ഗുജറാത്തില് നിന്നും കോണ്ഗ്രസ് എംഎല്എ മാരെ മാറ്റിയ കര്ണാടകമന്ത്രിയുടെ വീട്ടില് റെയ്ഡ് ; 11 കോടി പിടിച്ചു
കര്ണാടകയിലെ റിസോര്ട്ടില് പാര്പ്പിച്ചിരിക്കുന്ന ഗുജറാത്തില്നിന്നുള്ള കോണ്ഗ്രസ് എം.എല്.എമാരുടെ സംരക്ഷണച്ചുമതലയുള്ള കര്ണാടക ഊര്ജമന്ത്രി ഡി.കെ. ശിവകുമാറിന്റെ വസതിയിലും സ്ഥാപനങ്ങളിലും ആദായനികുതി വകുപ്പിന്റെ റെയ്ഡ്. 11 കോടി രൂപ പിടിച്ചെടുത്തതായി ഔദ്യോഗിക വിശദീകരണം. ആദായനികുതി വകുപ്പിനെ ഉപയോഗിച്ചു ബി.ജെ.പി. രാഷ്ട്രീയം കളിക്കുകയാണെന്ന ആരോപണവുമായി കോണ്ഗ്രസ്.
റിസോര്ട്ട് രാഷ്ട്രീയത്തിനിടെ റെയ്ഡ് രാഷ്ട്രീയവും കൂടിയായതോടെ ഗുജറാത്ത് കോണ്ഗ്രസിലെ സംഭവവികാസങ്ങളെച്ചൊല്ലി ബി.ജെ.പി.കോണ്ഗ്രസ് പോര് രൂക്ഷം. ഗുജറാത്തില് എട്ടിന് രാജ്യസഭാ തെരഞ്ഞെടുപ്പ് നടക്കാനിരിക്കേ കോണ്ഗ്രസിലുണ്ടായ പൊട്ടിത്തെറിക്കൊടുവില് പാര്ട്ടിയുടെ ആറ് എം.എല്.എമാര് രാജിവച്ചിരുന്നു. ബാക്കിയുള്ള തങ്ങളുടെ 43 എം.എല്.എമാരെയാണു കോണ്ഗ്രസ് റിസോര്ട്ടിലേക്കു മാറ്റിയത്. ഗുജറാത്തില്നിന്നുള്ള പാര്ട്ടിയുടെ രാജ്യസഭാ സ്ഥാനാര്ഥിയും കോണ്ഗ്രസ് അധ്യക്ഷ സോണിയാ ഗാന്ധിയുടെ രാഷ്ട്രീയകാര്യ ഉപദേശകനുമായ അഹമ്മദ് പട്ടേലിന്റെ ജയസാധ്യത ഇല്ലാതാക്കുമെന്ന ഭയത്താലാണു നടപടി.
അതിനിടെയാണ് എം.എല്.എമാരെ ബംഗളുരുവിലെ ഈഗിള്ട്ടണ് റിസോര്ട്ടില് താമസിപ്പിക്കാനും സംരക്ഷണമൊരുക്കാനും നിയോഗിക്കപ്പെട്ട മന്ത്രി ഡി.കെ. ശിവകുമാറിനെതിരേ നികുതിവെട്ടിപ്പ് ആരോപിച്ച് ആദായനികുതി വകുപ്പ് നടപടി തുടങ്ങിയത്.
ഡല്ഹി, കര്ണാടക സംസ്ഥാനങ്ങളിലെ 60 ഇടങ്ങളിലാണു റെയ്ഡ് നടത്തിയത്. എം.എല്.എമാരെ താമസിപ്പിച്ചിരിക്കുന്ന റിസോര്ട്ടിലെത്തിയ ആദായനികുതി വകുപ്പ് ഉദ്യോഗസ്ഥര് മന്ത്രിയെക്കൂട്ടി അദ്ദേഹത്തിന്റെ വസതിയിലേക്കു പോവുകയായിരുന്നു.
ശിവകുമാറിന്റെ അടുത്തയാളും റിസോര്ട്ട് മാനേജറുമായ ജി.പി. മാത്യു, കര്ണാടക പ്രദേശ് കോണ്ഗ്രസ് കമ്മിറ്റി സെക്രട്ടറി വിനയ് കാര്ത്തിക് എന്നിവരെ ചോദ്യം ചെയ്യാനായി ആദായനികുതി വകുപ്പ് ഓഫീസിലേക്കു കൊണ്ടുപോയി. റെയ്ഡിനെ കുറിച്ചു പ്രതികരിക്കാന് മന്ത്രി തയാറായിട്ടില്ല.
ഡല്ഹി സഫ്ദര്ജങ്ങിലെ മന്ത്രിയുടെ വസതിയിലും ഹാസന്, മൈസൂരു എന്നിവിടങ്ങിലെ സ്ഥാപനങ്ങളിലും നടത്തിയ പരിശോധനയില് നോട്ടെണ്ണല് യന്ത്രങ്ങള് കണ്ടെടുത്തു. വിവിധയിടങ്ങളില്നിന്ന് 11 കോടി രൂപ പിടിച്ചെടുത്തതായും ആദായനികുതി വകുപ്പ് വ്യക്തമാക്കി. സി.ആര്.പി.എഫ്. ജവാന്മാരുടെ സംരക്ഷണയില് 120 ആദായനികുതി ഉദ്യോഗസ്ഥര് റെയ്ഡില് പങ്കെടുത്തു.
റിസോര്ട്ടില് റെയ്ഡ് നടത്തിയതിനെതിരേ കോണ്ഗ്രസ് ശക്തമായി രംഗത്തെത്തി. എന്നാല്, എം.എല്.എമാരുടെ മുറികളില് പരിശോധന നടത്തിയിട്ടില്ലെന്നും മന്ത്രിയുടെ മുറി മാത്രമാണു പരിശോധിച്ചതെന്നും ആദായനികുതി വകുപ്പ് വ്യക്തമാക്കി.
https://www.facebook.com/Malayalivartha
