കശ്മീരില് ഭീകരരുമായുണ്ടായ ഏറ്റുമുട്ടലില് മേജര് ഉള്പ്പെടെ രണ്ട് സൈനികര്ക്ക് വീരമൃത്യു
ജമ്മു കശ്മീരിലെ ഷോപ്പിയാനില് ഭീകരരുമായുള്ള ഏറ്റുമുട്ടലില് മേജര് റാങ്കിലുള്ള സൈനികനും ജവാനും വീരമൃത്യു. ഒരു ജവാനു ഗുരുതരമായി പരുക്കേറ്റു. മേജര് കമലേഷ് പാണ്ഡെ, ജവാന് തെന്സിന് എന്നിവരാണു വീരമൃത്യുവരിച്ചത്. കൃപാല് സിങ് എന്ന സൈനികനാണു ഗുരുതരമായി പരുക്കേറ്റു ചികില്സയിലുള്ളത്.
ദക്ഷിണ കശ്മീരിലെ സയ്പോര ജില്ലയില് വ്യാഴാഴ്ച രാവിലെയാണു വെടിവയ്പുണ്ടായത്. മേഖലയില് ഭീകരരുടെ സാന്നിധ്യമുണ്ടെന്ന ഇന്റലിജന്സ് വിവരത്തെ തുടര്ന്നു സൈന്യം തിരച്ചില് നടത്തുകയായിരുന്നു. ഈ സമയം ഒളിച്ചിരുന്ന ഭീകരര് വെടിയുതിര്ത്തു. തുടര്ന്നു സൈന്യവും തിരിച്ചടിച്ചു. ഇതിനിടെയാണു സൈനികര്ക്കു ഗുരുതരമായി പരുക്കേറ്റത്. ഇവരെ വ്യോമമാര്ഗം ശ്രീനഗറിലെ സൈനിക ആശുപത്രിയില് എത്തിച്ചെങ്കിലും രണ്ടു പേരുടെ ജീവന് രക്ഷിക്കാനായില്ല.
രാഷ്ട്രീയ റൈഫിള്സ് 62, ജമ്മു കശ്മീര് പൊലീസിലെ പ്രത്യേക വിഭാഗം, സിആര്പിഎഫ് എന്നിവര് സംയുക്തമായാണു തിരച്ചില് നടത്തിയത്. മേഖലയില് ഏറ്റുമുട്ടല് തുടരുകയാണ്.
അതേസമയം, പുല്ഗാമില് സൈന്യവുമായുണ്ടായ മറ്റൊരു ഏറ്റുമുട്ടലില് രാവിലെ രണ്ടു ഭീകരര് കൊല്ലപ്പെട്ടിരുന്നു.
https://www.facebook.com/Malayalivartha
