പശുക്കളെ അനധികൃതമായി കടത്തുന്നുവെന്ന് ആരോപിച്ച് തമിഴ്‌നാട്ടിലേക്കു പശുക്കളുമായിവന്ന സംഘത്തിനു രാജസ്ഥാനില്‍ ക്രൂര മര്‍ദ്ദനം. സംഘപരിവാറിന്റെ ഗോ രക്ഷാ പ്രവര്‍ത്തകരാണ് മര്‍ദ്ദിച്ചത്. നൂറോളം പേര്‍ ചേര്‍ന്നാണ് ബര്‍മര്‍ ജില്ലയില്‍ അക്രമം അഴിച്ചുവിട്ടത്. സംഭവവുമായി ബന്ധപ്പെട്ടു നാലുപേരെ പൊലീസ് അറസ്റ്റ് ചെയ്തു. 50 പേര്‍ക്കെതിരെ കേസെടുത്തിട്ടുണ്ട്.

തമിഴ്‌നാട് മൃഗസംരക്ഷണ വകുപ്പ് ജയ്‌സാല്‍മീറില്‍നിന്നു വാങ്ങിയ പശുക്കളെ കൊണ്ടുവരികയായിരുന്ന ലോറികളാണു ഗോസംരക്ഷകര്‍ ദേശീയപാത15ല്‍ തടഞ്ഞത്. തമിഴ്‌നാട് സര്‍ക്കാരിലെ ഉദ്യോഗസ്ഥരും ലോറിയിലുണ്ടായിരുന്നു. ലോറികള്‍ തടഞ്ഞ അക്രമിസംഘം ദേശീയപാതയിലെ ഗതാഗതം പൂര്‍ണമായും തടസപ്പെടുത്തി. വാഹനങ്ങള്‍ക്കുനേരെ കല്ലെറിഞ്ഞു. പശുക്കളെ അനധികൃതമായി കടത്തുന്നുവെന്നായിരുന്നു ആരോപണം.

അഞ്ചു ട്രക്കുകളിലായാണു പശുക്കളെ കൊണ്ടുവന്നത്. എല്ലാ രേഖകളും സഹിതമാണു യാത്രയെന്നു അധികൃതര്‍ പറഞ്ഞെങ്കിലും ഗോസംരക്ഷകര്‍ വകവച്ചില്ല. സര്‍ക്കാര്‍ ഉദ്യോഗസ്ഥരെയും ലോറി െ്രെഡവര്‍മാരെയും ക്ലീനര്‍മാരെയും പശുസംരക്ഷകര്‍ അക്രമിച്ചു. ട്രക്കിനു തീവയ്ക്കാനും ശ്രമമുണ്ടായി. അടുത്തുള്ള പൊലീസ് സ്‌റ്റേഷനില്‍ അഭയം പ്രാപിച്ചാണ് സംഘം അക്രമികളില്‍നിന്നു രക്ഷപ്പെട്ടത്. പരുക്കേറ്റവര്‍ക്കു പ്രാഥമിക ചികില്‍സ നല്‍കി.

എല്ലാവിധ അനുമതിപത്രങ്ങളോടെയാണു തമിഴ്‌സംഘം സഞ്ചരിച്ചതെന്നും എന്നാല്‍ അക്രമികള്‍ വാഹനങ്ങള്‍ തടഞ്ഞു കല്ലേറു നടത്തുകയായിരുന്നെന്നും എസ്പി ഗഗന്‍ദീപ് സിംഗ്ല പറഞ്ഞു. പശുക്കളെ താല്‍ക്കാലിക ഷെല്‍ട്ടറിലേക്കു മാറ്റി. അക്രമം ഗൗരവത്തില്‍ എടുക്കാതിരുന്ന ഏഴു പൊലീസുകാര്‍ക്കെതിരെയും നടപടിയെടുത്തു. വിവരമറിഞ്ഞിട്ടും സംഭവസ്ഥലത്ത് എത്താന്‍ വൈകിയതിനാണ് നടപടിയെന്നും എസ്പി അറിയിച്ചു.