ഓട്ടോഡ്രൈവര് വാങ്ങിയ പതഞ്ജലിയുടെ ആട്ടയില് എലിക്കാഷ്ഠം
പതഞ്ജലി ആട്ടയില് എലിക്കാഷ്ഠം. കടുത്തുരുത്തി പെരുവയിലെ പതഞ്ജലി സ്റ്റോറില് നിന്നു വാങ്ങിയ പതഞ്ജലി ആട്ടയിലാണ് എലിക്കാഷ്ഠം. ഓട്ടോഡ്രൈവറായ വടുകുന്നപ്പുഴ പുത്തന്വീട്ടുമാരിയില് കമലന് വാങ്ങിയ രണ്ടു കിലോ ആട്ടയിലാണ് എലിക്കാഷ്ഠം കണ്ടത്. ചപ്പാത്തിയുണ്ടാക്കാന് പാക്കറ്റ് പൊട്ടിച്ച് പാത്രത്തിലിട്ടപ്പോള് കമലന്റെ ഭാര്യയാണ് എലിക്കാഷ്ഠം കണ്ടെത്തിയത്. തുടര്ന്ന് കടയുടമയെ വിവരം അറിയിച്ചെങ്കിലും അവര്ക്ക് ഒന്നും ചെയ്യാന് കഴിയില്ലെന്ന് പറയുകയായിരുന്നു.
മൂവാറ്റുപുഴയിലെ ഏജന്സിയില് നിന്നാണ് പെരുവയിലെ സ്റ്റോറില് പതഞ്ജലി ഉല്പ്പന്നങ്ങള് എത്തുന്നത്. എലിപ്പനിപോലുള്ള മാരകമായ പനികള് പടര്ന്നു പിടിക്കുന്ന സഹാചര്യത്തില് ആട്ടയില് എലിക്കാഷ്ഠം കണ്ടെത്തിയ വിവരം ഹെല്ത്ത് ഇന്സ്പെകടറെ അറിയിച്ചപ്പോള് തങ്ങളല്ല നടപടിയെടുക്കേണ്ടത് എന്നു പറഞ്ഞ് അവരും ഒഴിഞ്ഞു മാറുകയായിരുന്നു. പകര്ച്ച പനികള് പടര്ന്നു പിടിക്കുമ്പോള് ആരോഗ്യ വകുപ്പ് അധികൃതര് നടപടിയെടുക്കാത്തതില് പ്രതിഷേധം ശക്തമാകുകയാണ്. തുടര്ന്നു ജില്ലാ ഭക്ഷ്യസുരക്ഷാ വിഭാഗത്തില് വിവരമറിയിച്ചപ്പോള് അവര് ആട്ടയുമായി കോട്ടയത്തോ, പാലയിലെയോ ഓഫീസില് നേരിട്ടെത്തി പരാതി നല്കാനായിരുന്നു അവരുടെയും മറുപടി.
ഒരു പാക്കറ്റ് ആട്ട വാങ്ങിയ ഓട്ടോഡ്രൈവര്ക്ക് കോട്ടയത്തോ, പാലയിലോ നേരിട്ടെത്തി പരാതി നല്കുക പ്രായോഗികമല്ലെന്നിരിക്കേയായിരുന്നു ഈ മറുപടി. ഇങ്ങനെയുള്ള ഒരുത്തരവാദിത്വമില്ലാത്ത മറുപടിയല്ല ജനങ്ങള് ഭക്ഷ്യസുരക്ഷാ വിഭാഗത്തില്നിന്ന് പ്രതീക്ഷിക്കുന്നത്. ഒരുനടപടിയും എടുക്കാത്ത സാഹചര്യത്തില് വകുപ്പ് മന്ത്രിക്കും, ഭക്ഷ്യ സുരക്ഷാ കമ്മിഷണര്ക്കും ഇന്നു പരാതി നല്കാനുള്ള തീരുമാനത്തിലാണു കമലന്. ഇവിടെനിന്നെങ്കിലും ഉചിതമായ പ്രതികരണം ലഭിക്കുമെന്ന പ്രതീക്ഷയിലാണ് കമലന്.
https://www.facebook.com/Malayalivartha
