ചായക്കോപ്പയില്‍ നിന്നും പ്രധാനമന്ത്രിയിക്കുള്ള ആ ദൂരം മോഡി പിന്നിട്ടു. നരേന്ദ്രമോദി തരംഗത്തില്‍ ലോക്‌സഭാ തെരഞ്ഞെടുപ്പില്‍ ബിജെപിക്ക് ചരിത്രവിജയം. ബിജെപി ഒറ്റയ്ക്ക് കേവലഭൂരിപക്ഷം തികച്ചപ്പോള്‍ എന്‍ഡിഎയുടെ സീറ്റ് നില 337 കടന്നു. യുപി, ബിഹാര്‍, മഹാരാഷ്ട്ര എന്നീ സംസ്ഥാനങ്ങളിലെ ഭൂരിഭാഗം സീറ്റുകളും ഡല്‍ഹി, ഗുജറാത്ത്, രാജസ്ഥാന്‍ എന്നിവിടങ്ങളിലെ എല്ലാ സീറ്റുകളും ബിജെപി തൂത്തുവാരി. ഏറ്റവും വലിയ ഒറ്റ കക്ഷിയായ ബിജെപി ഒറ്റയ്ക്ക് കേവല ഭൂരിപക്ഷം നേടി. 280ലേറെ സീറ്റുകളിലാണ് ബിജെപി വിജയം നേടിയിരിക്കുന്നത്‌. 30 വര്‍ഷത്തിന് ശേഷമാണ് ഒരു കക്ഷി കേവലഭൂരിപക്ഷം ഒറ്റയ്ക്ക് നേടുന്നത് എന്ന പ്രത്യേകതയുമുണ്ട്‌. പ്രധാനമന്ത്രിയായി നരേന്ദ്ര മോദി അടുത്ത ബുധനാഴ്ച സത്യപ്രതിജ്ഞ ചെയ്യും. മന്‍മോഹന്‍ സിംഗ് നാളെ 12.30 ന് രാജി വെക്കും.

ലോക്‌സഭാ തെരഞ്ഞെടുപ്പില്‍ കനത്ത തിരിച്ചടിയാണ് കോണ്‍ഗ്രസ് നേരിട്ടത്. 2009ല്‍ 206 സീറ്റുകളില്‍ വിജയം നേടിയ കോണ്‍ഗ്രസ് നാല്‍പത്തിയഞ്ചില്‍ താഴെ സീറ്റിലേക്ക് ചുരുങ്ങി. കേന്ദ്ര മന്ത്രിമാര്‍ കൂട്ടത്തോല്‍വി ഏറ്റുവാങ്ങി.

അജയ് മാക്കന്‍, സല്‍മാന്‍ ഖുര്‍ഷിദ്, കപില്‍ സിബല്‍ തുടങ്ങി 30 കേന്ദ്രമന്ത്രിമാരാണ് തോല്‍വി അറിഞ്ഞത്. പ്രാദേശിക പാര്‍ട്ടികളായ ഡിഎംകെയ്ക്കും ബിഎസ്പിക്കും അക്കൗണ്ട് തുറക്കാനായില്ല. തമിഴ്‌നാട്ടില്‍ വന്‍ വിജയം നേടിയ എഐഎഡിഎംകെയാണ് ഏറ്റവും വലിയ മൂന്നാമത്തെ ഒറ്റ കക്ഷി.

പശ്ചിമ ബംഗാളില്‍ മമതാ തരംഗത്തില്‍ സിപിഐ(എം)ന് കാലിടറി. രണ്ട് സീറ്റുകളില്‍ മാത്രമാണ് ഇവിടെ സിപിഐ(എം)ന് വിജയിക്കാനായത്. ബിജെപിയുടെ പ്രധാനമന്ത്രി സ്ഥാനാര്‍ത്ഥി നരേന്ദ്ര മോദി മത്സരിച്ച രണ്ട് മണ്ഡലങ്ങളിലും മികച്ച വിജയം സ്വന്തമാക്കി. വഡോദരയില്‍ അഞ്ച്‌ലക്ഷത്തിലധികം വോട്ടുകള്‍ക്കാണ് മോദിയുടെ വിജയം. വാരണാസിയില്‍ ആംആദ്മി പാര്‍ട്ടി നേതാവ് അരവിന്ദ് കെജ്രിവാള്‍ മോദിക്ക് കനത്ത വെല്ലുവിളി ഉയര്‍ത്തുമെന്ന് പ്രതീക്ഷിക്കപ്പെട്ടിരുന്നെങ്കിലും പോരാട്ടം കാഴ്ച വെയ്ക്കാന്‍ കെജ്‌രിവാളിനും കഴിഞ്ഞില്ല.

ഹിന്ദി ഹൃദയഭൂമിയില്‍ ബിജെപിയുടെ സര്‍വാധിപത്യമാണ്. ഗുജറാത്ത്, രാജസ്ഥാന്‍, ഡല്‍ഹി എന്നീ സംസ്ഥാനങ്ങള്‍ ബിജെപി തൂത്തുവരി. ഉത്തരാഖണ്ഡിലും കര്‍ണാടകയിലും ഛത്തീസ്ഗഢിലും നേട്ടം കൊയ്യാനും ബിജെപിയ്ക്ക് കഴിഞ്ഞു. മോദി തരംഗം ശക്തമായ ഉത്തര്‍പ്രദേശില്‍ രണ്ടിടത്ത് മാത്രമാണ് കോണ്‍ഗ്രസ്    വിജയിച്ചത്. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha