എന്‍.ഡി.ഏയുടെ രാഷ്ട്രപതി സ്ഥാനാര്‍ത്ഥിയായ രാം നാഥ് കോവിന്ദിനെ വിമര്‍ശിച്ച് ട്വിറ്ററില്‍ പോസ്റ്റ് ഇട്ടതിനു മാധ്യമപ്രവര്‍ത്തക റാണാ അയ്യുബിനെതിരെ നിയമനടപടിക്കൊരുങ്ങി ബി.ജെ.പി. ബി.ജെ.പി വക്താവും സുപ്രീം കോടതി അഭിഭാഷകയുമായ നൂപുര്‍ ശര്‍മ്മയാണു റാണാ അയ്യുബിനെതിരെ ദളിത് അധിക്ഷേപത്തിനു നിയമനടപടിയാവശ്യപ്പെട്ട് ഡല്‍ഹി പോലീസ് കമ്മീഷണര്‍ക്ക് പരാതി നല്‍കിയത്.

രാം നാഥ് കോവിന്ദിനെ രാഷ്ട്രപതി സ്ഥാനാര്‍ഥിയാക്കുമെന്നുള്ള ബി.ജെ.പി അദ്ധ്യക്ഷന്‍ അമിത് ഷായുടെ പ്രസ്താവനയുടെ വാര്‍ത്ത ഷെയര്‍ ചെയ്തുകൊണ്ട് ' എന്നിട്ടുമവര്‍ പറയുന്നു പ്രതിഭാ പാട്ടീല്‍ ആയിരുന്നു ഏറ്റവും മോശമെന്ന് ' എന്നാണു റാണാ അയ്യൂബ് ട്വീറ്റ് ചെയ്തത്. എന്നാല്‍ രാം നാഥ് കോവിന്ദ് ദളിത് ആയതുകൊണ്ടാണു റാണ ഇപ്രകാരം പറഞ്ഞതെന്നാരോപിച്ചാണു ഡല്‍ഹി സ്വദേശിയായ നൂപുര്‍ ശര്‍മ്മ പരാതി നല്‍കിയത്.

റാണാ അയ്യൂബിന്റെ പ്രസ്താവന 'ലജ്ജാകരവും നിന്ദാപൂര്‍ണ്ണവും അപകീര്‍ത്തികരവും ജാതീയവു'മാണെന്ന് നൂപുര്‍ ശര്‍മ്മ തന്റെ പരാതിയില്‍ ആരോപിക്കുന്നു. പട്ടിക ജാതിപട്ടികവര്‍ഗ്ഗ വിഭാഗത്തില്‍പ്പെട്ടവര്‍ക്ക് നേരേയുള്ള അതിക്രമം തടയാനുള്ള നിയമത്തിന്റെ 3(r) പട്ടികജാതിവര്‍ഗ്ഗ വിഭാഗങ്ങളില്‍പ്പെട്ടവരെ മനപ്പൂര്‍വ്വമായി പൊതുസ്ഥലത്തുവെച്ച് അപമാനിക്കുകയോ ഭീഷണിപ്പെടുത്തുകയോ ചെയ്യുക, 3(u) എഴുതപ്പെട്ടതോ പറയപ്പെട്ടതോ ആയ വാക്കുകളിലൂടെയോ ചിഹ്നങ്ങള്‍/ ആംഗ്യങ്ങള്‍, ദൃശ്യാവിഷ്‌കാരം എന്നിവയിലൂടെയോ പട്ടികജാതിപട്ടികവര്‍ഗ്ഗവിഭാഗങ്ങളില്‍പ്പെട്ടവര്‍ക്കുനേരേ ശത്രുതയോ വെറുപ്പോ പ്രോത്സാഹിപ്പിക്കുന്ന കാര്യങ്ങള്‍ പ്രചരിപ്പിക്കുകപ എന്നീ വകുപ്പുകള്‍ ചുമത്തി റാണാ അയ്യൂബിനെതിരെ കേസെടുക്കണമെന്നാണു പരാതിയിലെ ആവശ്യം.

എന്നാല്‍ പൊതുരാഷ്ട്രീയത്തില്‍ വേണ്ടത്ര പ്രശസ്തിയില്ലാത്ത ഒരാളെ ആര്‍ എസ് എസിന്റെ നോമിനിയായതുകൊണ്ട് സ്ഥാനാര്‍ത്ഥിയാക്കിയതിലെ അനൌചിത്യമാണു റാണ തന്റെ ട്വീറ്റില്‍ ചൂണ്ടിക്കാട്ടിയതെന്നു റാണാ അയ്യൂബിനെ പിന്തുണയ്ക്കുന്നവര്‍ പറയുന്നു.