പ്രണയമുണ്ടെന്ന സംശയത്തില്‍ സഹോദരിയെ തട്ടിക്കൊണ്ടു പോയി വിഷം കൊടുത്തു കൊന്ന രണ്ടുപേര്‍ പിടിയില്‍. രാജ്‌കോട്ടിനു സമീപത്തായിരുന്നു സംഭവം. തെളിവു നശിപ്പിക്കാനായി സ്വാഭാവിക മരണമെന്ന് വരുത്തി ശവസംസ്‌കാരവും നടത്തി. സംശയം തോന്നി പൊലീസ് നടത്തിയ അന്വേഷണത്തിലാണ് കൊലപാതകം പുറത്തറിഞ്ഞത്.

രാജ്‌കോട്ടിലെ പ്രമുഖ സ്വകാര്യ ധനകാര്യ സ്ഥാപന ഉടമയുടെ മകള്‍ ഇരുപത്താറുകാരി പൂനമാണ് കൊല്ലപ്പെട്ടത്. സഹോദരന്മാരായ ബിറണ്‍വാലയും രാജ്‌വീറുമാണ് പിടിയിലായത്. ഇവര്‍ക്കു വേണ്ട സഹായങ്ങള്‍ ചെയ്ത മൂന്നുപേരും അറസ്റ്റിലായി. ഏഴുവര്‍ഷം മുമ്പായിരുന്നു പൂനത്തിന്റെ വിവാഹം. അടുത്തിടെ ഇവര്‍ വിവാഹ മോചനം നേടി. തുടര്‍ന്ന് രക്ഷിതാക്കള്‍ക്കൊപ്പമായി താമസം. ഈ സമയം പൂനം മറ്റൊരു യുവാവുമായി അടുത്തു എന്ന സംശയമാണ് കൊലയ്ക്കു കാരണമായത്.

കുടുംബത്തിന്റെ മാനം പോകുമെന്ന ഭീതിയില്‍ സഹായികളുമായി ചേര്‍ന്ന് പദ്ധതി നടപ്പാക്കി. കഴിഞ്ഞ മാസം ഇരുപത്തഞ്ചിന് വീട്ടില്‍നിന്ന് തട്ടിയെടുത്ത പൂനത്തെ കുറച്ചകലെയുള്ള ഫാം ഹൗസിലെത്തിച്ച് ബലംപ്രയോഗിച്ച് വിഷം കുടിപ്പിക്കുകയായിരുന്നു. തല്‍ക്ഷണം പൂനം മരിച്ചു. സ്വാഭാവിക മരണമെന്ന രീതിയില്‍ പെട്ടെന്നു തന്നെ അന്ത്യകര്‍മ്മങ്ങളും നടത്തി.

സംഭവമറിഞ്ഞ പൊലീസ് ബന്ധുക്കളെയും സഹോദരന്മാരെയും ചോദ്യം ചെയ്‌തെങ്കിലും തുമ്പൊന്നും ലഭിച്ചില്ല. എന്നാല്‍ സഹോദരന്മാരുടെ മൊഴികളിലെ പൊരുത്തക്കേടുകള്‍ ശ്രദ്ധയില്‍പ്പെട്ടു. തുടര്‍ന്നു നടത്തിയ അന്വേഷണത്തിലാണ് പ്രതികള്‍ പിടിയിലായത്. ഇരുവരും കുറ്റം സമ്മതിച്ചു.