ഇന്ധനവില ദിവസേന മാറ്റാനുള്ള തീരുമാനം ഇന്നുമുതല്‍ നടപ്പിലാകുമ്പോള്‍ ആശങ്കയിലാണു പമ്പുടമകളും ഉപഭോക്താക്കളും. ഇന്നുമുതല്‍ എല്ലാദിവസവും രാവിലെ ആറു മണിക്കു പെട്രോളിയം ഉല്‍പ്പന്നങ്ങളുടെ വില നിശ്ചയിക്കാനാണ് കേന്ദ്ര സര്‍ക്കാര്‍ അനുവാദം നല്‍കിയിരിക്കുന്നത്. കമ്പ്യൂട്ടര്‍ സംവിധാനത്തിലൂടെ എണ്ണ കമ്പനികള്‍ തന്നെ അവരുടെ ഓഫീസില്‍നിന്ന് വില മാറ്റുന്ന ഓട്ടോമേഷന്‍ സംവിധാനം കേരളത്തിലെ എല്ലാ പെട്രോള്‍ പമ്പുകളിലുമില്ല.

25 ശതമാനം പമ്പുകളിലേ ഈ സംവിധാനമുള്ളൂ. സോഫ്റ്റുവെയര്‍ പ്രശ്‌നങ്ങളുമുണ്ട്. ഈ സംവിധാനമില്ലാത്ത പമ്പുകളില്‍ രാവിലെ ആറു മണിക്കു തന്നെ പമ്പുടമയോ ചുമതലപ്പെടുത്തുന്ന ആളോ പ്രത്യേക പാസ് വേഡ് ഉപയോഗിച്ചു വില മാറ്റണം. 20 ശതമാനം വനിതാ ഡീലര്‍മാരുള്ള മേഖലയില്‍ ഈ തീരുമാനം വലിയ പ്രത്യാഘാതം സൃഷ്ടിക്കുമെന്നു ഡീലര്‍മാര്‍ പറയുന്നു.

എണ്ണവില അനുദിനം മാറുന്നതോടെ പമ്പുടമകളെ കാത്തിരിക്കുന്നതു നഷ്ടത്തിന്റെ നാളുകളാണെന്നും അവര്‍ വ്യക്തമാക്കുന്നു. പെട്രോളിയം മന്ത്രാലയം നടത്തുന്ന തുടര്‍ചര്‍ച്ചകളില്‍ തങ്ങള്‍ മുന്നോട്ടു വച്ച ആവശ്യങ്ങള്‍ അംഗീകരിക്കപ്പെടുമെന്ന പ്രതീക്ഷയിലാണു ഡീലര്‍മാര്‍. പണിമുടക്കിലേക്കു തല്‍ക്കാലമില്ലെന്നും അവര്‍ വ്യക്തമാക്കുന്നു. പെട്രോള്‍ വില ലീറ്ററിന് 1.12 രൂപയും ഡീസലിന് 1.24 രൂപയും കുറച്ചു. പുതിയ നിരക്ക് ഇന്നു രാവിലെ നിലവില്‍ വന്നു. അടുത്ത ദിവസം രാവിലെ ആറു മണി വരെയായിരിക്കും പ്രാബല്യം. നിരക്കുമാറ്റം അര്‍ധരാത്രി പ്രാബല്യത്തില്‍വരുന്ന പതിവ് ഇതോടെ മാറി. എണ്ണക്കമ്പനികള്‍ ഇനി എല്ലാ ദിവസവും രാവിലെ ആറിന് അതതു ദിവസത്തെ നിരക്ക് പ്രഖ്യാപിക്കും.

ഏതാനും പൈസയുടെ വ്യത്യാസമായിരിക്കും പ്രതിദിനം ഉണ്ടാവുക. വെബ്‌സൈറ്റ്, എസ്എംഎസ്, മൊബൈല്‍ ആപ് എന്നിവ വഴി വിലനിലവാരം അറിയാം. തൊട്ടടുത്ത ബങ്കിലെ വിലനിലവാരം അറിയാന്‍ കഴിയുംവിധമാണ് ആപ് ക്രമീകരിക്കുന്നത്. വിലമാറ്റം നിരീക്ഷിക്കാന്‍ ഇന്ത്യന്‍ ഓയില്‍ കോര്‍പറേഷന്‍ (ഐഒസി) രാജ്യത്ത് 87 കണ്‍ട്രോള്‍ റൂമുകള്‍ തുറക്കും. വിതരണക്കാര്‍ക്ക് പരിശീലന പരിപാടികളും സംഘടിപ്പിച്ചു. ഐഒസിയുടെ 16 സ്‌റ്റേറ്റ് ഓഫിസുകളില്‍ കണ്‍ട്രോള്‍ റൂം ഉണ്ടാകും.