ജീവന്‍ ത്യജിക്കേണ്ടി വന്നാലും ബംഗാള്‍ വിഭജനം അനുവദിക്കില്ലെന്ന് മമത ബാനര്‍ജി
ബംഗാള്‍ വിഭജനമെന്ന ആവശ്യത്തെ ഒരുതരത്തിലും അംഗീകരിക്കില്ലെന്ന് വ്യക്തമാക്കി മുഖ്യമന്ത്രി മമത ബാനര്‍ജി. ഡാര്‍ജലിംഗില്‍ സമാധാനവും സാധാരണ ജീവിതവും പുനഃസ്ഥാപിക്കാന്‍ രാഷ്ട്രീയ കക്ഷികള്‍ തയ്യാറാകണമെന്നും അവര്‍ പറഞ്ഞു. ബംഗാള്‍ വിഭജിച്ച് പുതിയ സംസ്ഥാനം രൂപീകരിക്കണമെന്ന ആവശ്യത്തില്‍ കഴിഞ്ഞ 48 ദിവസമായി ഡാര്‍ജലിംഗില്‍ ബന്ദ് നടക്കുകയാണ്.
എന്തും സംഭവിച്ചുകൊള്ളട്ടേ, സംസ്ഥാനം വിഭജിക്കാന്‍ താന്‍ ഒരിക്കലും അംഗീകരിക്കില്ല, അതിനുവേണ്ടി എന്റെ ജീവന്‍ ഉപേക്ഷിക്കാന്‍ തന്നെ തയ്യാറാണെന്ന് എല്ലാവരും ഓര്‍ക്കണം. എല്ലാ ജില്ലകളും നമ്മുടെ സ്വത്താണ്. എല്ലാ മതത്തിലും ജാതിയിലുംപെട്ടവര്‍ അവിടെയുണ്ട്. ഇത് ഇന്ത്യയാണ്. അതിനെ സംരക്ഷിക്കേണ്ടത് നമ്മുടെ കടമയാണ്. വിഭജിക്കുകയല്ല വേണ്ടത്. ഈ ഹില്‍സ് മേഖലയെ പശ്ചിമ ബംഗാളിലെ മറ്റെല്ലാ ജില്ലകളെയും പോലെ ഞാന്‍ സ്‌നേഹിക്കുന്നു. ഹില്‍സ് മേഖല പശ്ചിമ ബംഗാളിന്റെ ഭാഗമാണെന്ന് ജനങ്ങള്‍ മനസ്സിലാക്കണം, അത് ഭാവിയിലും നിലനില്‍ക്കണമെന്നും മമത നോര്‍ത്ത് ദിനജ്പൂരില്‍ നടന്ന റാലിയില്‍ പറഞ്ഞു.
ഡാര്‍ജലിംഗിന്റെ വികസനത്തിനായി എന്തും ചെയ്യുമെന്ന് വ്യക്തമാക്കിയ മമത ജനങ്ങള്‍ക്കിടയില്‍ പ്രശ്‌നങ്ങള്‍ സൃഷ്ടിക്കാനും കലാപമുണ്ടാക്കാനും ശ്രമിക്കുന്ന ഒന്നിനെയും അനുവദിക്കില്ലെന്നും അവര്‍ പറഞ്ഞു. പ്രത്യേക ഗോര്‍ഖലാന്‍്ഡ് ആവശ്യപ്പെട്ട് ഗോര്‍ഖ മുക്തിമോര്‍ച്ചയാണ് ഡാര്‍ജലിംഗില്‍ തുടര്‍ച്ചയായി ബന്ദ് ആചരിക്കുന്നത്.
https://www.facebook.com/Malayalivartha
