ബാങ്ക് അക്കൗണ്ട് തുടങ്ങാനും 50,000 രൂപയ്ക്കു മുകളിലുള്ള പണമിടപാടുകള്‍ക്കും ആധാര്‍ നിര്‍ബന്ധമാക്കി. ഡിസംബര്‍ 31നകം ആധാറുമായി ബന്ധിപ്പിക്കാത്ത ബാങ്ക് അക്കൗണ്ടുകള്‍ അസാധുവാക്കും. കേന്ദ്ര ധനമന്ത്രാലയത്തിലെ റവന്യു വകുപ്പിന്റേതാണ് അറിയിപ്പ്. കെ.വൈ.സി. കൂടാതെ പരമാവധി 50,000 രൂപ വരെ നിക്ഷേപിക്കാവുന്ന ചെറു അക്കൗണ്ടുകള്‍ക്കു പുതിയ നിയന്ത്രണം കൊണ്ടുവന്നു. കോര്‍ ബാങ്കിങ് സംവിധാനമുള്ള ബാങ്ക് ശാഖകളില്‍ മാത്രമേ ഇത്തരം അക്കൗണ്ടുകള്‍ തുടങ്ങാനാകൂ.

വിദേശത്തുനിന്നു നിക്ഷേപം വരുന്നില്ലെന്നും കൈകാര്യം ചെയ്യാവുന്ന തുകയ്ക്കുള്ള മാസ/വാര്‍ഷിക പരിധി ലംഘിക്കുന്നില്ലെന്ന് ഉറപ്പാക്കാന്‍ കഴിയുന്ന ശാഖകളിലും ചെറു അക്കൗണ്ടുകള്‍ തുടങ്ങാം. പരമാവധി ഒരു വര്‍ഷമാണ് ഇത്തരം അക്കൗണ്ടുകളുടെ കാലാവധി.

ഔദ്യോഗികമായി സാധുതയുള്ള തിരിച്ചറിയല്‍ രേഖയ്ക്ക് അപേക്ഷ നല്‍കിയിട്ടുണ്ടെന്നു ബോധ്യപ്പെടുത്താന്‍ കഴിഞ്ഞാല്‍ കാലാവധി ഒരു വര്‍ഷം കൂടി നീട്ടിക്കിട്ടും. 50,000 രൂപയ്ക്കു മുകളിലുള്ള ഇടപാടുകള്‍ക്ക് വ്യക്തികളും കമ്പനികളും പങ്കാളിത്ത സ്ഥാപനങ്ങളും പാന്‍/ഫോം 60 രേഖപ്പെടുത്തുന്നതിനൊപ്പം ആധാര്‍ നമ്പറും നല്‍കണം. ജൂണ്‍ ഒന്നു മുതല്‍ പ്രാബല്യത്തോടെയാണു വ്യവസ്ഥ.

ആധാര്‍ ഇല്ലാത്തവര്‍ക്കു പുതിയ ബാങ്ക് അക്കൗണ്ടിന് അപേക്ഷിക്കണമെങ്കില്‍ ആധാര്‍ രജിസ്‌ട്രേഷന് അപേക്ഷ നല്‍കിയിട്ടുണ്ടെന്നു വ്യക്തമാക്കുന്ന തെളിവ് ഹാജരാക്കണം. ആറു മാസത്തിനകം ആധാര്‍ നമ്പര്‍ ചേര്‍ക്കുകയും വേണം.

ആധാര്‍ നമ്പര്‍ ബാങ്ക് അക്കൗണ്ടുമായി ബന്ധിപ്പിച്ചിട്ടില്ലാത്തവര്‍ ആധാര്‍, പാന്‍ നമ്പറുകള്‍ ഡിസംബര്‍ 31നു മുമ്പ് നല്‍കണം. അല്ലാത്തപക്ഷം തുടര്‍ന്ന് പണമിടപാടുകള്‍ നടത്താന്‍ കഴിയാത്തവിധം അക്കൗണ്ട് അസാധുവാകും.

കമ്പനികളുടെ പേരില്‍ ബാങ്ക് അക്കൗണ്ട് തുടങ്ങണമെങ്കില്‍ മാനേജര്‍മാരുടെയോ പണം കൈകാര്യം ചെയ്യാന്‍ ചുമതലപ്പെട്ട ഉദ്യോഗസ്ഥരുടെയോ ആധാര്‍ നമ്പറുകളാണു നല്‍കേണ്ടത്.പാന്‍ നമ്പറുമായി ആധാര്‍ ബന്ധിപ്പിക്കുന്നത് കഴിഞ്ഞ ബജറ്റിലൂടെ സര്‍ക്കാര്‍ നിര്‍ബന്ധമാക്കിയിരുന്നു. അതിനു പിന്നാലെയാണ് 2005ലെ പ്രിവന്‍ഷന്‍ ഓഫ് മണി ലോണ്ടറിങ് (മെയിന്റനന്‍സ് ഓഫ് റെക്കോഡ്‌സ്) ചട്ടങ്ങള്‍ ഭേദഗതി ചെയ്ത് വിജ്ഞാപനം പുറപ്പെടുവിച്ചത്.

പാന്‍ കാര്‍ഡിന് അപേക്ഷ നല്‍കുന്നതിനും ആദായനികുതി റിട്ടേണ്‍ സമര്‍പ്പിക്കുന്നതിനും ജൂലൈ മുതല്‍ ആധാര്‍ നിര്‍ബന്ധമാക്കിയ തീരുമാനം സുപ്രീം കോടതി അംഗീകരിച്ചതിനു പിന്നാലെയാണ് പുതിയ തീരുമാനം. നിലവില്‍ ആധാര്‍ ഇല്ലാത്തവരുടെ പാന്‍ അസാധുവാകില്ലെന്ന ഇളവ് മാത്രമാണ് സുപ്രീം കോടതി അനുവദിച്ചത്.