പ്രകോപനപരമായ പ്രസ്താവനകള്‍ കൊണ്ട് വാര്‍ത്തകളില്‍ ഇടം പിടിച്ച ബോളിവുഡ് നടന്‍ കെ.ആര്‍.കെ ചാമ്ബ്യന്‍സ് ട്രോഫി ഫൈനലില്‍ പരാജയപ്പെട്ട ഇന്ത്യന്‍ ടീമിനെതിരെ രൂക്ഷവിമര്‍ശനവുമായി രംഗത്തെത്തി. ഇന്ത്യന്‍ ക്രിക്കറ്റ് ടീമും ബി.സി.സി.ഐയും ചേര്‍ന്ന് ഒത്തുകളിയിലൂടെ രാജ്യത്തെ ജനങ്ങളെ വിഡ്ഢികളാക്കുകയായിരുന്നുവെന്ന് കെ.ആര്‍.കെ ആരോപിച്ചു.

130 കോടി ജനങ്ങളുടെ ആത്മാഭിമാനം പാകിസ്ഥാന് വിറ്റ ഇന്ത്യന്‍ നായകന്‍ വിരാട് കൊഹ്ലിയെ ജയിലിലടക്കണമെന്നും ഇന്ത്യന്‍ ടീമംഗങ്ങളെ ആജീവനാന്തം ക്രിക്കറ്റില്‍ നിന്നും വിലക്കണമെന്നും കെ.ആര്‍.കെ ആവശ്യപ്പെട്ടു. കൂടാതെ ഇന്ത്യന്‍ ജനതയെ വിഡ്ഡികളാക്കിയ ബി.സി.സി.ഐയുടെ അംഗീകാരം റദ്ദാക്കണമെന്നും അദ്ദേഹം വ്യക്തമാക്കി. തന്റെ ഔദ്യോഗിക ട്വിറ്റര്‍ പേജിലൂടെയാണ് അദ്ദേഹം വിവാദപരമായ പ്രസ്താവന നടത്തിയത്. മുന്‍കൂട്ടി തയ്യാറാക്കിയ തിരക്കഥയുടെ അടിസ്ഥാനത്തിലാണ് ഇന്ത്യന്‍ ടീം കലാശപോരാട്ടത്തില്‍ കളിച്ചതെന്നും അദ്ദേഹം കുറ്റപ്പെടുത്തി. 

ഇന്നലെ നടന്ന ചാമ്ബ്യന്‍സ് ട്രോഫി ഫൈനലില്‍ ഇന്ത്യയെ 180 റണ്‍സിന് തകര്‍ത്ത് പാകിസ്ഥാന്‍ കിരീടം നേടിയിരുന്നു. കളിയുടെ എല്ലാ മേഖലയിലും ഇന്ത്യ പൂര്‍ണ പരാജയമായിരുന്നു. പാകിസ്ഥാന്‍ ഉയര്‍ത്തിയ 339 റണ്‍സിന് പിന്തുടര്‍ന്ന ഇന്ത്യ 30.3 ഓവറില്‍ 158 റണ്‍സിന് ആള്‍ ഔട്ടാകുകയായിരുന്നു. ഇതിന് പിന്നാലെയാണ് ഇന്ത്യന്‍ ക്രിക്കറ്റ് ടീമിനെയും ബി.സി.സി.ഐയെയും കുറ്റപ്പെടുത്തി ബോളിവുഡ് താരം രംഗത്തെത്തിയത്.