ജമ്മു കശ്മീരിലുണ്ടായ ഭീകരാക്രമണത്തില് ഓഫീസര് ഉള്പ്പെടെ ആറു പൊലീസുകാര്ക്ക് വീരമൃത്യു മൃതദേഹങ്ങള് വികൃതമാക്കി
ജമ്മു കശ്മീരിലുണ്ടായ ഭീകരാക്രമണത്തില് ഓഫീസര് ഉള്പ്പെടെ ആറു പൊലീസുകാര്ക്ക് വീരമൃത്യു. അനന്ത്നാഗ് ജില്ലയിലെ തജിവാര അചബലില് പൊലീസ് സംഘം സഞ്ചരിച്ച വാഹനവ്യൂഹത്തിന് നേരെയാണ് ആക്രമണം ഉണ്ടായത്. വീരമൃത്യുവരിച്ച പൊലീസുകാരുടെ മുഖം ഭീകരര് വികൃതമാക്കിയെന്നും അവരുടെ ആയുധങ്ങള് തട്ടിയെടുത്തെന്നും പൊലീസ് അറിയിച്ചു.
സ്റ്റേഷന് ഹൗസ് ഓഫിസര് (എസ്എച്ച്ഒ) സബ് ഇന്സ്പെക്ടര് ഫിറോസ് ധര് ആണ് വീരമൃത്യുവരിച്ച ഓഫിസര്. ഇദ്ദേഹം പുല്വാമ സ്വദേശിയാണ്. ആക്രമണം ഉണ്ടായപ്പോള് തന്നെ പൊലീസുകാര് ചെറുത്തുനില്ക്കാന് ശ്രമിച്ചെങ്കിലും ഭീകരര് ഇവരെ കീഴ്പ്പെടുത്തിയശേഷം തൊട്ടടുത്ത് നിന്ന് തലയിലേക്ക് വെടിയുതിര്ക്കുകയായിരുന്നു.
2010 ബാച്ചിലെ എസ്ഐയാണ് ഫിറോസ്. ഇദ്ദേഹം അനന്ത്നാഗിലെ ഡ്യൂട്ടിക്ക് ശേഷം തിരികെ പൊലീസ് സ്റ്റേഷനിലേക്ക് പോകുമ്പോഴാണ് വാഹനത്തിന് നേരെ ആക്രമണം ഉണ്ടായത്. ആറു പേരും സംഭവസ്ഥലത്തു വച്ചുതന്നെ മരിച്ചു. അഹമ്മദ്, കോണ്സ്റ്റബിളുമാരായ ഷാരിഖ് അഹമ്മദ്, തന്വീര് അഹമ്മദ്, ഷെറാസ് അഹമ്മദ്, ആസിഫ് അഹമ്മദ്, സബ്സാര് അഹമ്മദ് എന്നിവരാണ് വീരമൃത്യുവരിച്ച മറ്റു പൊലീസുകാര്.
പാക്കിസ്ഥാന് ആസ്ഥാനമായുള്ള ഭീകര സംഘടനയായ ലഷ്കറെ തയിബ ആണ് ആക്രമണത്തിന് പിന്നിലെന്ന് സംശയിക്കുന്നതായി ഉന്നത പൊലീസ് ഉദ്യോഗസ്ഥര് അറിയിച്ചു. വെള്ളിയാഴ്ച സൈന്യവും പൊലീസും സംയുക്തമായി കശ്മീരിലെ അര്വാനിയില് നടത്തിയ ഓപ്പറേഷനില് പ്രാദേശിക കമാന്ഡര് ജുനൈദ് മാട്ടൂ കൊല്ലപ്പെട്ടുവെന്നാണ് കരുതുന്നത്. ഇതിനുള്ള പ്രതികാരമാണ് പൊലീസ് വാഹനവ്യൂഹത്തിന് നേരെയുണ്ടായ ആക്രമണമെന്നു സംശയിക്കുന്നതായി പൊലീസ് ഉദ്യോഗസ്ഥര് പറഞ്ഞു.
വെള്ളിയാഴ്ച രാവിലെയാണ് വീട്ടില് ഒളിച്ചിരുന്ന ജുനൈദ് ഉള്പ്പെടെയുള്ള മൂന്നു ഭീകരര്ക്കുനേരെ സൈനിക നടപടിയുണ്ടായത്. മൂന്നു പേരും മരിച്ചുവെന്നാണ് കരുതുന്നത്. സൈന്യം മേഖലയില് തിരച്ചില് നടത്തുകയാണ്. വെള്ളിയാഴ്ച ജമ്മു കശ്മീരില് നിയന്ത്രണരേഖയ്ക്ക് സമീപം രജൗരി ജില്ലയില് പാക്കിസ്ഥാന് നടത്തിയ വെടിവയ്പ്പില് ഒരു സൈനികന് കൊല്ലപ്പെട്ടിരുന്നു. കഴിഞ്ഞ മൂന്നു ദിവസത്തിനിടെ ആറു തവണയാണ് പാക്കിസ്ഥാന് ഈ മേഖലയില് വെടിനിര്ത്തല് കരാര് ലംഘനം നടത്തിയത്.
വ്യാഴാഴ്ച കശ്മീരില് രണ്ടിടത്തു ഭീകരര് നടത്തിയ വെടിവയ്പില് രണ്ടു പൊലീസുകാര്ക്കു ജീവന് നഷ്ടമായിരുന്നു. ശ്രീനഗറിലെ ഹൈദര്പോറയില് പൊലീസ് വാഹനത്തിനു നേര്ക്കു ഭീകരര് നടത്തിയ വെടിവയ്പിലാണ് കോണ്സ്റ്റബിള് ഷെഹ്സാദ് കൊല്ലപ്പെട്ടത്.
കുല്ഗാമിലെ ബോഗന്ഡില് കോണ്സ്റ്റബിള് ഷബീര് അഹമ്മദിനെ വീടിനു പുറത്തുവച്ചു ഭീകരര് ആക്രമിക്കുകയായിരുന്നു. ഉടന് ആശുപത്രിയിലെത്തിച്ചെങ്കിലും ജീവന് രക്ഷിക്കാനായില്ല. ഇതിനു പിന്നാലെയാണ് വെള്ളിയാഴ്ച വീണ്ടും പൊലീസ് സംഘത്തിന് നേരെ ആക്രമണമുണ്ടായത്.
https://www.facebook.com/Malayalivartha
