎസ്ടി കൗണ്‍സില്‍ യോഗത്തില്‍ 1211 ഉല്‍പന്നങ്ങളുടെ നികുതി നിശ്ചയിച്ചു. ഭൂരിപക്ഷവും 18 ശതമാനം നികുതിയില്‍ വരുന്നവയാണ്. സ്വര്‍ണം, ബീഡി, ചെറുകാറുകള്‍, പാക്കറ്റിലുള്ള ഭക്ഷണം എന്നിവയുള്‍പ്പെടെയുള്ള ആറ് ഉല്‍പ്പന്നങ്ങളുടെ നികുതി നിശ്ചയിച്ചിട്ടില്ല. അടുത്ത യോഗത്തില്‍ ഇക്കാര്യത്തിലും തീരുമാനമുണ്ടാകുമെന്നാണ് കരുതുന്നത്.

യോഗത്തില്‍ മിക്കവാറും ഉല്‍പന്നങ്ങളുടെ നികുതി കുറയ്ക്കുകയാണ് ചെയ്തതെന്ന് അരുണ്‍ ജയ്റ്റ്‌ലി മാധ്യമങ്ങളോട് പ്രതികരിച്ചു. 81 ശതമാനം ഉല്‍പ്പന്നങ്ങളുടെയും നികുതി 18 ശതമാനമോ അതിനുതാഴെയോ ആണെന്ന് റവന്യൂ സെക്രട്ടറി ഹസ്മുഖ് ആദിയ അറിയിച്ചു. 19 ശതമാനം ഉല്‍പ്പന്നങ്ങള്‍ മാത്രമാണ് ഏറ്റവും കൂടുതല്‍ നികുതിയായ 28 ശതമാനം നല്‍കേണ്ടിവരൂ എന്നും അദ്ദേഹം പറഞ്ഞു. ഏതാണ്ട് നാനൂറോളം ഉല്‍പ്പന്നങ്ങള്‍ക്ക് നിലവില്‍ തീരുവയും മൂല്യ വര്‍ധിത നികുതിയുമില്ല.

ജിഎസ്ടി വരുമ്പോള്‍ ഏതാണ്ട് ഏഴ് ശതമാനം ഉല്‍പ്പനങ്ങള്‍ക്ക് തീരുവയും മൂല്യ വര്‍ധിത നികുതിയുമുണ്ടാവില്ലെന്നും ധനമന്ത്രി അറിയിച്ചു. തലമുടിയില്‍ ഉപയോഗിക്കുന്ന എണ്ണ, ടൂത്ത് പേസ്റ്റ്, സോപ്പുകള്‍ തുടങ്ങിയവയുടെ നികുതി 28 ശതമാനത്തില്‍ നിന്നും 18 ശതമാനമാക്കി കുറച്ചു. പഞ്ചസാര, ചായ, കാപ്പി തുടങ്ങിയവയുടെ നികുതി അഞ്ച് ശതമാനമാണ്.

അന്തിമ തീരുമാനം വെള്ളിയാഴ്ച ചേരുന്ന യോഗത്തിലുണ്ടാകുമെന്നാണ് കരുതുന്നത്. ജൂലൈ ഒന്നു മുതലാണ് രാജ്യത്ത് ജിഎസ്ടി പ്രാബല്യത്തില്‍ വരുന്നത്.


ജൃശിഇേഹീലെ